Assalamu'alaykum w.w. Karano bapakai manuruik adat, manjadi undang di nantuo, kok pai lai baiyo, lah pulang tantu babarito. babarapo hari nan lampau, maso sabalun nangko, lah ambo cubo maimbau jo malewakan, satantangan acara Bagurau Samalam Suntuak pado tanggal 24 Juni 2006. Baa to nyo kini nangko, hari lah lalu, nan acara alah basudah, tantu utang diambo mambaritokan. Alhamdulillah acara lai bajalan sasuai jo nan dimukasuk, kok nan datang iyo lai pulo rami, rasono lai langkok, dari nan ketek sampai nan gadang, nan tuo maupun nan mudo, laki-2 jo padusi, langkok samparono kasadono, sananglah hati dibuekno, sajuak pulo dalam kiro-2. Limbak nan dari pado itu, karano manusia basipaik khilaf Allah juo na Qodhim Ateh namo sipangka, ambo susun jari nan sapuluah, ambo takuakkan kapalo nan satu, lutuik nan duo ambo hujamkan, salam jo sambah ambo sampaikan, kapado panghulu pamangku adat, nan manjunjuang sako alam adat, Bila maulana jo tuanku, sarato imam dengan katik, cadiak pandai palito alam, nan mudo pandindiang dunia, bundo kanduang samo di dalam, didalam sambah jo salam ambo juo, Karano mancaliak rami nan datang, mamandang tamu nan tibo, nyampang tasuo di nan indak, batamu pulo di nan bukan, ko tibo indak ta sapo, tasapo lai indak tabasoi, tabasoi lai indak tabaok duduak, kok duduak lai bana tabaok duduk tapi duduak indak pado tampaikno, jan disabuk makan jo minum, tantu lah banyak kakurangannyo, rilah jo maaf ambo puhunkan, baa ko baitu, karano lamo lupo nan datang, di nan rami ragu kok tibo, pulang maklum tantang itu Sakitu nan datang dari ambo Wassalamu'alaykum w.w. Bandaro Labiah
Send instant messages to your online friends http://uk.messenger.yahoo.com -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================