Khoinchea-Khoim Tenkovche Nhoi. Tea Aitarak kitem ghoddlem tem aiz meren tachi zap mhaka mellunk nam. Keddna-keddna-i yad korpak hanv yont kortam. Punn khoim tori xirkun urtam ani peklele gaye porot ustitam. Na tor konn tori te ustupak uzean tel ottoita. Tea adlea disa, mhonnchea Sonvara rati hanv, tednachea eka famad Kansavleche direktorachea tiatran neshlolom. (Bhurgeaponnar hanv tiatranim nhestalom) Ani mhoji nid sarki zavnk naslelean Aitarachea dusrea Misachea gayon mondollan (choir group) pavunk mhaka bhouch huxir zallo. Misacho sermanv orddhear pavlolo tednam hanv Igorjent bhitor sorlolom. Ti mhoje samkarachea bankar bosleli asli. Tichem mukhamoll dakholl kori tinnem kosle tori vicharant udki ghetlea mhonn. Padri Vigaracho sermanv choltanam mhoje khuxik bosun aslelea Thelma-n, mhojea kanan ghatlem. Misak yevnk tuka vell zalo mhonn, Loretta-n mhaka char pavtti tori vicharlam. Chovte pavtti vichartanam roddtalem tem. Roddtalem ani kiteak kai? Hanv, mhakach vichar kori tednam Padri Vigar aplo sermanv sopoitanam mhonnlem Mogachea bhav-bhoinamno. Amche gayon mandollacho ek vangddi Loretta aiz 21vea vorsant bhitor sorta. Aichem kherit Mis, tichea avoy-bapain, aple eklech dhuvechea zolm disa, Devachea oputt moga ani dhenneam khatir bhettoitat. Lorettak, 21vea zolm disachim porbim ditanam amche ganvche patron Lourdes Saibinin upott bhesavam ticher ghalchim ani tika sogllea borea gunnanim bhorchem. Oh no Thelmachea kanar bospa sarkelo avaz kaddit hanv boddboddlom Mhaka dista tem tujer mortaxem. Thelman, moskoreanim mhonnlem Bhettovnnchem git -Amchim sogllim gupit chintnam- hanvenuch suru kellem. Amchim sogllim gupit chintnam, Amchim sogllim golltim dukham, Amche anvdde, amchim kallzam, Hem Tukach bhettovitanv, Dhonia. Voilo gitacho vers gaytanam Loretta-chea dolle dukhanim bhorlele disle. Tichem gupit roddchem kharan hanv somzunk nam vo to vell nhoi aslo tichea thaim vicharpacho. Rati hanv ani mhozo bhav Xaverino, hanvem ghoddillo duo Dog-ui Ketkar Kansavleche rong-machier gaytoch, monan opangull (mentally retarded) aslelea eka bhurgeak ghevn ek avoy stagichea fattlean yevn, mhaka mhonnlelem. Hem mhojem por zolman thavn oxench. Mhonnchem, tem monan opangull. Devak argam taka matxe aikonk yeta ani sozmota. Zhoim tiatr vo dusreo kormunnuk kariavolli zatat thoim taka ghevn hanv vhetam. Tiatr vo dusreo karriogram pollele mhonntoch, tem ghora vochun kolakoranim machier keleli bhumika ani nach apo-ap ghora kodden korta. Punn choddan chodd roddpachem tachem sovong zata. Choddxe tiatrant dukhache bhag astat nhoi? Punn aiz, poilech khepek tumchem dog-aichem kantar aikotanam ani tumcho eksarkelo nach pollevn tem khub-khubuch khuxi zalem. Oi aiz!! Poilech pavtti tumkam pollevn mhojem por hanslem. Ani ham!! Tumchea gitan Rosy hem nanv aikun tem odik murgottlem. Mhoje dhuveche nanv Rosy Creedence Clearwater Revival hea pogddantlo Amerikecho gavpi ani guitarist John Fogerty hannem boroilelem famad Proud Mary gitachea surar bosoilolo amchoduo oxe toren suru zatalo. Poir dog-ui ami vochunk gele Ponda Dog-am cheddvam mevllim amkam tinga Ekleachem nanv Rosy; dusreachem nanv Mary .
