Dunsanak ysh,
Alhamdulillah pada tanggal 23 November 2006 yang lalu, kami dari KAN Sulit
Air telah melangsungkan peradilan perdamaian adat, setelah sekurangnya seabad
peradilan adat ini hilang dari bumi Minangkabau. Kebetulan kasus pertama yang
disidangkan adalah masalah tanah ulayat, mudah-mudahan hal ini dapat menjadi
pertimbangan yurisprudensi dalam penyelesaian permasalahan yang sama di tempat
lain. Petikan keputusan sidang saya sampaikan di sini, dengan catatan:
nama-nama yang terkait dalam perkara telah saya ubah seperlunya.
Konsep keputusan ini telah disiapkan oleh Datuk Gampo Sinaro, seorang
cendekiawan adat yang sangat saya hargai, mengingat beliau masih berusia muda
(42 tahun) dan hanya berpendidikan sekolah menengah.
Demikian disampaikan, dengan niatan sebagai pengetahuan kita bersama.
Wassalam,
-datuk endang
PETIKAN KEPUTUSAN PERADILAN PERDAMAIAN ADAT NAGARI SULIT AIR
No. 001/PA/KAN-SA/XI-2006
Untuak kaadilan nan badasarkan
Adat basandi Syarak, Syarak basandi Kitabullah
Lembaga Kerapatan Adat Nagari (KAN) Kanagarian Sulit Air dalam hal iko
Bidang Peradilan Adat Nagari, badasarkan panugasan untuak mengadili dan
memutuskan melalui Sidang Majelis Peradilan Perdamaian Adat Nagari melalui
surek No. 009/KAN-SA/VIII-2006 tertanggal 29 Agustus 2006 dan bapidoman pado
Keputusan KAN No. 196/KAN-SA/XII-2001, Keputusan KAN No. 01/KAN-SA/XII-2005,
sarato Perda Kabupaten Solok No. 8 Tahun 2004, Pasal 94, ayat A, C, dan E
tentang Peradilan Adat Nagari, alah mamareso pakaro sangketo Tanah Pusako
Tinggi (Pangka Tuo), nan basangketo antaro :
1. Namo : a. BUDI, laki-laki, umur: 40 tahun
b. ANDI, laki-laki, umur: 37 tahun
c. SITI, padusi, umur: 35 tahun
d. TUTI, padusi, umur: 32 tahun
e. DODI, laki-laki, umur: 25 tahun
Suku : Limo Panjang, Rumah Duo Puluah, di bawah payuang panji Datuk
Tan Maruhun.
Alamat : Tangah Sawah, Jorong Gando, Nagari Sulit Air, Kabupaten Solok.
dengan
2. Namo : RAMDAN, laki-laki, umur: 59 tahun
Suku : Limo Panjang, Rumah Duo Puluah, di bawah payuang panji Datuk
Tan Maruhun.
Alamat : Tangah Sawah, Jorong Gando, Nagari Sulit Air, Kabupaten Solok.
Sangketo nan tajadi antaro mamak jo kamanakan dengan obyek sangketo adolah
tanah ulayat kaum Datuk Tan Maruhun barupo salupak sawah (pangka tuo) nan
talatak di Jorong Silungkang (Baliak Parik) di mungko Puskesmas Nagari Sulit
Air, Kabupaten Solok, Provinsi Sumatera Barat.
RIWAYAT MASALAH
Pado tahun 1965 M, balangsuang pernikahan antaro: Zainab, suku: Limo Panjang
Rumah Duo Puluah, anak kamanakan Datuk Tan Maruhun jo Rahmat Sutan Batuah,
suku: Simabur Katianyie Goba, anak kamanakan Datuk Parhimpunan. Sasuai jo
tuntutan adat lamo pusako usang alah baisi adat, batuang limbago, nan
disababkan dek basawuahnyo ameh nan satangah tigo ameh jo nan sapuluah ameh.
