Assalamualaikum warahmatullahi wabarakaatuh,
Updated, Jumat 10 Februari 2006 l Wartawan Antah baa mulonyo, tibo-tibo sajo Tan Baro taingek bahaso tanggal 9 Februari adolah Hari Pers Nasional. Takana pers, takana pulo dek inyo baitu paralunyo wartawan di masyarakaik. Kok indak ado wartawan, ndak mungkin inyo bisa mambaco koran di lapau Uwo Pulin satiok hari. Kok indak ado wartawan, ndak bisa inyo manonton berita di televisi satiok wakatu. Itu aratinyo, kalau indak ado wartawan, sasantiang apo sajo urang, pasti ndakkan bisa tahu pakambangan dunia. Dek wartawanlah awak di siko bisa tahu informasi kapa tabanam di Lawik Merah, dek wartawanlah awak capek tahu bahaso agamo awak dihino malalui karikatur di negara Denmark, dek wartawan pulo pajabaik bisa naiak pangkek, dek wartawan urang banyak tahu bekas pajabaiak, bekas anggota dewan dihukum panjaro, dek wartawan pulo urang bansaik ditolong kaum dermawan sarato de-el-el-nyo. Tan Baro indak bisa mambayangkan di negara ko indak ado wartawan, baalah jadinyo. Mungkin sajo awak-awak nan iduik di siko samo jo koncek tasungkuik tampuruang. Disangko dunia awak ketek, tapi katiko tampuruang tu tasipak urang gilo, barulah tahu bahaso nagari ko laweh. Dibaliak-baliaklah surek kaba Singgalang dek Tan Baro. Baritanyo indak banyak nan lua biaso doh, kecuali kalanjutan eksekusi bakeh anggota dewan. Salain itu, ado barita bahaso sejarah pers nasional tanyato dari Padang. Nan saketek ko tantu sajo agak manggulitiak Tan Baro. Mako dibacolah sacaro taliti barita nan datang dari Banduang tu. Sasudah mambaco, tan Baro maangguak-angguak surang. Katiko maangguak-angguak itu pulo tabayang dek inyo baraa banyaknyo urang awak nan kini manjadi wartawan di saluruh panjuru nusantara. Sabuiklah di Jakarta, di Surabaya, Banduang, Yogyakarta, Palembang, Bengkulu, Lampuang, Jambi Riau, Medan sampai ka Kalimantan, Sulawesi jo Maluku Utara, indak basiagak urang awak nan manjadi wartawan. Malah ado nan di Korea bagai. Iko adolah bukti sejarah bahaso pers tu iyo datang dari Padang. "Apo nan angek kini, Tan? Sarius bana nampak dek ambo!" tanyo Mak Pono nan dari tadi mamparatian Tan Baro mambaco surek kaba. "Cubo bayangkan dek Mamak, kalau indak ado wartawan. Lai mungkin awak bisa mangatahui informasi-informasi? Lai mungkin awak bisa mambaco koran?" Tanyo Tan Baro. "Ambo satuju bahaso wartawan sangaik paralu. Cuma ado nan indak katuju di ambo, wartawan karajonyo ado nan samo jo pambajak, indak baraa beda jo tukang mintak-mintak," jawek Mak Pono. Tamanuang Tan Baro mandanga jawek Mak Pono tu. Dalam hatinyo mambanaan kecek mak Pono bantuak tu. Dek inyo, itulah nan salamo ko manjadi tukang karuah, biang kaladi, marusak profesi. Mangaku wartawan, tapi indak punyo media. Urang-urang bantuak tu biaso disabuik jo wartawan bodrek atau ado juo nan manyabuiknyo WTS (wartawan tanpa surekkaba) atau PSK (pelacur surek kaba) dan ado pulo nan manyabuiknyo wartawan Muntaber nan aratinyo wartawan nan muncul tanpa berita. Karajo urang-urang tu indak labiah dari tukang pakang, tukang pangua, tukang mintak pitih, tukang mintak proyek de-el-el. Samakin tamanuang Tan Baro maingek-ingek itu sadonyo. Baa dek baitu? Kawan-kawan Tan Baro salamoko banyak nan baprofesi wartawan, tantu inyo agak tasingguang juo dek adonyo oknum atau urang-urang nan mangaku wartawan tapi indak ado baritanyo, indak ado surek kabanyo, indak ado medianyo. "Dek ambo ado sabeknyo tu mah. Reformasi alah mambuek banyak media tabik, karano indak paralu lai izin dari pamarintah bantuak Orde Baru. Katiko surek kaba tabik babarapo kali, sudah tu mati, nan wartawannyo tatap juo ado," kecek Udin Kuriak. "Iyo, tapi kan indak saluruhnyo bantuak itu," jawek Tan Baro. "Nan saketek tu nan manyakik. Samo jo bisua, kan indak ado bisua nan sagadang kapalo, tapi sangaik manyakik," kato Mak Pono pulo. "Jadi baa caronyo maubeknyo?" tanyo Udin Kuriak. "Wak sarahan selah ka organisasi-organisasi wartawan tu. Awak bialah jadi anggota parlemen lapau Uwo Pulin sajo. Baa dek Ajo Tondeh tu?" kecek Mak Pono baliak. Tagalak urang salapau tu mandanga jawek Mak Pono. Baitulah kabiasaan urang di lapau tu, ado-ado sajo nan jadi bahan ota satiok hari. - Espe St. Soeleman -------------------------------------------------------------- Website: http://www.rantaunet.org ========================================================= Berhenti, berhenti sementara dan konfigurasi keanggotaan anda, silahkan ke: http://rantaunet.org/palanta-setting -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
