Arrbi bhasen cricket-ak kitem mhunntat ?
Hanv poiloch Gulfant paulom tednam, Sharjah ganvant vorsantlean teen tori ontoraxtri Cricket sporda (international cricket tournament) zorran zataleo, punn chodd-xea Arrbeak Cricket kitem them kobor pasun nasli, UAE-int India, Pakistan ani Sri Lankecho lok kubuch asa ani ho lok cricket pollounk vhodd sonkyamni yetalo, Pakistan-Indyecho khel zalear, stadium boron lok bair urtalo. Hea kobrek zaitinch vorsam zalim, "match fixing-acho" kiddo lagche addim. Maka cirketicho ekdom shouk aslo, punn hanv Abu Dhabi kamak aslom ani Sharjah voson-yeupac ekdom augod aslem, roste oxir asle, ani rosteamcher vhahannam (traffic) ekdomuch chodd astalim ani cricket sporda asot zalear thea vun chodd augod zatalem. Ek dis mhojea Englandachea Managerak konnen tori India-Pakistan khellacheo char (4) tiketi dil'leo, thacheo don vhaddleleo duvo asleo punn thache potinik kaim karannak lagon yevunk mellunk nam tor tannem maka thanchea sangata appoilo. Khel ekdomuch nettan choltalo, Manageracheo donnui duvo maka borim volkotalim ani thim amchea dogaimchea modden bosun aslim ani khellachi mouz ghetalim, ami ekamekachim fokkandam-ai kori. Lok umedin apaple teamik tenkko ditalo, vatavaran-ui ekdom borem aslem. Kitem-ai tori korun amchi Indyechi teem zikli, hanven khel unnem polelo punn boumtonnim gomoti (fun) zataleo thancher oddik lox aslem, ek ghoddi dekun ugmonn yevunk nam, pois saun ailole pautichem moll borlem. Khel kobar zalo ani ami stadium-antle bair sortam mhunntlear amkam oxir zalo, ani vatter traffic-kui ekdomch chodd aslem, taka lagon vatter jevonnak raule, matxo aram kelo ani porot rosto dorlo, amkam Abu Dhabi pauta mhunntlear boroch oxir zalo, sokalchem ek vazlem, maka mhojea manageran vatter sodlo ani hanv rosto par korun mhojea biradar vetalom, tednam auchit mhojea phatlean polisamchea ghaddyechea sirenacho awaz aikolo, punn hanv chollot raulom, maka dislem the anik khuim vhetat mhunn, punn thannim mhojea mukar yevun ghaddi tamboili ani polisan hatt haloun mhunntlem "taal taal habibi" (vegin hanga yo). Hanv tamblom punn gabrouk nam, hanvem kainch vankdem korunk naslem, tor hanv thanchea ghadyexim ghelom. Abu Dhabi-nt sogle police Arrbi astat, choddxe Inglez somzonasle, maka polisan mhunntlem: "jeep pataka" Mhunnge pataka dhakoi. Hanv him gorjechim toddim utram zannam aslom, tor hanvem mhojo pataka (work permit) tankam dilo, UAE ganvant kam kortolo zalear ho pataka amche soven sorv-vhellar assumkuch zai. Mhojo pataka polletoch maka Arrbin kitem tori vicharlem, maka tem somgunk nam thor hanvem mhunntlem : "Arrbi maffi", mhunnge hanv Arrbi nokllom, thor thannem maka tutti-futti Inglegin vicharlem: "what you doing so late on the road" ? hanvem mhunntlem: "I have just come from Sharjah", thor tannem maka todde dubavache nodren pollelo, ani sanglem "at this time no buses from Sharjah", thor hanvem mhunntlem "my manager dropped me here and he went home, I am staying behind those buildings". Thannim maka vicharlem "why so let from Sharjah" ?, hanvem sanglem "I had gone to watch Cricket match", thankam Cricket kitem tem kollonk nam, thannim maka vicharlem " shu adda cricket", cricket mhunnge kitem ? thor hanvem thankam sanglem "it is a game played with bat, small ball and wickets", tor thannim maka fuddem vicharlem "shu adda bat, shu adda wicket" ? Mhunnge, bat ani wicket mhunnge kitem ?. Hanv chintunk poddlom, hea murkank koxem somzauchem, tor hanvem sanglem "bowler bowl's the small ball and batsman hits the ball, if ball hit wicket batsman out" ani bowler dhamun ball uddoita them dakoitalom, tednam eklean "STOP, no run" mhunntlem, phattim vollon pollelear, eklean aplem pistol kaddun