Gõychea Hindu-Kristanvam Modem Ubi Futt! Sod’deak Gõyant, mullavea xikxonnachea madeomache chollvollik boroch oto ailolo asa. Ho oto itlo voir sorla, tantuntlean atam Gõychea Hindu-Kristanvam modem ekvottachi vonott futtunk laglea. Ani fuddem vochun te futtik koslea-i boreponnachem ximitt marlem mhunnon ti futt bhorun yevpachi na tem chitr spoxtt dista. Heach satolleant, mhonnche Abrilache 6ver, Ponnjechea Azad Moidanacher ek zomat zali. Gõyant mullavea xikxonnachem madeom ‘avoy-bhaxentlean’-uch asunk zai, inglez madeom korunk mellchem na mhunn sangpi, ani lokachi xokti dakovpi ti zomat asli. Gõyant mullavea xikxonnachem madeom inglezin-ui zalem zalear, igorjechea iskolanche gas-icher jivi asloli ‘bamnnanchi Konknni’, ji Devnagori lipientlean asa ti sasnnak nattak zatoli he bhiranten ‘bamnni Konknni’-chea bhoktamni ti zomat apoyloli. Rajbhas Kaideache chollvolle vellar Konknniche lipie vixim kristanvank kallokant dovorun fottoylole monis, te zomatent, hatachea bottancher mezunk melltat itlech asle. Khorem mhonnlear, tancho ankddo titloch to. To choddona, na mhunn denvona. Punn tea disa Moratthivaleancho mat ankddo chodd aslo. Zomatiche machier, ani moidanar-ui. “Polle, amche sangata kitlo lok asa to” mhunn dakounk tannim khuim eka vixixtt pokxachea bollgeacher-ui lokak bhorun haddlole mhunn uloytana aikunk yetalem. Konknni apli avoy-bhas mhonnpi chodd lok hindu loka modem nant dekun ‘bamnnanchi Konknni’ gheun bhonkpeamni, eka kallar bhaxek lagun aple dusman mandtolea Moratthivaleank gheun ‘Bharoti Bhaxa Surokxa Manch’-a khal hi zomat ghoddoun haddloli.
Gõyant mullavem xikxonn avoy bhaxentleanuch asunk zai, dusre khuinchech bhaxentlean na mhunn hott dhorun apoylole he zomatent khubxim ulovpam Moratthintlean-ui aikunk mell’llim. Tea Moratthintlea ulovpank machier bosun aslolea ‘bamnni Konknni’-chea bhoktamni matui virodh korunk na, kiteak Konknniche lipiechea mollar apunn sanddche-buddche nhoi mhunn te Moratthivaleanche adarache boddiek dhorun asle. They were at the mercy of Marathi people! Mhunnonuch tancho bavtto - ‘Bharoti Bhaxa Surokxa Manch.’ Na zalear, ‘Konknni Bhaxa Surokxa Manch’ oxea nanva khal ti chollvoll kiteak cholona? Hantuntlean, ‘bamnnanchi Konknni’ gheun nachtolea muttbhor mon’xanchem aple avoy bhaxe sovem dhongiponn ani khottem mon ugtem-vingllem zata! Abrilache 6ver zalole he zomatent, ‘bamnnanchi Konknni’ gheun nachtolea ani ti choddan-chodd lokacher thap’pacho proyotn kelolea muttbhor lokamni itihasik Azad Moidanar aslole machier thaun kristi lokacher ani tanchea igorjechea fuddareancher ekar-ek far soddun, aplea monant kristi loka ani dhorma vixim kitlem mhellem asa tem ugtem kelem. Itlo kall, igorjeche fuddari zankam Konknni mollar ubarun dovortale, ontor-dhormanchea magnneanchea zomatink (inter-religious prayer meetings) hanga-thoim igorzamni zankam apoun vhortale, tech lok tea disa kristi lokacher ani tanchea fuddareancher lottkea aropanche far soddtale. Padrinchea xikxonnacheo ani xanneponnacheo khebddayo korit tankam, ani tanchea vangdda kristi lokak-ui pixeant kaddtale. Padrimni Gõychea ganvamni Konknni sonvskruti nas korpacho vavr choloyla oxem-i tannim sobhemazar sanglem. Kristi dhorm’ zo Gõyant asa to porkeancho dhorm’ ani taka lagun Gõyche kristi lok ani tanche fuddari monan azun-ui porkeanchea gulamponnant jiyetat, oxea utramni ‘bamnni Konknni’-chea bhoktamni aplea ulovpantlean sanglem. Itlench nhoi, tor igorjen mullavea xikxonnachem madeom jem tednam Konknnint bodol’lem tem Konknnichea mogan nhoi, punn aplea iskolantlea xikovpeank apnna kodde fi farik korunk zaina, sorkarache duddu melltat mhunn bodol’lem, ani tea bovallant igorjen xikpi bhurgeanchem khobrem korun soddlem, oxem igorjecheach iskolamni inglez xikoylolea eka ulovpean Moratthivaleanchea tenkean sanglem. Hoch kristi lok Konknni Rajbhas chollvolle vellar aplea khorchan teach Azad Moidanar zomtale, tednam hea muttbhor ‘bamnni