Dr. Sun Yat Sen merasa jang ia perloe mempoenjai oewang boeat toetoep ongkost² jang perloe, lantaran-apa ia boeka praktijk dokter di Macao, daerah Portoegis, tapi apa maoe praktijk'nja di boeat iri. Dokter² Portoegis di Macao telah kilik pemerentah'nja boeat adaken wet jang melarang dokter Tionghoa boeka praktijk di sitoe, begitoelah Dr Sun Yat Sen terpaksa pindah ke Canton. Lantaran ini kedjadian di Macao, lebih² ia merasa sakit hati kerna tida merasa poewas jang ia sebage orang Tionghoa tida boleh hidoep di daerah'nja sendiri, tjoema kerna itoe daerah teritoeng sebage kota verdrag". Dalem tempo satoe taon, Dr. Sun Yat Sen soedah mempoenjai tempat praktijk jang baek dan ampat roemah-obat. Betoel ia lakoeken praktijk dokter, tapi pikiran'nja boeat bikin Tiongkok mendjadi satoe negri jang merdika masih belon ilang atawa loepa. Boeat sampeken ini niatan, ia toetoep praktijk'nja di Canton dan bersama satoe soedagar ia pergi ke Tientsin dengen menoempang kapal. Apa orang kira Dr. Sun Yat Sen soedah berboeat sewaktoe ada di Tientsin? Ia telah koendjoengi orang jang paling berpengaroeh dan agoeng di Tiongkok markies Li Hung Chang, tangan kanan dari Kok Bo Tsu Shi (djanda-Keizer).
Di Tientsin, Dr. Sun Yat Sen jang saat itoe masih moeda oemoer'nja baroe 27 taon (*1893), dengen berpakean setjara Europa menghadep itoe pemerentah jang angker, jang dengen kekoeasaan'nja telah gentjet Tiongkok lama'nja 30 taon, ia ada markies Li Hung Chang jang pernah ia djoendjoeng tinggi² disana sini dalem kalangan radja Europa. Apakah jang Dr. Sun Yat Sen soedah oeroes dengen ini tangan-kanan'nja djanda Kaizer Tiongkok? Dr. Sun Yat Sen oendjoek keperloean merobah tjara pemerentahan sebegitoe lekas bisa'nja. Dimana ia memang ada seorang jang pande bitjara, tidalah soesah boeat Dr. Sun Yat Sen kasih mengerti dengen baek kefaedahan² apa sadja jang terdapet pada itoe perobahan, jang ia bagi dalem ampat tingkatan: Rakjat moesti dikasih onderwijs soepaia mendjadi pinter; Soember² kekajaan Tiongkok jang terpendem moesti dioesahaken; Pekakas² jang bergoena soepaia di pake dengen sepatoet'nja dan Negri moesti diboeka dengen leloeasa boeat perdagangan oemoem. Markies Li Hung Chang tida beda mempoenjai kedoedoekan sebage radja-moeda telah ganda vorstel'nja Dr. Sun Yat Sen dengen ketawa sadja; ia kasih alesan jang orang tida boleh goesar pada'nja kaloe ia tida bisa tjiptaken politiek² baroe kerna ia poenja oesia jang tinggi. Ini tjoema ada satoe alesan kosong, sebab boekan laen tapi ini radja moeda soedah soeloet api peperangan dengen Japan, dan ia poenja oesia ternjata tida mendjadi halangan boeat kamoedian pergi ke Japan, dimana ia sampe trima pelor dari satoe pemboenoeh dan bikin verdrag-dami jang paling menrendahken deradjat. Pada itoe koetika tida ada soerat-kabar jang populair terbit di Tiongkok; kaloe ada omongan² jang orang maoe denger, waroeng² teh mendjadi sebage ganti'nja. Perboeatan Dr. Sun Yat Sen mendjadi boewah toetoer orang banjak. Tiongkok tertjangtjang boekan maen tempo'nja, denger Sun Yat Sen dapet audientie pada tangan kanan'nja djanda-kaizer, lebih² Tiongkok tida habis mengerti, bagimana sesoedah brani berboeat demikian, kepala'nja belon poetoes. Dengen ini semoea Sun Yat Sen telah bikin diri'nja mendjadi terkenal di seloeroeh djagat, tapi mendjadi terkenal sadja Dr. Sun Yat Sen tida merasa tjoekoep. Penting boeat ia aken liat genap'nja ia poenja angen², dan sedari habis mengoedjoengi Li Hung Chang ia mendjadi taoe jang dari ini tangan-kanan djanda-kaizer, biarpoen ada mempoenjai koeasa dan pengaroeh, ia tida bisa harep bantoean sesoeatoe apa poen, dan ini membikin Sun Yat Sen bilang pada diri'nja sendiri, jang kaoem berpengaroeh tida bergoena, sebage djoega pemerentah Manchu sendiri. Ini kaoem setan membikin ia menetepken: doea² (*kaoem berpengaroeh dan pemerentah) moesti dibikin terdjoengkel". Tapi, sebagimana di ketahoei, banjak taon jang pait-getir telah liwat sebelon'nja kaliatan tanda² jang tjita²nja ada harepan bisa terkaboel. (bersamboeng; Perang Tiongkok-Japan telah berachir dengen kalah'nja ). [Non-text portions of this message have been removed]