Orang seringkali bilang, bangsa Tionghoa ada satoe bangsa jang pelit, jang sekaker. Tapi saja, sebage satoe orang Tionghoa, maoe bantah itoe omongan. Bangsa Tionghoa tida pelit, tida sekaker. Bangsa Tionghoa sampe tjoekoep royal!!.
Maoe boekti? sebentar malem di Kranggan di adaken bacarat, roulette dan laen² matjem perdjoedian. Di sitoe nanti orang bisa boektiken jang orang Tionghoa tida pelit, tida sekaker, tapi sanget royal. Orang Tionghoa ini waktoe anggep doeit seperti pasir. Gotjeng, tjeban, noban-toen ada satoe perkara ketjil. Laen boekti lagi, dalem oeroesan prempoean djoega orang Tionghoa terkenal sebagi satoe bangsa jang royal, 10, 20 atawa 100, 200 boeat si nona manis, ada perkara ketjil. Kongkoan, soehian, djangan koeatir boekan poeloehan lagi, tapi ratoesan. Ini boekti soedah tjoekoep boeat bantah itoe toedoehan dari orang banjak, bahwa orang Tionghoa boekan'nja bangsa sekaker, tapi orang Tionghoa sampe tjoekoep royal. Tida sajang keloear doeit, tjoema sajang itoe keroyalan boekan'nja di oendjoek ditempat'nja jang benar, seperti djoega si boeta jang baroe melek, begitoe djoega orang Tionghoa poenja tjara hamboerken oewang ada di dalem djoeroesan jang salah. Tapi kaloe orang bilang bangsa Tionghoa sekaker, saja moesti bialng itoe toedoehan ada omong kosong. Hoedjin Tjamboek Berdoeri [Non-text portions of this message have been removed]
