-------------------------------------------------------------------------- | Add your name to the CLEAN GOA INITIATIVE | | | | by visiting this link and following the instructions therein | | | | http://shire.symonds.net/pipermail/goanet/2005-October/033926.html | -------------------------------------------------------------------------- Editorial in the November'05 issue of Gulab Konknnichi Lipi Ani Amchem Dhoronn Lipi voir anik fuddem boronvchem nhoi, oso ami nirnnoi ghetlolo, punn halinsorak amchea lipi vixinchea dhoronnacho kaim goir-somoz kela vo zala ani amcher kaim arop keleat te khatir ami khulaso korunk sodhtat. 'Romi lipicher tum virudh kiteak? Tum Romi lipichea porgottnneancho sompadpi asonui tum Romi lipichea favorant nam', oso mhozo ulekh zala. 'Gulab-acho sthapnnar sompadpi sorgest Fr. Freddy J. Da Costa, zannem Romi lipintlean Konknni Gulab rochlo ani uprant Romi lipi sambhallpak ani posravpak Dalgado Konknni Akademi rochli, tachea vicharam poros tumche vichar sarke veglle asat,' oxem mhonnunui kaim Konknni fuddareamni mhaka voddkila. Spoxtt sangpachem mhollear ami Romi lipi virudh ken'nach ek xobd borounk nam ani, ami khas Romi lipint boroitat ten'na, ami te lipi virudh, oxem koxem mhonnum- iet? Ek soroll sangpachem zalear aiz chol'lam tem zhuz lipichem nhoi, bogor lipichea mon'xanchem ani lipichea nanvan. Hea zhuzantlean vo vadantlean jeral khoinchei lipik, ani vixex korun Konknni bhaxek, kainch labh mellttolo oxem amkam zalear nikhalus disona. Hem lipichem zhuz ani vad cholta te vixim matr ami fokot amchem dhoronn spoxtt kelam, karonn amkam amche bhaxecho husko asa dekun. Ho lipicho vad cholta te vixincho ekan-ek lekh, protikria, mot 'statitics' chikhol marop, itiadi ami bariksannin vachlam, niall'llam ani bhasbhas kelea ani tatunt-leanuch amchem mot ani dhoronn spoxtt kelam. Lipik lagon bhaxek chepnnant dovrop sarkem nam. Akrek bhasuch nopoit zaun magir lipich urot oso amkam bhoim ievpak lagla. Ho lipicho tontto khub 'sensitive' mhunnttoch khol niall korinastana, Konknni lokanchea bhavnam kodden khell korun, porjek uchamboll korpachem ek sompem hatiar (easy weapon) zaun asa, mhunnttoch oslea vixoiacher favo to vichear korinastana sott korun zonn ekleak dista toxem mot divop ani borovop ani faleam magir apli chuk zali mhonnun roddon kainch faidea-chem nam. Dekun ami kitem amchem mot porgottlam tem vhoddle fikirin ani zababdaren kelam. Ami khoinchech lipicher virudh nant, ani Romi lipichi tor amkam opurbai, karonn tinnench amkam manachea zagear pavoileat. Nagri lipi amkam vachpak thoddi bhov ieta, tori-i borovpak title sompeponnim ienam, ani hi ek amche mukhar vhoddli oddchonn ani osoktai. Punn amche he osoktaiek lagon fuddle pillgek sakrifis korunk lavop, ani tanchea sopnancho gobor korop, hatunt bilkul xanneponn nam, bogor haka svarthacho vas marta. Romi lipik, Nagri lipi vangdda ek-sarko dorzo dium ieta zalear hi ek vhodd sontosachi gozal. Tea poros Nagri lipi kaddun Romi lipikuch odhikrut lipichem sthan dilem tor ami tea-von khuxal. Punn he sontosache gozali vangdda khol niall korche, he sombondint anikui mhotvache vichear asat: Eke bhaxek don lipimni sthan dium ieta kai? Don lipi asleo tor eke bhaxecho vikas sovkas zatlo hatunt tor bilkul dubhav nam. Zor eke bhaxek don lipimni sthan dium ietalem zalear 18 vorsam fattim Konknni bhas ghottnneche atthve vollerent ghal'li ten'nach hacher vichear korun toxem kiteak kelem nam? Nam mhunn ho tontto uprant rokddoch kiteak voir sorlo nam? Ho tontto voir kaddpak 18 vorsam ravpachi kosli goroz asli? Ani zor amche fuddari aiz 18 vorsamni mhonnunk xoktat apli chuk zali mhunn zalear faleam Devnagiri-Romi lipi ghaltoch uprant urfatto kitem porinnam' zalo zalear anik 18 vorsamni apli chuk zali, oxem te mhonnunk khore. Ten'na magir roddon kitem faido? Dekun khol niall ani vichear korunuch pavlam marlear koxim? Ani ek prosn ubho zata: Hea lipichea tonttea vorvim Konknni xiktelea amchea bhurgeanchem mon nirxetelem. Xikpeancher hea lipichea vadacho porinnam' kitem zatlo, tacherui ami lokx dinvchi goroz asa. Atam, sadharonn Konknni xikpi Kristanv bhurgim tor Nagri lipintleanuch boroitat ani vachtat, zalear ghoddie-ghoddiek hea lipichea tontteak lagon tannim, tancho kainch dox nastana, ho dhopko kiteak khauncho? Te pasot ho lipicho prosn ghoddie-ghoddiek ustun vhoir kaddchea bodol to 'once and for all' mittovn uddouncho. Amchea svartha khatir xikpeanchea fuddara kodden khellpak amkam kosloch hok'k nam. Vixex korun amchean tornattea xikpeam koddleanuch tanchem mot ghevn ho prosn mittovpak zata. Zori amchea voilea prosnak amkam pottoun dinvcho zabab mellot zalear ani Konknni bhaxek kainch luskonn zainastanam Devanagri vangdda Romi lipik sthan dium ieta zalear ho bodol ghoddun haddpant amchem poilem mot astelem! Ami survatek mhonnlam, hea zhuzant amkam bhoim asa mhunn, karonn aiz BJP-vale sud'dam Romi lipik sthan mellovpak tenko divpak utthleat, ani hatunt, amkam zalear, ek vhodd 'conspiracy' dison ieunk laglea. Aiz Romi lipi ghalun kaideant durusti korunk amkam pattimbo diun, faleam magir Konknni vangdda Moratthi bhaxekui sthan divpak durusti korunk te magnnim ghalit mhunn. He toren te amkam 'jolly good ride'-ar vhoronk khore. Zoxem eka sompadpean mhonnlam tem amkam pottom vo nam - Konknnichea anik eka zhuzak machi toiar zalea ani hem zhuz Konknnivadi ani Moratthivadi hanchem aschem nam, bogor Romivadi ani Nagrivadi Konknneanchem astelem ani rajkornni porje modhem futt ghalun aplem sadovpak hea zhuzacho bhorpur faido kaddttole. Oxem zaum nhoie.