Oi! Kalchea tiatrache mhattvant komedi gitan, monan opangull vo toklen gorib bhurgeak hanvem hansoilem ani aiz devmonddirant bhogtti git gaytanam monan sarkem asulle ixttinink roddoili? Misacho urillo bhag sompo meren ho prosn mhaka sotavunk laglo. Aiz ticho 21vo zolm dis khoro punn kalchea Sonvarak tigelea avoy-bapailea lognache 25vo rupea utsova borabor tichoi-i 21vo zolm dis monoilolo. Suman adim, ti amchea ghora amontronachem kard divnk ailli. Mhoje avoy-che dolle add korun poilech pavtti mhojea hatant ek chitt ghali. Ani ti chitt hanvem mhojea kalsanvachea bolsant lottloli. Punn sintida bhair mhojem kalsanv amchea mhellea ropa laginch dovorlelem tem, mhoje avoyn tea ropa borabor udkan fugonk ghatlem ani te chittiche sontenas kele. Ti chitt titan vo ink-an boroilelean mhaka ekui utor vachunk mellunk nam. Eka sumanam uprant Lorettachi khobor ghetli tednam, taka khoim tori pattoun dilam mhonn Thelma udexim mhaka ghomlem ani chittichi gozal khas mhoje guttachi ixttinn Thelma xivai hanvem konnakuch dusra monxak sangunk nam. Ek dis, Thelmacho e-mail ailolo to vachun, hanv thokttaklom. Mhoji ek kovita EK CHITT 22vi Otubr 2005 vorsa V. Ixtt-ar chappun ailli. Tinnem mhaka oxe toren ugddas kelo. Somzotam ho mhozo poilo e-mail tuka ek surprise ditolo mhonn. Poirchea sumanant V. Ixtt-ar chappun ailli kovita vachli. Ghoddie hi tuji kovita ani ti kalsavachea bolsant ghatleli chitt, kovita boroilea te toren nhoi mhu? Vicharla mhonn monant laun ghevum nakat. Sangpachem itlench. Loretta eka sumanam modim amkam kolloi nastanam tachea ghorcheanim khoim tori pattoun dillem. Yad asa? Mog asum. Tujem borem dekhnnar ani ixttin Thelma. Kosle-kosle vicharache monis astat kai? Khoinchem kaddun khoimsoruch tenkovpi. EK CHITT hi ek mhoji kolponnik kovita. Punn Thelman ti vhorun 30 vorsam odik sompun ghelle gozalik tenkoili. Hangachem tinga, thoinchem hanga, ani chaddyo korpi amche modim kubuch asat nhoi? Lorretta ani mhoje modim ixttagottiche natem asle khorem punn nhoi V. Ixtt-ar chappun (sokoll dilea) aille kovite porim. Ek Chitt Tuvem rompillea zhaddak ful fullam Tuvem sangillea pormonnem samballun dovorlam Tachi zotnai gheunk ietlo nhi? Amgelea mogak tuje-mhojea ghorcheanni noikar dillo. Tori astanam amchem premi natem ghottmutt thirlem Lognamchi gantth bandhi nastanam ami mog kelo Ankvar avoi somazak kollchea adim tuvem ievnchem. Chitt sompoitana iad kortam, amchea ballkak tujem nanv mellchem. Lino B. Dourado http://www.goa-world.com/goa/poems http://www.mail-archive.com/cgi-bin/htsearch?config=gulf-goans_yahoogroups_com&restrict=&exclude=&words=Lino+B.+Dourado ____________________________________________________________________________________ You rock. That's why Blockbuster's offering you one month of Blockbuster Total Access, No Cost. http://tc.deals.yahoo.com/tc/blockbuster/text5.com