Bhikareanchea Jevnnank Bhikari Nant Bhikaranchem jevonntoyar korchi sonvoim adim thavn Kristi ghorabeant ek chal-rit zaun ghelea. Hacho hetu vo karann mhollear, ghorabeanchea otmeank durbollanchea nanvan 'satisfeito' korop. Hem bhikaranchem jevonn sat tem nnov durbholl dadle/bailank donparchea vellar amontronn divn chodd kimtichem dukor ani gaichem mas, don torechem verdurache (torkari) prath, nistem (vison), xit, ani khas 'samrachi koddi' ghorachea salant vo vosreant ator ghalun ponsachea panan vinnolea platir ghalun ditat. Tea bhair dal, soji ani kensank launk nall’lanche tel, bidi vo cigar, ani jevnna vellar marche marun ghora vetana pavbhor madd-feni ani thodde nogot duddu divnk zai. Ramos-acho avoy-bapui ani tachea fattlo ek bhav somplear khub vorsam sorlim. Bhailea desant nokri kortolean, sutten Gõyam ieta ten’na, tache sutteche dis hea ani tea lamboyit kamam khatir kabar zatale. Ani hea porim, sorgest avoy-bapui ani bhavachea nanvan bhikaranchem jevonn toyar korpak taka vell komi poddtalo. Punn, ghelea Dezembrant sutt’ten ailo ten’na, tachi itsa purponnim puri korunk taka bhouch vell gavlo. Ganvchea durbollam vixim haka-taka vicharchea bodla, igorjichea Padr Vigaraxim vochun durbolleanchi sonstha asa tatuntleant kaim durboll lokachim nanvam ani tanche pott’te Ramosan boroun ghetle. Durbolleancha Sonsthe-cho vangddi Casmiragelea ghoraxim to poilo ghelo. Casmirachem ghor pollevn eksarko thottaklo. Kaim vorsam fattim tachem ghor ganvtti nolleanchi aslem. Punn atam 'posh' teresichem zalem. Chukon, dusreagher bha pavunk nam mhu? Tacho dubhav vaddlo. Khatri korunk tannem mottean ulo marlo. “Casmir titiv, asa re ghorant?”. Konnacho tori ulo aikon bhitor thavn uleak zap di-it Casmir bhair bolkanvant ailo ani mhontlem, “Konn? Konn aila? Konn? Amchea adlea sarpanchageleo cheddo Ramos? Baba ken’na aila? Koso asa? Famil ailea? Ieo, ieo bhitor ieo”, Mottea ievkaran taka ghorant bhitor ghetlo ani fuddem uloilo. “Mhaka ekdom borem dislem tujem. Bhair vochun dusrea bhurgeam porim minzas vaddloli nam tuji. Adleach porim respetan mhaka tuvem ‘titiv’ mhunn ulo kelo. Dadhos tujer hanv. Tem asum. Ek sang, tum thondd kitem ghetolo? Kola, beer vo anink kitem?” “Naka, naka titiv. Dev borem korum. Timaim disnam. Ti nam?”, Ghorant asloleo vilaxi (luxurious) adunink vostuncher kurusdadichi nodor marit, Ramosan vicharlem Asa baba. Maidavatten (fattlean) rogddear boslea. Nusteache koddek mirem toyar korta ti. Elektrik grinder-brinderan kelear koddek taste ienam. Ek sang. Tum amgher pavonk kharan?” “Fuddlea Son’varak, amchea ghorchea otmeam pasot bhikaranchem jevonn ghaltam hanv. Tea khatir tum ani timaim amchea avoy-bapaichea nanvan ailear borem distalem mhaka.” “Ek minut rav baba”, to utlo ani TV-chea mezar aslolo kadern ghevn vonttir aslolea kalendaracher nodor marit borounk laglo. “Ken’na mhontlam tunvem? Fuddlea Son’varak. Natalanchem suman 29ver. Borem asa. Mhoje ani timaimche mhunn panchim-panchim ek hozar rupia divnk poddtolo” Ramos ojapit zaun dolle motte korit bolsantlem pakitt kaddtana, poixe kitea khatir tem zannun ghevnk, tannem vicharlem. “He poixe kiteak lagun….?” Tachem ulovop sompche adim Casmiran mhontlem “Advance payment to. Ghenvchech poddtat baba. Amontronam zaitim ietat amkam. Nizache bhikari thodde zaleat. Ugddas uronk hea kadernar borounchem poddta. Bhikaranchea jevnna disa anik poixe tunvem divnchi goroz nam. Punn thoddo lok khuxen anikui ditat. Somzotam, Padr Vigaran, amche sonsthecho jevnna-khanacho ‘menu’ tuka dila mhunn. Nam tor ho ghe”. Kadernant aslolo ek follicho