Svotontrtaiechim 56 Vorsam Somptana... Svotontrtaiechim 56 vorsam hi ek lamb vatt. Fattim vollun pollelear dubhava vinnem amchea Bharot desan tore-torechea karioxetramni udorgotichim oznadik panvlam marlolim distat. Xikxonn, vidnean, tontrvidnean, artik ani her mollancher Bharotan zaitem nanv zoddlam. Torui astanam desachim 56 vorsam niallun desacher ek bhonvddi marit zalear khuxalkai ani bhorvanxachea bhavnam poros dukhachim ani niraxiponnachim bhavnnam odik khoraien utpon zatat. Kiteak udorgoti borobor onit, dhormvad, durbollkai, osurokxea, adi. desant azun fulta, mat'ta ani vaddta ti amkam dolleam mukhar dista.
Mon'xam hok'k ani Lokxahi khatir 56 vorsam adim desacho lok zhuzlo. Ponn atam heach totvam add ek nazuk ponn khor hol'lo korun hea totvanchi poristhiti uchamboll zaun topasnnechi (introspection) borich goroz asa. Gujrattant zaleant tim bhirankull dhormvadik zhogddim polleleant. Him zhogddim eke vichitr torechim. Atam hea zhogddeanchea guneanvkareank khast porian lavnk ek kotthin kam' zalam. Kiteak heam khuneank ani Gujratt rajeacheam odhikareank bhieun govaiamni ogeponn dakhoilam. Gujrattant desache Lokxaiecher zhuz manddlem ani zhuzlem. Hem fokot voilea-voirchem udahoronn, kiteak team ghoddnneam bhitor anikui khor bhoimkor ievzonneo mon'xam hok'kam ani Lokxahi virudh chalu asat. Olpsonkhechea hok'kancher akromonn kelam ti fokot voilea-voirchi gozal. Khorem mhonnlear bhitorlean gorib ani somazantlea oskot lokanche hok'k damun tanchea jivitacher ani sonskrutaiecher ek vhodd hol'lo chalu asa. Adivaxi, Dalit, bailo ani vavraddeanchea jivacher ani izoticher atak korop chalu asa. Dalitancher oteocharancheo ani oneaiacheo ghoddnneo vaddleat, bailancher bolatkar choltat te bhirankull distat, bekarponn vaddun tornatteanchi durdoxea zalea ani udorgotichea nanvan adivaxeanche zom'nicher akromonn korun tanche poristhitechi vatt lailea. Dhormachea nanvan Hindutv machi gheun rajki podveo zoddun ghevop hem novem rajkoronn amchea desache svotontrtaiechea 56 vorsanche poromporek borench vaitt. Hindutv oslea xastrachi xikovnn samanea mon'xak dhormachea nanvan bulovn tankam ghuspaitat. Zaite toren Hindutv svotontrtaiechea proitnachea muliancher, desachea songhottnnancher dil'lea sid'dhantancher - svotonrtaiecher, ekcharacher ani somudaiacher add. Amchea desachem dhormatitponn ani somazant ekta, monisponn, nit hea totvanchem boreponn ani tacho vikas korpache proitn Hindutvache fuddari aple svarthi ievzonne vorvim fiskottavunk vavurtat. Khuni ani neaialoieche khottle (cases) aslole rajkoronnant bhitor sorleat, rajki fuddari zaleat ani kaim zann Sorkar choloitat. Ani he rajki fuddari 'criminalisation of politics' hache virudh kaide korunk toiar na ponn tori dhormachea nanvan 'Cow slaughter' hacher bondi ghalunk osle kaide ghoddunk vavurtat. Durbollkai nopoit korunk vavrinastanam tankam dhomkavun Lok Sobheche vangddi sorkarachea adharan xud'dhikoronnachem nanv gheun goribank ani adivaxeank 'Hindutvant' bhitor kaddunk vavurtat. Desantlo spoxtt rupan choltolo bhroxttachar nopoit korunk vavrinant Amchea desache svotontrtaieche sonkoxtt lamb ievzonnechem foll mhonn visorchem nhoi. He sonkoxtt nhoich fokot Brittix raj bhair uddounk bogor hea svotontrtaiechea proitnant don gorjechim totvam rigun aslim: Poile svater Hukumxai vo Rajeachem raj naslolem Bharot ek adhunik raxttr korpacho proitn ani dusrem hea raxttrant kosloch bhed-bhav vo veglleponn naslolo zaun zati -katinchem, linganchem, dhormachem veglleponn adi. naslolem ani ekvott samballpi raxttr korpak suttke zhuzareancho hetu aslo. Dhormvadeanchea, bhroxtt mon'xanchea ani onitin jietoleanchea hatant amcho des cholounk diuncho nhoi mhonn svotontrtaiechea 56 vorsam somoiar nicheu korum-ia. Vachpi Boroitat Mov mellta thoim khonddtat M. S. Halinchea disamni amche tornatte pulis khateant bhorti zatat. Tornni pirai mhonnlear kuddint boll, rogtacho nett. ho nett he tornatte pulisank goroz tea zageancher vaprinant ponn... Agostache 3rer Weekender hea inglez satolleacher "Cops dozed as trucks cross Zuari" hea mhatallea khal ek lekh uzvadda aila. Diutter aslole pulis jhemetat, ttrok Zuari pul par kortat. Hem oxem koxem ghoddlem kai mhoinn chovkoxi kelear pulisechem mhonn'nnem pottona toslem asta. Te rokddech negar vetat vo dusrem kitem-i nib laitat. Fattim ek nors sangtaliki ratchea modianratir ek tornatto obsoeg sampoddlo ani taka hospitalant haddlo. Tachea paiank mar