Bok Tok, Sorabaia, 24 Januari 1914. Bersama Bok Tok dalem ke doea tangan kita hatoerken pada pembatja: Sinning-ni-nari-mashite Omedeto-Gozaimasu!". Kira² pembatja kaget dapet batja ini beberapa perkata'an asing dan doega jang kita hendak goenaken bahasa boeroeng gredja di ini soerat tjerita. (tijdschrift)
Sengadja pembatja, kita goenaken itoe beberapa perkata'an Japan, kerna kita taoe tida banjak orang Tionghoa kenal bahasa itoe, tapi begitoe djoega kapan orang Tionghoa masih berhati asli, masih tjinta pada leloehoer dan adat'nja, pasti aken mengerti sendiri apa maksoed'nja. Lebih 50 taon jang laloe di dalem satoe roemah di Negri Roes, ada berkoempoel satoe familie, papa, mama dan ampat siotjia jang manis bersama satoe tetamoe nama'nja graaf Leo Tolstoi. Tiba² itoe tamoe toelis di atas sepotong kertas tiga hoefoef : S, T, K, dan minta toean roemah poenja poetri²nja tebak apa maksoed'nja. Beberapa tempo soedah di boewang aken mendoega antara langit dan boemi, achir'nja tjoema satoe jang soedah bisa tangkep maoe'nja si tetamoe, jaitoe nona jang kamoedian djadi istri jang soetji dari itoe Goeroe Besar (Leo Tolstoi). Arti'nja itoe tiga hoeroef adalah djaoeh bagi orang loear, tetapi boeat itoe nona ada di dalem hati'nja: (S)aja (T)jinta (K)aoe. Waktoe orang Tionghoa tiada bisa merasa itoe, njata hati'nja soedah djaoeh dari adat'nja(kebangsa'an). Satoe manoesia jang ilang agama'nja(principes, haleoan) soedah tiada berharga satoe apa poen, kerna'nja satoe bangsa jang ilang adat'nja(tabeat), poen demikian. Dalem waktoe belakangan bangsa Tionghoa soedah banjak boewang atoeran'nja jang baek, adat'nja jang haloes dan si-boen djadi kakoe dan kasar, Hao poen soedah ampir ilang, Kongpo soedah tida di soekain lagi. Sekarang moelai di oesik kalender (Im Lik) jang soedah di pake beriboe taon dengen tiada koerang sesoeatoe apa, hingga boleh di bikin kaloet sama sekali atoeran, sembajang leloehoer soedah boleh di bikin ilang djoega peladjaran Khongtjoe berhoeboeng dengen angka 2465 (*2558 sekarang) jang soetji. Dalem politiek dan perniagaan kita boleh loepaken itoe semoea, tapi djadi dalem familie atawa antara bangsa sendiri (Tio Tji Tong) boewang atoeran sembajang kerna hedak himpasken tachajoel sebage djoega boenoeh anak di seloeroeh doenia kerna maoe ilangken penjakit batoek! Sementara kita poenja pendapetan, bangsa Tionghoa kebanjakan soeka menoeroet Yang Lik (*masehi) tiada laen kerna segala penanggalan di madjoeken, tjoba Im Lik (*im lek) lebih doeloe dari Yang Lik, kita boleh pastiken, orang aken pegang tetep atoeran lama, seperti djoega anak ketjil, jang lebih soeka dapet sepeser sekarang dari pada besok trima sepipis!! Terlaloe sekali! itoe semoea menoendjoeken bangsa Tionghoa hidoep zonder haloean dan tiada berpikir, anoet sadja djalan'nja angin, jang mana boleh bawa bahaja di belakang hari. Di Negri Fransch doeloe djoega soedah di adaken kalender sendiri menoeroet pringetan Revolutie, seperti sekarang di Tiongkok atoeran: Bin Kok enz. kamoedian njata tiada haroes terpake. Fatsal adat di Negri Inggris orang pegang keras sekali dan antara'nja ada satoe jang loetjoe dan manis: Tiap taon satoe hari di tetepken orang lelaki di antero negri Inggris boleh tjioem segala orang prempoean di bawah daon mistletoe jang di pasang di segala tempat. Itoe adat soedah banjak menjiarken penjakit syphilis hingga sekalian thabib di sana soedah protest, tapi pertjoema, rakjat negri tiada soedi robah adat'nja. Kaloe orang menanja pada kita kenapa negri Inggris djadi besar, kita djawab: kerna adat itoe!! Tenaga Tiongkok aken dateng dari dalem dan boekan dari loear, maka itoe sekali lagi kita hatoerken: Omedeto Gozaimasu Kwee Hing Tjiat [Non-text portions of this message have been removed]