kuddko kaddun Ramosachea hatant dilo. Ani Ramosan anvdde gilot, 'feeding the departed souls menu' vachlo. Pork vindaloo, chicken cafreal, beef tongue roast, prawns fried rice, fish fry pomfret or kingfish, ice cream and bebinca or dodol. Menu vachun Ramosak hanschem vo roddchem tem khinnbhor chintunk poddlo. Adlea bhikaream porim verdur ani samrache kodden jevpi, atanchea kallar bhikari uronk nant mhunn, taka kollit zalem. Donparchim bara vazun ghelim. Vellar bhikareanchea jevnnank pavunk zai aslole pavnnem pavunk nant, punn her soirim ievn ghor bhorlem. Bhikaranchea jevnna nanvan lagxilea xezaream, soiream, ixtt-mitram borobor 'get-together' korcheli, Ramosachi yevzonn asli. Donparchea sumar pavnni ekak, Honda Dio skutorir Casmiro ani tachi ghorkarnn ailim ani tachea fattafatt igorjichea vaddeantlo Luis Caitan nille rongachi Bajaj Pulsar ghevn darant ubo zalo. Luis Caitanachi istor vo kanni oxi: Vhokllen soddla mhunn kazar zainastana ravlo. Ghorabean konnui ankvar chedddo somplear, bhikaranchea jevnank Luis Caitanank apoitale. Paim vatt cholun, bhikareanchea jevnnank apoilolim, her dusrim durboll soirim pavun sorlim. “Titiv, tumi ters rozar suru kortat nhi?’, Ramosan Casmirak vinonti keli. “Baba, tuka konnench sangunk nam? Atam ters-rozar korinant mhunn? CD ghalun dhormik kantaram vazoitat. Tujea lagim devosponninchim kantaranchi kesette nant zalear, kaim nezo. Hi poi hanvem haddlea ti ghal.” Casmiran bailechea hand-beg-antli CD kaddun Ramosachea hatant dili. Moneponnan ti CD hantant ghevn music deck-acher 'instrumental' songit choltalem tem bond korun dhormik CD bhitor lotli. Suadik tallean gavpeanchim gayenam suru zalim ten’na, ajir aslole xezarim-soirim ulovpachim bond poddun dhormik kantaram aikunk laglim. Khas pavnneank toyar keleli ekdom nitoll vo xudh madd-feni botl haddun Casmirachea hatant Ramosan dili ten’na….. “Baba Ramos, halinchea kallar bhikareanchea jevnnant ani piyepant bodol zalolo to tuvem polloilear zaito temp zalo dista mhaka. Tumchem jivit bhairuch zalam. Gõyam kitem zata, khoim bodlop zalam ani adlea poromporik chal-riticher chador udoun novem-novem bhitor sorlam tanchi tumkam sul’luch nam. Atam madd-feni konn marina. Whiskey, Brandy, Cognac vo Beer ghonttat. Mezar toyar korun dovorloleo bidi konn oddnam. Kiteak, dumptecho dunvor direkt bhitor vochun pulmavank tras korta tea khatir 'filter' aslole 555 vo Rothmans sigretti oddtat. Xinsleamni kobreachem tel ghalun dovorlam tem atam mhatear konn ghalina. Tea zagear 'shampoo' botl ditat. Ator ghalun ponsachea panar atam konn dotorer bosun jevnnam. Mezar jevonn kaddtat” “Mhaka hi khobor nasli titiv. Atam kitem koruya?”, despez korun respet nam mhunntat tea porim zait, hea uskean, Ramosan Casmirak proxn kelo. “Atam Gõyant, foren vostu unneo nant. Chuklam titlench vegoveg bhorunk zata. Punn tea poilim ek aik. Bhikareank dadhos kelear ghorachea almank suseg ani xanti mellta, hem mat nennarponnachem chintop. Hanvem zaitea zannank sanglam, punn lok tem bherea kanar gheta. Ami bhorlolea lokachim pottam bhortat. Tujea avoy-bapai ani bhavachea nanvan hench jevonn tunvem eka onath ashraman (orphanage) dilolem zalear, nhoinch melolim khuxal, punn; onath bhurgim dhados zaun somploleank magnnem-rozar korchea korun, tanchem ritem pott bhortoleank dispottim bholaiki magtolim aslim. Bore bhaxen sorbhonvttim nodor marun polle. Mezar sanddlole vo ordde khavun ibadd kelole 'snacks' kuddke pletini distat. Uprant jevnnachem kitem zatolem tem chint. Tujea monan aslear, dusre khepek; ritim pottam bhorchim. Lino B. Dourado