maka zoklolem ani dusro apli beltantli handle-lachi latti kadun aslo, hanv toxoch thamblom, mhoje hatt voiruch asle, mhojo tallo suklo, tho somzolo hanv daumpachi toyari kortam mhunn, hanvem toxench ubbo raun sanglem "I no run, I show how bowling and batting", thannim maka lagim yeun protean vicharlem "shu adda cricket" ? Hanv zannam aslo footbollak Arrbin "kuratul khaddam" mhunntat mhunn, kura mhunnge ball ani khaddam mhunnge paimyom, tor hanvem sanglem "you know kuratul kahddam" thannim "yes" mhunntlem, hanvem sanglem "kura" ani mhojea donnui hattani footballacho gol (round) akkar dakoilo ani magir ekka hattir, mutt soddun dhaktea ballacho akkar dakoilo ani mhunntlem "kuri," mhoje baxen "kura" mhunnge vhoddlo ball ani "kuri" mhunnge dhakto ball, hanven toxem mhunnonam fuddem the dogui itlle hansle ani porot porot hatt dhakoun "kura-kuri" "kura-kuri" mhunnon hansot raule, the hanstat mhunnon hanvui hanslom ani hanstam hanstam bolsant hat ghatlo, hattak ek kagtacho kudko laglo bair kaddun pollelear, thi cricket khellachi ticket asli ani thicher addlea dissachi tarik asli. Hanvem thi ticket thankan dakoili, thi polloun the somzole hi kosli tori match asli mhunn, anik maka tanchea jeepint bossoun mhojea buildingachea fuddean sodlo, ani vethanam portun "kura-kuri" "kura-kuri" korun maka hat dak oit ghele, hanvem ek vhodd swas sodlo ani ghara ghelom. Dusrea disa mhojea sangata kamak aslea vangdeank hanvem vicharlem "cricket-ak Arrbin kitem mhunntat gai mhunn" ? Konnak ekleak passun kobor nasli ani hanvem tankam "kura-kuri-chi" purai kobor sangli, tea disak than mhoje vangddi, konnui cricketichi kobor korit thor rokddech "kura-kuri" mhunntale. Tor tumkam konnamkui Cricketak Arrbin kitem mhunntat them khobor asa ? Dusrea disa sanjer kammak than ghara yetoch mhojo land lainnicho fon vazlo, thea dissanni, mobile fon fokot manager ghevun boumtale, fon ubarlo, fonnar dusre vatten mhoji ghorkann asli ani thinnem maka vicharlem "tuji kal match koxi gheli" ? Hanv chintunk poddlom, bailek koxem gomlem hanv matchik aslom mhunnon ? Ani tika vicharlem "hanv matchik ghel'lom mhunn konnem sanglem tuka'"? tinnem mhunntlem "hanvem tuka don "ghorrya" chedvam sangata Sharjah Cricket match polletannam TV'ir dekhlo mhunnon", borem zalem mhoji ghorkann oxir mhonnchi nhuim asli mhunnon nam thor ghodbod zaupacho. Hanvem thika sanglem ki tim mhojea managerachim bhurgim mhonnon ani tho-ui amche sangata aslo mhunn. Thi hansli ani magir hanvem thika "kura-kuri-chi" khobor sangli, thi pottant duk'ko sor hansli. Hi asli kura-kuri-chi kobor. Freddy Agnelo Fernandes ##################################################################################### The content of this electronic communication is intended solely for the use of the individual or entity to whom it is addressed and any others who are specifically authorized to receive it. It may contain confidential or legally privileged information. If you are not the intended recipient you are hereby notified that any disclosure, copying, distribution or otherwise placing reliance on the contents of this information is prohibited and may be unlawful in certain legal jurisdictions. If you have received this communication in error please notify the sender immediately by responding to this email and then delete it from your system. ##################################################################################### --------------------------------------------------------------------------- Protect Goa's natural beauty Support Goa's first Tiger Reserve Sign the petition at: http://www.goanet.org/petition/petition.php ---------------------------------------------------------------------------