Agrlekh "Vangddeanchem Tiraitponn Sonsthanchem Nisonttonn"
'Mhaka Kiteak Poddlam?' hi vagnnuk aiz vhodda promannan lokan apnnaileli nodrek ieta. Sogleank 'umpire' zal'le zai. Ani aichea somazant 'umpire' koxe jieop ani vagop khub sompem ani iesachem thorlam. Punn hem amchem dhoronn kivam hi amchi vagnnuk akhrek amkam khoim pavoiteli ani akhrek xevott kitem zatlo tem onnbhovunk chodd kall lagchona, punn titlem mhunnosor zal'lem luskonnui bhorun haddpak titlem sompem zanvchem na. 'Kiteim polletoch, aikotoch ani onnbhovtoch, tatunt kitem sot ani kitem lottkem asa tem dha zannam mukhar sangpak zori tuka dhaddos na zalear tujea xikpak koslench mol na', oxem mhozo ek guru sodanch sangtalo. Adlo lok sot sobhemazar sangpak ken'nach fattim ravonaslo. Punn aiz xekddeantlo eklo legit sotak govai divpak fuddem sorona. Kiteak? Sot kitem tem taka kollonna mhonnun? Na! Sot kitem tem taka koll'llam. Kallem asa tem dhovem thorta mhonn taka zannovta, tori 'Mhaka Kiteak Poddlam?' hi vagnnuk apnnaun to kus marunk iotn korta. Dha zannam modem ek utor kaddina, punn magir gop-chup ieun ekoddo astana zhankta: "Tuvem hott dhorlolo to nitt aslo. Punn amkam tea lofddeant poddlelem naka aslem." Magir sangon koslo faido? Zori dha zonnam modem dogam zannamni legit hanvem dhorlolo hott sarko asa mhonn mhaka patthimbo dil'lo zalear hanv jikhtolo aslom. Mhojea virodheak har poddtteli asli. Ani ken'na tori aple vankdde ievzonnek har poddtta mhonnun tori vankddem adharpi monis apleo vankddeo ievzonneo fuddem ghalcho naslo. 'Amkam Kiteak Poddlam? Amkam Naka tea lofddeant poddlele' he amche murkh vagnnukek lagon tancheo krur ievzonneo sufoll zait vetat, je vorvim bhroxttachar matot veta ani vatavoronn produxit zait veta. Ani haka zobabdar tor amich. Hem ami ken'na tori chintlam zait? 'Mhaka Kiteak Poddlam?' hacho onnbhov mhaka zomeamni, sonsthamni, firgoz-sonsthamni ani 'Housing Society'-mni puskoll gavla. "Asum di nhoi... Tem mhaka kaim lagona...' he amche vagnnukechim khub udharonnam dium ietat. Mumboint gaddient proves kortana eka provaxean bhovxik zagear luti uddoili. Tache bazuk boson aslelea provaxean taka te vixim voddkilo ten'na vhodd rubaban luti uddovpi provaxi aroddlo: "Tuka kiteak poddlam? Tujer poddonk na mu? Tum mhaka vicharunk konn? Tuka hanv dakhoum?...' adi to zhankot ravlo. Sorvbhonvtim konnuch zap kaddinaslo ani tacho nett choddot aslo. Sogleam provaxeanchea mukhamollar nodor martoch hanvem taka mhonnlem, "Tunvem chuk adharlea ani velean tum toso aroddtta mhonnje kitem? Bhovxik zageancher luti ghalpak mona asa, ani tuka dondd asa hem tum nokllo?" Hanvem oso prosn korina borobor tea dhobeantle (compartment) sogle provaxi ekach tallean tacher choddle. Gop-chuk kaddun to fuddlea 'station'-acher denvon gelo. Survatek 'Mhaka Kiteak Poddlam' hem dhoronn gheun sogott ogi boslele zalear ho chuk adarun rubab dakhovpi monis apunn zoitacho mukutt gheun vochon fuddarak osleo chuki korit ravtolo aslo. Eke Konknni Sonstheche zomatint eka mud'deacher bhasabhas kortana hanvem soroll sanglem ki ho tharav amchean pas korum nozo, karonn to amchea sonsthechea ud'dexam virudh veta. Hanvem bariksannin hajir asleleam vangddeank mahiti dili. Itlem astam ek vo dog zann soddun urlele oxe udgarle, "Korun tori polleum-ia. Kortat tankam tori korunk ami ut'tejon diunk zai." Hanvem fuddem tankam fokot ek prosn kelo, "Vankddem kortat tem korunk sud'dam ut'tejon divop?" Te meren hanv te sonstheche zomatik ken'nach hajir zalona. Kaim kallan 'Kortat tankam tori korpak ut'tejon dium-ia' mhonnpi vangddi mhojexim ieun mhonnunk lagle, "Are cha, ten'na amchi chuk zali. Tannim amkam tuje vixim bholtench chitr diun aplea tharavak 'support' korunk te zomatik apoil'le. Aiz te aplea paicho fat zal'lea porim ti sonstha choloitat ani tankam vichartolo konn na. Tum matxe ieun vostu tharear ghal." Hanvem motintuch mhonnllem, 'Hanv vostu tharear ghalunk sodtalom ten'na hanninch mhaka khursar marlolo. Hanvem spoxtt mahiti dil'li astana te somzunk nant zalear hea fuddem-i te somzunk xok'ea na. Osleam vangdda vavr korun vell ibaddpak amche kodden vell na. He 'support' korpache boil aiz hanga zalear faleam thoim.' Konknni Sonstha amcheo choddxeo toxeoch choltat te khatir ami ies mellovpak pavonant, ani apsvarthi monis he poristhiticho faido kaddtat, hacho mhaka khatren onnbhov zala. Oxem zalem mhunnttoch teo sonstha magir nopoit zatat. Sonsthamni, apsvartheancho ek pongodd utpon'n zata ani te promannik mon' xachea khandar bondhuk dovrun aplem sadhovpak iotn kortat. Kaim pavtti hea promannik mon'xank tanche svarthi iukticho vas legit iena. Ani zori konnak vas ieta tannem avaz kaddlear 'mhaka kiteak poddllam' mhunnon 'support' korpi vangddeancho adar gheun te aplem sadhoun chol'le. Magir sonstheche ud' dex thoinch urle, apsvarthi monis aploch faido kaddun tizori khali, ani promannik monis thokon aplea koplar hat marun bhezudd. Ani novean magir hich 'chain' chalu. Hachevorvim amkam dison ieta ki ami onnbhovan xanne zavpi monis nhoi mhonn. Halinsarak 'internet'-ar khub cheorcha zata ki Konknnichi ek avoi sonstha aschi mhonn. Hem soglem hanvem vachtoch ani nialltoch ek sangon xem dista: Sonstha kivam avoi sonstha sthapleo mhonnun Konknnicho vikas vo progoti zatli oxem na. Zori Konknnicho vikas ani progoti korpachi itsa (will) asli zalearuch Konknnichi seva zaum ieta. Dekhun amkam ti itsa asunk zai. Ani itihasacher nodor marlear sonstham poros ekoddea mon'xamnich (individual) Konknnichi oglli seva kelea ani korit asat hem konnuch nakarchona, karonn tankam itsa asli ani asa dekhun.