Sasnachea Ghorantui Vegllozar Muga! Jivak zall vo tras poddlolo monis zaite pavtti oxem mhontlolem ami aikolam. “Suseg? Melea uprant suseg melltolo”
Punn ghelea mhoynnant lojechi ghoddni ghoddleli ti niyallit tor, atam melelea mon’xankui khorench suseg nam mhunn kollun ailam. Kuddchoddea Kristanvanche ximiterintlea toxench Pontemoll Muslimanchea kabrastantle, sompil’lea mon’xachea ugddasak bandil’leo fonddancheo fatri foddleo. Hem darun khortubam adarpeak vo adarpeank koslem dhadosponn bhoglem tem ekteach Devak khobor. Punn, sab-sube meloleank kiteak sotaytat tem somzun ghevpak mhaka zalear borech tras zatat. Vhoili ghoddnni zatoch, thoim kitem chol’lem tem fuddem vachat… Dusrea sokallim pulis thannar tokrar nond zatoch, foddlele fatrinchi pollevnni korunk, vorixtt pulis odhikari, igorjicho vigar ani ganvche somudayeche fuddari ximiterin aile. Motti-barik karvay kelea uprant, tem nixttur kortub ‘adarteleak’ vo ‘adarteleank’ motti kheast favo zateli oxi bhasabhas korun te thoinsorle koddsorle. Tancheo gozali jive monis dhean divn aikotale zalear, halinch sompil’lim ani ximiterichea fonddan purlelim vokil Artimiz ani fotting Ritina kan divn aikotalim. Tea ghelea uprant tancheo gozali: “Ratim hanvem pavlancho avaz aikololo. Punn fonddancheo fatri foddtaleat to avaz kannar poddunk nam”, Ritinan, laginch aslolea tichi ixttinn vokil Artimizak mhonnlem “Ago fottinga, tuka lok fotting Ritina hea nanvan kiteak vodkutale? Mon’xanchea pavlancho avaz aikunk tuka aila, ani mottean dho…dho..dho korun, fatrincho avaz zatalo, to kannar poddunk nam fottinga? “Hanv khoim zanna te fatri foddtalet mhunn? Amgelo Padri Vigar uloilolem aikolam. Ani sankistanv mhonntalo, Pontemoll Muslimanche kabrastantleo fonddacheo fatri foddleo. Ago vhoir pollelam? Konnancheo fatri foddleat teo. Mhoji bha foddunk nam mu go yea?” “Dolle aslear polletelim mu gho hanv? Sonvsarant astana dusreachem boreponn pollenant tanche dolle, he kidde poile khatat khoim.” “Oi, oi. Fokot tuji atam jib urlea. Korttant, ken’na tori sot uloilolem gho tum?” “Hanv korttan fotti uloitalim kiteak, to mhozo ek dhondo vo profession aslem mhunn. Punn tum gho? Ghorant bosun lokacheo kobro korun nanv ubaitalem tem? Asum atam. Amcheo jiblio khavnchea ani kan bere zavnchea adim ek sang. Tuka kitem dista? Kristanvanche borobor Muslimancheo fonddancheo fatri foddunk koslem tori kharan asa? ” “Gõykaram modem futt ani kestanvam ghalpachi hi ek chall asteli” “Sarkem tujem fotting Ritina. Hea mon’xank koddok kaido lavun, kheast divnk zai” “Oi? Tribunalant vo niti ghorant oslea mon’xank sukta divnk tujea oslim fottingponnache vokil kitle vavurtat? To tumcho dhondo nhi? Profession?” “Asum tem atam. Tuvem dusri khobor aikolea?” “Ken’na ken’na he kidde kanakodde khelltat. Thodde pavtti aikopak tras zatat. Kosli khobor mhunnta tum?” “Duddu aslole lok aplea mogache familichea fonddar despez korun margeleo fatri ugddasak bandttat. Dusro gorib lok asa to, lakdacho khuris fonddar dovortat. Zannam tum? Fatri foddtoleamni kitem kelam tem” “Sang mu gho. Sanglea viret koxem gomtolem?” “Fonddaveleo fatri foddleat punn, lakdanchea khursank hat lailolo nam khoim” “Kit mhut gho? Ximiterenui veglozar mu gho yea” “Ghoddie tankam dislam asot, meloleanche fondd bandun, ximiter aplem paichem bhens kortat. Bhat-bhensank lagon zogddim-zuzam zatat. Hem hanvem jivea sonvsarant korttan zaitem pollelam. Meloleank kiteak tras gho yea? Melelim fondd banddtat?” “Boro ugddas kelo tunvem. Tum tor zannanch. Mhozo ghorkar somplea uprant, hanv; amchea maim-paichea ghorant ektench ravtalem. Australia tikhan korun ravteli mhoji bhoinn Gõyam mudansak yetalem, punn ken’nach maim-paichea ghorak bhett dinaslem. Taka mellunk, tem ravtelea hotelan vochun bhett dinvchi poddtali mhaka. Mhojea mornnank tem pavunk nam. Mhozo fondd bandla mista. Dekun, hanvem tuka kedov vicharlelem. Mhozo fondd foddla kai mhunn. Zannaim Artimiz. Poir tedus mhojea mhoynneachea misak kose toren roddtalem tem. Mana, tum sanddun ghelem gho mana. Tujea mornnank yevnk mellonk nam. Utth gho mana. Ekuch nimnni zap di gho mana. Sodanch semprak ugddas urpak fatricho sobit fond banddla ani lokak kolpak mhojem nanv boroilam…gho mana..” “Atam koll’lem mu? Melolea fonddar porian nanv disunk zai mhunn lok fond banddat ani oxem korun ximiterichi svat haddavun dovortat. Ghoddie hench kharan heo fatri foddunk?” “Konn sangot? Kitem zaum. Mhonntat nhoi. Melolim ulaitat kai mhunn? Kan asloleamni aikuchem. Fonddar lakdacho khuris banddcho. Taka konn hat laila. Jezu Kristak lakdachea khursar khillaylo ani nhoi fatrichea. Nu gho yea?” Lino B. Dourado
