Ampir berbaraengan dengen balik'nja Sun Yat Sen di roemah'nja,
sesoedah berdiam di Hawaii sekean waktoe lama'nja, mama'nja jang
sekarang mendjadi kepala roemah-tangga dapet trima satoe soerat dari
ia poenja anak jang lebih toea, dalem mana di bilang:
Ming-day alias Sun yat Sen kaliatan terlaloe pro asing sekarang"
Sementara ini Sun Yat Sen jang ada kandoeng anggepan tinggi boeat
peladjaran agama jang ia djoega soedah dapet di Honolulu, masih ada
dalem perdjalanan. Ia poenja pikiran masih moeda, ia menjetoedjoei
betoel agama Kristen, dan tiba² tempo sampe di Hongkong, dengen kaget
ia merasa seperti di tempatken dalem keada'an jang menjakitken
hati'nja, sebab di sini Sun Yat Sen berhadepan dengen
kasombongan
Barat. Di Hongkong dan di Canton, officier² Inggris dari dinest Pabean
Tionghoa telah gledah pada'nja dan bersama ia, laen² penoenpang
Tionghoa dengen tjara jang sanget kasar sedeng penoempang² koelit
poetih" boeat liwat zonder di langgar.
Bisa di terangken di sini, dengen seliwatan jang pada ini tempo tida
ada satoe pemoeda Amerika ada pikiran soal pergaoelan atawa politiek,
tapi Sun Yat Sen dalem oesia jang begitoe moeda ada kandoeng angen²
jang pasti boeat meliat sesoeatoe orang bisa berdiri merdika dan
sesoeatoe bangsa mendapet tempat'nja jang patoet di kolong langit, ia
poenja amarah timboel kerna itoe perlakoean jang meliwati wates, di
rasai oleh diri'nja sendiri dan oleh laen² penoempang Tionghoa
(perboeatan mana terdjadi dalem daerah ia poenja kakek-mojang sendiri,
teges'nja boekan di laen orang poenja negri) dan ini telah membikin
Sun Yat Sen menetepken satoe ideaal:
BIKIN TIONGKOK DAPET SATOE TEMPAT JANG SEPATOET'NJA DI ANTARA LAEN²
NEGRI BESAR DI DALEM DOENIA.
Sesoenggoeh'nja djoega, boekan satoe atawa doea orang merasa di
persakiti hati'nja dengen perboeatan orang jang menampak dan di rasai
di kalangan Pabean, tapi sedeng laen orang tjoema menampak dan merasai
serta diam, Sun Yat Sen poenja pikiran bekerdja, dan hidoep'nja ini
pikiran (orang tida kira) tida sedikit membikin soerem pamoer Barat di
mata'nja orang Tionghoa.
Sun Yat Sen balik ke doesoen'nja dan di sini ia tjoba petjahken soal²
jang telah lama ia kena hadepken. Beberapa kedjadian telah bikin lebih
panas Sun Yat Sen poenja hati; pada itoe taon kaize Manchu telah
perserahken Annam dengen mentah² pada Frankrijk. Dalem pikiran'nja Sun
Yat Sen timboel ini pikiran; Pemerentah Manchu di Peking tida mampoe
djaga kehormatan dari bangsa jang ia (*kaizer Manchu) prentah hingga
dengen perboeatan'nja itoe, pemerentah Manchu tentoe nanti teroes di
boeat hina²an
.
Sun Yat Sen tida lantas (bilang sadja) (*tida tjoema dengen omong
sadja) Masoek politiek"; di doesoen'nja ia di pekerdjaken djadi
toekang trima gadean dan ini pekerdja'an ia lakoeken dengen baek,
hingga ia amat di sanjang oleh ia poenja thauwkhe. Boeat bilang jang
Sun Yat Sen ilang ia poenja poelitiek" tida kena, lantaran segala
keada'an dan kedjadian jang tida pantes senantiasa ini pegawe pegadean
jang sederhana tentangin, sedeng kepertjajaan jang boekan² poen
mendjadi Sun Yat Sen poenja moesoeh besar. (*pengertian'nja segala hal
jang tida patoet aken di tentang oleh Sun Yat Sen jang saat itoe djadi
pegawe pegadean)
Berhoeng dengen ini, ternjata bagimana lantaran kepertjajaan
ketachajoelan dari pendoedoek itoe doesoen keada'an tida nanti bisa
mendjadi lebih madjoe, pada satoe waktoe ia (Sun Yat Sen) soedah
obrak-abrik roemah-sembajang itoe doesoen, lantaran ini
roemah-sembajang, Sun Yat Sen anggep ada mendjadi sebab dari
terbit'nja roepa² kebiasa'an jang lebih baek tida terpake lagi.
Perboeatan'nja Sun Yat Sen jang demikian telah membikin ia dapet
onslag dari pekerdja'an'nja. Tapi boeat ini Sun Yat Sen tida mendjadi
menjesel; dengen tabah ia trima tjomelan dan brenti, tapi sebelon'nja,
tatkala mendenger seselan;
Kaloe kaoe tida moefakat dengen tjara²nja merika, kaoe toch boleh
ketawain sadja, habis perkara",
Sun Yat Sen telah djawab:
Akoe tida dapet djalan boeat mengetawain bangsa koe sendiri".
Madjikan'nja pada itoe tempo separoh boengkem, dan mendenger djawaban
itoe pegawe moeda ada berisi tjingli, madjikan tida bisa bilang laen
dari mengoetjap:
Boleh djadi sekali zaman jang baroe perloe mendapet seorang seperti
kaoe".
Sun Yat Sen dan madjikan'nja diam sebentaran, dan segera madjikan'nja
berkata:
Ada sebab boeat pertjaja nanti kaoe mendjadi orang besar. Ini ada
oewang boeat pergi ke Hongkong, dan djika di belakangan kali kaoe
perloe sama akoe, dateng lagi, tapi djangan kaoe tinggal di ini
doesoen
",
lantaran pendoedoek Hsiang Shan kalap kerna satoe pegawe pegadean"
berani bikin antjoer boneka sakti, kepertjaja'an'nja orang banjak.
(besamboeng; Demikianlah Sun Yat Sen meninggalken
)