lagun haddak futt gel'li zait. Tinnem taka ilaz dilo. Thoddea vellan ek tornatto pulis ievn tika paiancho x-ray kiteak kaddunk na kai mhonn vicharunk laglo khoim. Tedna tinnem technician nam mhonn sangtoch to tapun te norsik ulovpak laglo khoim. Oxe toren hi vagnnuk zata. Reggie Fernandes Europi padri Konknni xikle ani xikoili M. S. Goeant Portugez aile tanche borobor Katolk padri bhitor sorlet ani tannim amchi bhas bore toren xikun kaddli. Hindu Bamnna kodde te xikle zait. Te itli bori Konknni bhas xikle ki tannim zaitim pustokam ani veakoron porian boroilim. Tankanch lagun aiz Romi Konknni jivi urlea. Ganvcheam nennar lokak vachunk borounk xikovpak tannim igorzanchim iskolam suru kelim. Thoim tannim bhurgeank songitui xikoilem, tea xivai latim ani portugezui xikoili ani mistir kele. Zaitem Konknni bhaxechem sahitea rochun dovorlem. Itlem asun, aiche amche ixtt romi lipik kikont kortat ani mol nasloli koxi lekhtat, fokot devnogri lipich sarki mhonn boddai dakhoun xat'ti fuloitat. Romivaleankuch lagun Goeant Konknni urlea mhonnum ieta; na tor Angola, Mocambique, Acores ani Macau zalam toxem zatolem aslem. Adim Goeant Hindu, Kristanv ani Musulman aslet ponn Moratthe nasle. Amche Hindu dhormik ritim khatir Moratthicheo chear klasi xiktalet toxench portugez ani inglezui xiktalet. Goenchi suttka zatoch bhaxek lagun ani Goem Maharaxttrant vilin korun zaitim zogddim zalim ani ami Goenkaramni Moratthivaleancho mar khanvcho poddlo. Mhojei tokler fator poddun tokli futtli ani hospitalant vochun pont marle ani ilaz ghetlo. Konknnik maniotai ditana donui lipi mandun gheunk zai asleo. Atam tori Romi lipik mandun gheunchi mhonn amchi vinonti. Berta Menezes Bhovxik sondhas nitoll dovorche M. S. Goeant zaiteam zageancher bhovxik sondhas bandhlole asat, ponn tanchi poristhiti pollelear jiv vitteta ani tantun vochpachem nhoi dista. Nogorpalikecheam odhikareamni heam sondhasancher nodor dovorlear bori mhonn hanv ugddas kortam. Oslech mhellsannik lagun veta thoim zollari zolmotat ani malaria zorachi pidda ximpoddta. Zaiteam zageancher udok santtun urta ani kusta, osle zage zonn eklean nitoll korit zalear somazuch nhoi bogor apnnakuch boreponn ietolem mhonn monant dhorunk zai. Zaiteam zageancher plastikachim aidonam hanga thoim uddoilolim asat, tantunt udok bhoron urta ani zollari vaddtat. Panchaiatincheam vangddeamni ap-aplea vattaramni nitollkai samballunk vavurpachi chodd goroz. Ghorantlo kochro kaddun bhair uddoitana fikir gheunk zai. Mellta thoinsor kochro uddoilear somazak vaitt zanvk pavta mhonn dor eklean monant dhorunk zai. Somaza khatir ami il'lemxem kam kelear amkanch boreponn ieunk pavtolem. R. de Souza Bhurgeanchea xikpacher nodor M. S. Aplim bhurgim iskolak vo kolejik gelim mhonntoch avoi bapain susegad ghorant bosun vo apleach sonvsarant jielolea porim ravunk favona, ponn tanchea xikpacher nodor dovrunk chodd goroz. Kaim bhurgim iskolak vo kolejik mhonn vetat ani tim magir khoim pavtat tachi khobor konnak asona. Zaite pavtti avoi bapui bhurgeam kodde zaite duddu khorchunk ditat ani haka lagun bhurgim ibadd zaunk pavtat. Avoi bapui kitle koxtt kaddtat tem tankam somzona, dekhun tanchem jivit nittaier haddunk avoi-bapaichi vhoddli zababdari. Hi zababdari sarki pallina zavn bhurgim vaitt sangateam borabor vaitt rostear pavunk xoktat. Ghorantui T. V-chm odruxtt bhitor sorlam, kitlim bhurgim aplea nennar avoi bapaik fottoun koslim filmam ani chitram polletat tem sangunk zaina. Iskolamni bhurgeank vhoddilamni dhomki dili zalear avoi bapain upkari zavnk zai, ponn atanchea kallar avoi zanv bapui bhurgeancho guneanv korunk sodhinant, dekhunuch oslim bhurgim uprant tanchea avoi bapaik budh xikoitat. Ghorabeant lhanponnich bhurgeank bore dekhi ritin vaddoupachi, chuktat tedna tankam apurbaienuch il'li tori xikxa divpachi goroz asa, oxem zaiteam zannak disun ailam. Avoi bapain apleam bhurgeam sovem apli zababdari ani kaido ollkhun ghevpachi goroz. Bhurgim borim zalear fuddarak bore nagrik melltole. J. Serrao ########################################################################## # Send submissions for Goanet to [EMAIL PROTECTED] # # PLEASE remember to stay on-topic (related to Goa), and avoid top-posts # # More details on Goanet at http://joingoanet.shorturl.com/ # # Please keep your discussion/tone polite, to reflect respect to others # ##########################################################################