Mhoje Sovem Ghodleli Ghodnni
Amche zantte amkam zate pauti varrea vixim sagtale, varrem mhunnge, sadem varrem nhoi, punn ghoddneo jeo somzonne vinnem ghodtaleo (unexplainable happenings). Amchea ganvant ek zantto render aslo taka ami Juze Bab mhunn olkotale, taka pagunk (casting net) vospachi ekdom avodd asli ani nustem bi zaitem taka poddtalem punn to disan choddxo pagunk vocho naslo, modyeanir (midnight) to udkachi chonni (incoming tide) dorun pagunk voxo, apleak ghodleat te kauz (happenings) amkam to sango ani ami tim pixeponna mhunnon somzotale ani taka challoitale. Makai goroupa ani kasa (fishing and hunting) barabor pagpacho azun ekdom xeuk (liking), havem mhojea hattanni tin tori pageram vindun khadlelim. Juze bab zaitem nustem haddta dekun hanv-ui zaite pauti ratin pagunk vetalom ani kedna kednai borench nusteak haddtalom. Oxoch ek dis ratcho ekak (one AM) sumar hanv chonni (in coming tide) dorun uttun pagunk gelom, mhojea gharak tenkonuch amchi vhell, pager gheun udkant denvlom udkak matxe ghormi asli ani dorya chodd uchamboll naslo, vatavarn nustem marpachemch aslem, hanvem pager hatter ghetlem ani borexe onsaller (wave) paglem, pager kossar (sand) bostanach, pagerant kubuch nustem uddio marunk laglem, hanv koxi, pagerachi chann (rope attached to the net) hattant dorun hanvem pager ekttaim kellem, punn pagerant ekui nustem evunk nam, hanv chintunk poddlom, ittlem nustem pagerant assun ekui mellunk nam ? Fuddem vochun anik ekdam pager paglem, poilea pagerak podlolem toxemch nustem sarkem pagerant uddio marunk laglem, he pauti tor hanv xidduk raulom, hollu hollu pager ektaim kelem, tori nustem uddio marit aslem punn akerek kainch mellunk nam. Sarkoch gunspollom punn tokleant mat kaimch evunk nam, todden fuddem vochun portun pager marlem, he pauti poilim kucheak chodd nustem uddio marunk laglem, akkem pager hallounk laglem pageracher hanvem uddki marli, ekka nusteak tori dortolom mhunn punn ekui nustem mellunk nam, tin pageram paglim, pagerant zaitench nustem aslem punn ekui mellunk nam, maka oxem kednach ghoddunk nam, pager toddi (bank) vellem ani pinzlam zallear pollelem, ekui burak naslo, tedna matt Juze babacho uggdas ailo ani chintlem, zo Juze bab sagtalo tem khorem aslem astolem, tori punn bieunk nam pager ghetlem ani porot ghara ghelom, ordea ora bitor hanv ghara porot ailom, snan kelem ani vochun khattir add poddlom. Ghorkan uttun gun-gunnuk lagli, kiteak mhunn ede ratcho pagunk veta ? Hanv oggich raulom, dolleank nid yena zali, hi kosli ghodnni ghai ? Butamcheo zaiteo khobro aikoleleo punn hi khosli ochitr ghoddnni mhoje sovem ghoddli, tacher monant vichar khortam khortam mojem alarm vazlem, toxoch uttlom, bhattant pasoi marun toddim chuttam ektaim kelim punn chintnam mekllim zaunk nant. Ghorkannik kainch sangunk nam. Uzvad zatoch nosto pasun korunk nam, Juze babak mellunk ghelom ani ghodlolo kauz taka sanglo ani tannem maka oxi zap dili, “hanv sangtalom tednam dondolam mhunn somzon mhojim fokanddam kori atam tuka ghoddlem mure ? Atam lokak kitem sangtolo ?” Mojea tondak zap evunk nam, kitem mhunntolom aslom ? Hi khobor havem ek dogam baraboilea bhurgeank sangli ani te maka hansunk lagle, Juze babchem varrem tujer podlem kitem re ? Hi mhoje sovem ghodleli ghodnni, tumkam kitem dista ? Freddy Agnelo Fernandes