Dalem maanblad "Liberty" kita nampak satoe analyses dari berbagi-bagi soerat kabar Tionghoa melajoe jang terkemoeka di djawa sini, peloekisan mana ada harganja djoega oentoek disadjiken pada sidang pembatja kita. Antara laen² ada ditoelis:
Kita poenja S.S.K. Tionghoa-Melajoe. Apa jang kita toelis dibawah ini boekannja poedjian dan poen boekan tjelaan boeat salah satoe soerat kabar. Ini ada pemandengan singkat dari seorang jang berdiri diloear pager journalistiek dan kalaoe toelisan ini keliatannja ada memoedji satoe soerat kabar dan tjela laen soerat kabar. Itoe seharoesnja memang begitoe. Seperti garem rasanja asin dan goela rasanja manis. Kita moelai dengen: "PEWARTA SOERABIA" Pimpinan : Tio Ie Soei RM Bintarti Tan Kwat Poh. Soerat kabar liberaal nasionallistisch, tapi tida modjok dan rada conservatief. Salah satoe soerat kabar Tionghoa-melajoe jang sedari banjak taon tolak advertentie Djepang. Ia poenja hoofdartikelen ada sopan dan serieus dan oemoemnja bitjara soal politik doenia. Ia poenja harga abonnecemet ada jang paling tinggi antara semoea soerat kabar Tionghoa-melajoe, jalah f. 6,50 perkwartal saben hari terbiet paling sedikit 3½ lembar dan saptoe sampe 7 lembar, hingga djadi soerat kabar Tionghoa-Melajoe jang terbiet dengen lembaran paling banjak. Pewarta soerabaia dipimpin oleh journalis toewa, hingga tid amengheranken kalo sifatnja poen tentrem dan adem. Satoe koran jang sebenernja tida begitoe soeroep boeat terbit di Soerabaia kota jang mempoenjai "hawa panas" dan pendoedoeknja terkenal "anget". Rasa²nja pewarta soerabaia paling tjotjok terbit di Semarang dimana pendoedoeknja terkenal ajem. "SIN TIT PO". Pimpinan : Liem Koen Hian (dibelakang lajar) Oei Gee Hwat Sie Tjin Gwan. "I n d o n e s i s c h" dan "K i r i". Semi-officieele orgaan dari partij Tionghoa Indonesia dan soedah tentoe sekali isinja ada wakilken soearanja ini partij politiek. Sifatnja "a n g e t dan p a n a s", koran jang tjotjok dengen sifat pendoedoek Soerabaia. Barisan "bangsa berwarna" poenja pemboycotan terhadep Soerabaiasche Voetbal Bond beberapa taon jang laloe ada typisch "Sin Tit Po". "MATA HARI". Pimpinan : Kwee Hing Tjiat (meninggal hari selasa 27 Juni 1939 red) Tjioe Kim Soey Siauw Giok Tjan. Koran tida mempoenjain haloean tetep, "e x e n t r i e k" , penoeh dengen doealisme. Disatoe lembaran memaki Djepang, tapi dilaen lembaran moeat advertentie Djepang segede tetampah! Satoe²nja soerat kabar Tionghoa-Melajoe jang setjara tida taoe maloe makan doeit Djepang. Disatoe lembaran seboet² tentang "Indonesia Negeri jang koetjinta" dan dilaen lembaran toelis tentang "Wali Olanda". Soeka sama sensatie dan tjoba tiroe tjaranja s.s.k Amerikaansch : kabaran tetek-bengek dipasangin headlines malang melintang. "SOEARA SEMARANG" Pimpinan : Chan Kok Cheng Tan Boen Soan. Setengah "I n d o n e s i s c h" dan setengah nasionallistisch tida galak dan djoega tida melempem tida besar dan tida ketjil, dengen pendek soerat kabar "tengah²" , atawa jang orang Blanda namaken "De Gulden midden weg". Hoofdredactuernja tinggal banjak taon di london dan pernah isep hawa oedara Inggris. Dalem banjak hal ia berlakoe "gentelmen-like" seperti tjaranja orang Inggris, satoe sikep jang seharoesnja dihargai. Toean K C Chan ampier tida pernah memaki, ia ada satoe "gentelmen journalist!. Rubriek "Lombok Rawit" jang diisi oleh Mr Tjabe seperti namanja ada mengoendjoek, ada seger dan pedes. Satoe waktoe ernstig dan satoe waktoe rada