Tiatr Niyall * ‘Am Admi’* *Eleisanvachea vellar Am Admi gorjecho, punn eleisanv zatoch…?* * Jose Fernandes Ponnji, Goy*
Kala Akademi Gõy hinnem ayojit kelolea tiatr ‘Group A’ spordhent Tomazinho Cardozo hannem boroun digdorxit kelolo tiatr ‘Am Admi’ machier haddlo. Tiatrachi kotha eka nagrikachea (citizen) jivitacher attaploli asa. Amchea somazant gorib Am Admi ani girest ani bollixtt rajkornneam modem kitem ghoddta tem hea tiatrant bhes borem dakhoilam. Tomazinho Cardozo hache tiatr sodanch heram tiatram poros veglle asta. Tache tiatr zoxe porim ‘Novi Dixa’, ‘Nit-Onit’, adi khorench amchea jivitachi kholayen mahiti dita. Tech porim ‘Am Admi’ hea tiatrant eka gorib motdarak he lokxayen kitlem pasun mhotv asa tem tiatr pollennarank kollon yeta. ‘Am Admi’ hea tiatrachem Tomazinho Cardozo hannem thoddkean vornnon kelam tem mhollear “Amcho des Am Admini bhorla, punn muttbhor girestamni sorkarak chopkean dhorla.” Irene Cardozo avoyche bhumikent porzollta. Tech porim Selza Lopes dhuvechi bhumika bhes bori korta. Jocelyn Misquita eka ostori pulis inspekttorachi bhumika zababdaren korta zalear Shivanand Naik Shri Raposache bhumikent tiatr pollennarank dhadoxi korta. Tukaram Naik Juttelalache bhumikent, Dnyaneshwar Morajkar PA-che bhumikent ani Edvin Fernandes CBI Officer Fernandes hache bhumikent porzollta. Sheik Amir Baltu-che bhumikent ani Assis Cardozo Pasku-che bhumikent tiatr pollennarank borech hansoita. Tiatrantlim kantaram borim asa ani svadik talleachem Queenie Fernandes ‘Ostori’ hem kantar bhes borem mhuntta. Akash Telgu zo ‘Kingfisher Voice of Goa’ ho puroskar jikla tovui hea tiatrak borem kantar gaita. Tech porim bhurgim kolakaram Lynn Fernandes, Valentine Sequeira ani Violet D’Souza ap-aplim kantaram fixalkayen mhuntta. Eugene Cardozo, Sandra Cardozo, Joao Cardozo hanchim-i kantaram lokak umedir dovorta. Selvin Braganza hannem hea tiatrak songit dilam zalear machiechi manddavoll Timothy Dias hannem kelea. Bizlechi manddavoll Rohan Morajkar zalear fattbhuim songitachi (background music) manddavoll Joy Fernandes hannem kelea. Ek mat khorem, Kala Akademichea tiatr spordhechea venchik tiatramni machi manddavoll, bizli manddavoll, ‘background music’, adi pollounk mellta tem heram tiatramni pollounk mellona. *Hoch tiatr ‘Am Admi’ Novembrache 25ver sanjechea 7:30 vorar Gomant Vidya Niketan Margao zavpacho asa. *