Konknni’-chea bhoktank Gõyche padri ani hangacho kristi lok porki dhormacho ani monan porki gulamponnacho kednach disunk na. Igorjen mullavem xikxonn Konknni bhaxentlean suru korun Devnagori lipi aiz meren matxe tori jiti dovorlea ti igorz tea vellar tankam matui porkea dhormachi disunk na. Tednam ti porki dhormachi mhunn tinnem mullavea xikxonnachem madeom Konknni mhunn apnnaunk zaina, oso tannim matui tallo ubarunk na. Konknni Rajbhas chollvollechem Konknni Porjecho Avaz (KPA) zomo mukhelponnan fuddariponn kortalo. Khuinche-i poristhitent Konknni Gõychi Rajbhas zaunchi, ani Moratthi matui zollkek ravchi nhoi mhunn pordesant nokri kortolea kristi Gõykaramni, aplea pottak chimtto kaddun aple zoddicho poiso KPA-k dhaddun tea vellar goroz aslolo duddvancho tenko ani sohokar dilo. Tea duddvancho khorch koso-kat zalo hacho KPA-chea ‘bamnni Konknni’-chea bhoktamni azun-ui hixeob diunk ti gozal sodduch; punn Konknnichi chollvoll mukhar vochunk zai mhunn pordesantlea Gõykar kristanvanche duddu ghetana te porki dhormachea mon’xanche ani porki desant zoddlole duddu oxem tankam tednam matui disunk na. Xalear, kristi lokachem hem porkiponn tankam atanch kiteak dista? Rajbhas chollvolle vellar zankam aple dusman mhunn lekhtolea Moratthivaleanchi aiz aplea fatti-konneak ankddeanchi mệdd lavun ghetlea mhunn? Tea disa, ‘bamnni Konknni’-chea bhoktamni Gõyche sonvskrutayechea nanvan kristi lokacher ani tanche igorjecher, nanv ibaddunk fottingponnache far soddle, punn heach lokan Gõy, Gõykarponn ani Gõychi osmitay toxich sonvskrutay samballche khatir Opinion Poll-a vellar mol-mhotvacho tenko ani sohokar dilolo to te visorle. Atam hech ‘bamnni Konknni’-che bhokt Gõychi sonvskrutay ani osmitay sompounk fuddem sortana distat. Tachem khoreponn amkam tanchea ‘Bharoti Bhaxa Surokxa Manch’ hea nanvavelean dista. He lok ‘Bharoti Bhaxa’ nanva khal, Moratthi, Urdu, Kon’nodd heo ani her bharoti bhaso Gõyant bharoti sonvskrutayechea nanvan ubarun dovortat, ani tigun urleo zalear tankam koslich addkholl na. ‘Bharoti’, ‘Bharoti Bhaso’ mhonnot hankam zai aslolea dusrea bhasank-ui tor amchea Gõyant ‘Bharoti Bhaxa Surokxa Manch’-achea nanvan samball’lleo zalear, amchi hangachi sonvskrutay tigun urtoli ani surokxit astoli mhunn konnachean sangum yeta? Kiteak bhas hem sonvskrutayechem protik asa. Bhaxechim pallam-mullam sonvskrutayent astat. Oxem tor, ‘Bharoti Bhaxa Surokxa Manch’-achea nanva khal Urdu, Kon’nodd ani her bharoti bhasank-ui tor Gõyant surokxa asa zalear, Bharotachea her rajyantlean potta khatir Gõyant yevpi ani ailolea lokanchea sonvskrutayank ani bhasank lagun hangachi Konknni sonvskrutay na zavchi mhunn kitem khatri asa? ‘Bharoti Bhaxa Surokxa Manch’ oxea nanva khal ‘bamnnanchi Konknni’ gheun nachtolea muttbhor dhongi lokachean tori hachi khatri dium yeta? Mullavea xikxonnachem madeom ‘avoy-bhaxentlean’ mhonnot ‘Bharoti Bhaxa Surokxa Manch’-achea nanvan aiz Gõyant jem kitem choloylam, ti kristi loka ani tanchea padri-fuddaream add asloli hindu dhormvadeanchi chollvoll, kristi dhormacho, lokacho ani tanchea fuddareancho tiroskar ani dves korpachi chollvoll. Kristi lokak ani dhormak aplea bamonnponnachea chintpa ani vrut’te khal damun dovorunk itlim vorsam jem tanchea monant khottem xiztalem tem atam mullavea xikxonnachea madeomachea nimitan bhair sorlam ani sorta. Khorea orthacho dhormvad to. Mullavea xikxonnachea madeomacher chintunk aplem mon dubllem zalolea porim to vixoyuch kuxin dovorun, “Pap Saib Gõyant ailolo tednam tannem dilolem rozarachem kont hanvem kallza meren samballun dovorlam” oxem mhonnit dusre vatten kristi dhormacher atak korun Gõychea Gõyantleach hindumni apnna ani kristi somaza modem ubi futt ghalea. Atam, Konknniche Devnagoriche odikuch bhognnar zavpachi bhirant asa! Kitem-i, zaum! Mullavea xikxonnachea madeomachea nimitan Gõyant atam konnos khuinchem, ani nệr khuincho to spoxtt ritin kollun ailam! Jose Salvador Fernandes