rada...... tjaboel jang mana ada sanget disoekain pembatja!. Ini mengikoetin kemaoeannja djaman! Ngko Boen Soan, saja sendiri soeka batja apa² jang heibat. "SIN PO". Pimpinan : Kwee Kek Beng Go Tiauw Goan. Dengen satoe perkataan : Super nationalitisch. Dari sitoe moentjoel itoe term "haloean Sin Po". Moesoeh atawa sobat orang setjara djoedjoer jang sin po ada satoe soerat kabar dengen mana kita orang Tionghoa merasa bangga. Ia ada satoe soerat kabar Tionghoa-Melajoe jang dalem oplaag, ilustratie, kabaran dll. Tida oesah maloe dibandingken denge koran dalem bahasa apapoen jang terbit disini. Hoofdredactuer ada satoe bekas goeroe, satoe pedagang. Dan tida mengheranken kaloe sifatnja sin po poen ada mendidik soemanget. Ia telah didik pembatjanja begitoe roepa hingga setjara onbewust pembatjanja mempoenjain kepertjajaan pada diri sendiri. Dengn pendek : apa jang laen bangsa bisa lakoeken kita orang Tionghoa poen moesti bisa!. Orang boleh tida setoedjoe dengen haloean "Sin Po" tapi orang haroes kagoemin boeat apa jang telah kita koempoelken oentoek amal, oentoek jang sendiri sin po telah koempoelken djoemlah f. 60.000 shanghai fond f 260.000 dan tiongkok fond lebih dari satoe millioen roepiah. Apa jang sin po dapet koempoelken ada lebih besar dari apa jang dapet dikoempoelken oleh semoea soerat kabar dalem segala bahasa jang terbit disini digaboeng djadi satoe! Banjak matjem records ada dalem tangan Sin Po. "KENG PO" Pimpinan : Injo Beng Goat. Koran orang ketjil, koran oentoek kamoem boeroeh atawa sematjem "Daily Herald" dari Java. Boeat bela kepentingan kaoem boeroeh ia pernah serang K.P.M. dan Hoppenstedt setjara heibat hingga jang belakangan sampe di stop advertentienja . Pernah propagandaken lampoe tempel dan sobat baek pa Wongso, sementara antara ia poenja moesoeh² ada teritoeng siansing Tjung See Gan dan Tjiam Kim Hoat. Tida meremin mata boeat hal² jang kita masih kekoerangan. Kapal pendidik Tionghoa jang taoe koendjoengin prioek, Keng Po namaken kapalnja tjin-tjay, meriemnja tjin-tjay... dan jang dateng nonton poen tjin-tjay, serba tjin-tjay! `Ngko Beng Goat soeka membadoet, toelisannja seger, loetjoe dan rada² broetal hingga bikin kita inget pada Dr Lim Yu Tang. "SIANG PO". Pinpinan : Mr Phoa Liong Gie (namanja sadja) Phoa liong An. Koran jang lebi banjak meroegi dari pada mengoentoengken Mr Phoa. Tapi biar begitoe Mr Phoa tjoba tahanken sebisa-bisanja; ini perloe boeat ia poenja penghidoepan sebage politicus dan advocaat. Praktis pimpinan ada ditangannja toean Phoa Liong An orang baroe dalem kalangan journalistiek. Dalem babakan pertama ia tjoba berlakoe gentelmen like seperti toean KC Chan tapi sesoedah makan sedikit asem garem ia mendjadi setengah oeleng. Siang Po ada mempoenjai saoedara moeda jalah Kong Hoa Po, tapi lantaran kita koeatir ini toelisan mendjadi terlaloe pandjang , maka kita berentiken sampe disini sadja. "HONG PO". Djoega Hoeng Po soerat kabar dari Hoo Hap kita tida bitjaraken. Ia baroe terlahir dan masih terlaloe pagi boeat orang bisa tarik anggepan tentang dirinja. .: Forum Diskusi Budaya Tionghua dan Sejarah Tiongkok :. .: Kunjungi website global : http://www.budaya-tionghoa.org :. .: Untuk bergabung : http://groups.yahoo.com/group/budaya_tionghua :. .: Jaringan pertemanan Friendster : [EMAIL PROTECTED] :. Yahoo! Groups Links <*> To visit your group on the web, go to: http://groups.yahoo.com/group/budaya_tionghua/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
