Cypriano Bab Konknni romi-k onath korun gele! -Aurelio Viegas
Mhalgodde Konknni Romi bhaxek anik ek Goycho put adeus korun gelo. Avoi bhaxek adeus korun gelolo Bab Cypriano Lopes aplea sobhavant sodanch khaltikayecho aslo, dusreank kikont korpachi bhas ken'nach vapddinaslo ani heach karnnan to soglleancho avddicho zal'lo. Konknni sovem tacho mog hanga borovn kabar zavchonam. Punn sodanch podd'ddea fattlean ravon aplo vavr kela. Konknni borovpeank tannim aple veg-veggle kareokrom ghoddovn haddpak sodanch ut'tejon dilam ani hem kam tannim sonvsaran aso porian kelem. Chinchonneantlea Dandevaddo ganvcho Bab Cypriano Lopes hachi thoknnay korta titli thoddi mhonnpak hanv fattim soronam karonn konknni sorospotichea mollar tannem zo vavr kela taka hanv xabaski ditam. Punn xabaski-cho mannkar aiz amchea sovem nam zalo. Cypriano bab-ak tya dharunn mornnan nopoit kelo zait punn tannim Konknni sovem dakhoilolo oprup mog pollovn tannem kaddlole teag sodankall jive urtole hantunt kosloch dubhav nam. Goycha Konknni Durdorxonnacher to kam kortalo mhonnttocch tannem amche avoi bhaxecho mog kornneamni korun dakhoyla. Ani choddant chodd Konknni Romi bhas vhoir kaddunk tannim pott'tiddken vavr kela. Jya vellar Durdorxonn Moratthi bhaxek veng marun aslem ten'na tannim khasa Konknni bhaxentle romik aplo tenko dila ani xevott meren di-it aila. Konknni romi bhaxen Durdorxonar kosle kareokrom zay ani kosle nakat tanchi tannim puray zannkari kaddloli. Ani goroz tya vellar antrea-poirean mhonnttlolea bhaxen te Durdorxonnar aple konknni kareokrom ghoddovn haddttale. Romi bhaxen aple kareokrom kortolea bhavam-bhoinnank tannim ken'nach nam mhonnonk nam. Ani favo tya vellar tannim romik tenko divn kareokrom prosid'dh keleat. Aiz sogott romi bhaxechea mogeank tacho unnav lagla hem 100 tok'ke sot! Kaim vorsam fattim Cypriano bab Herald disalleache batmidar (reporter) asle. Te sodanch bhroxttachara (corruption) add zhuzleat. Jya-jya vellar ganvchi Chinchonnchi ponchayot bekaidexir kamani aplo sangat ditali te-te pavtti tannim potracher batmi xhapun aplo avaz utthaila ani ponchayotin sudharnni pasun kelea. Tachi soglleant motthi batmi tannem uzvaddak haddli ti mhonnllear Chinchonnche ponchayotint bizle vostunchem prokronn (Street light scam) zal'lem tachi batmi. Je vorvim sodrer asloli ponchayot bekaidexir kamam korta mhonn kitlech vorsam ponchayoticher aplem raj korpi sorpanch khala poddlolo. Mhoji ani Cyprian bab-achi ixttagott lagsarli. Punn dogainchea kamam khatir vellachi oddchonn zali ilench. Karonn Cypriano Durdorxonar kamar astana taka Ponnjent vochonk poddttalem. Ani tya vellar hanvui Ponnjent Gulab-ant aslom. Jen'na vell mellttalo ten'na ami Cypriano bab-ak Altinho-r mellonk vetale ani ek-ek pavtt dogui sangatan Ritz khanavollint jevonn ghetale. Cypriano bab-an mhaka Durdorxonar poilich ek mulakhot ghevpak adhar kelo ani hi mulakhot ten'nacho Goycho famad futtbol golrakhpi Brahmanand Sankhvalkar aslo. Tya xivay tannim Santosh Futtbol khellam vellar ek "live" dhanvtevornnon (live commentary) korpak mhaka sondhi diloli punn tya disa mhojea golleachem "infection" zavn tem dhanvtevornnon korpacho mhojo soeg vibaddlo, hi dusri goxtt. Uprant ami Mumboint vosti korun ailolean zaite pavtti tannim mhaka fonar ulovn ami ek konknni kareokrom Durdorxonar korum-ia mhonn sanglolem. Punn korum-ia korum-ia mhonnttasor Cypriano Bab Devadhin zale. Ani amcho dogaincho anvddo ordhkuttoch urlo. Ghoddie ken'na tori sorja rajeant eka-mekak mellon ho anvddo puro zait oxi opekxa asa. Zori aiz Cypriano bab amchea vangdda nam hem manunk amkam avgodd lagta toripunn tannim prosid'dh kel'lea Durdorxona vhelea kareokromancher nodor ghunvddailear te khoreamnich jivont asat oxi amkam bhas zata. Xevttak amchem ekuch mhonn'nnem: Dhonia Devan Cypriano Bab-ak aplea rajeant ghevcho ani taka sorginchem sukh favo korchem.Konknni romi bhaxek onath korun gel'lea Cypriano Bab-ak amchi xrodhanjoli.