Mako nak sakali mambukak puro duo tigo utang lapeh, sakali marangkuah dayuang
duo tigo pulau talampau, karano ka ateh alah ta-ambun jantan, ka bawah lah
takasiek bulan, bulieh takuruang nak takunci, tapawi nak balantak, sarato
ganggam nak ba-untuak, hiduik nak bapangadok, mako diberilah kuaso kapado
kamanakan jo urang sumando untuak menggunakan salupak tanah ulayat sabagai
sawah pangka tuo, nan talatak di Baliak Parik, Jorong Silungkang Nagari Sulit
Air yaitu tambilang basi dari Kaum rumah gadang Duo Puluah, di bawah payuang
panji Datuk Tan Maruhun. Dan salamo itu pulo pasangan Zainab jo Rahmat Sutan
Batuah manguasai sarato berhak maambiak hasil sawah pangka tuo, dan mambuek
sawah.
Akan tetapi, sakitar tahun 2005 tatagak sajo heller (mesin pemroses padi) di
ateh sawah pangka tuo nan tasabuik di ateh. Indak dikatahui, dari mano heller
tasabuik datangnyo dan sia nan punyo. Masuaknyo indak sarato tahu. Akan tatapi,
sasudah ditalusuri, tanyato Heller ado nan bapunyo, yaitu nan banamo Barmawi
(Mawi Garam), suku Limo Panjang Gantiang, anak kamanakan Datuk Rajo Mansyur,
nan mandapek izin dari Ramdan, suku Limo Panjang, anak kamanakan Datuk Tan
Maruhun.
Berdasarkan ranji silsilah anak kamanakan Tangah Sawah suku Limo Panjang
Rumah Duo Puluah di bawah payuang panji Datuk Tan Maruhun, Ramdan adolah
sabagai Mamak nan Tuo dalam kaum Tangah Sawah. Walaupun baitu, izin diberikan
indak mambaok kato baiyoh rundiang bamufakat jo anak-kamanakan pihak nan
manguasoi harato pusako tinggi sabagai pangka tuo dari almarhumah mande
kanduang dari mereka (Budi, Andi, Siti, Tuti, dan Dodi). Karano itu alah
disampaikan gugatan bajanjang naiak, nan mintak disalasaikan melalui Datuk
Andiko (Dt. Tan Maruhun) manuruik adat nan bajawek, pusako nan batarimo, dan
disinan limbago nan ka batolong. Salanjuiknyo karono kato indak dapek putuih,
mangko dibaok ka parundiangan saniniak hinggo parundiangan suku Limo Panjang,
dan hasianyo baitu pulo. Kini nangko alah disarahkan kapado Kerapatan Adat
Nagari (KAN) Sulit Air untuak dimintakkan putusan peradilan perdamaian adat nan
saadil-adilnyo.
Majelis Hakim melalui Pengurus KAN Sulit Air alah mengundang masiang-masiang
pihak baiak sucaro tertulis maupun lisan untuak manyalasaikan permasalahan iko
di dalam sidang Peradilan Perdamaian Adat, nan diadokan pado hari iko Kamis 23
November 2006, nan dimulai di Balairungsari untuak salanjuiknyo dilanjuikkan di
Kantor KAN Sulit Air.
Dalam persidangan, Majelis Hakim alah mandanga dan mamintak penjelasan dan
keterangan dari masiang-masiang pihak, barikuik saksi-saksi nan dihadirkan.
Dalam persidangan alah disampaikan pulo bukti-bukti tertulis sarato tanggapan
dan komentar dari berbagai penjelasan dan keterangan sucaro timbal-balik.
Kesimpulan sarato pertimbangan Majelis Hakim disampaikan sabalun keputusan
ditetapkan, nan di antaronyo adalah hal-hal sebagai berikut:
MANGANAH!.
Sapanjang adat nan balaku di Nagari Sulit Air, nan bagala cumeti Koto
Piliang dari dahulu sampai kini nangko, lai tacuriang di batu, tiang di awak
nan ka mamakaikan. Bahwa dalam masyarakat Minangkabau pado umumnyo, Sulit Air
khususnyo, adat jawek-bajawek, pusako tarimo-batarimo, limbago
tolong-batolong, baitu juo dalam hal harato pusako randah, pusako tinggi,
maupun tanah ulayat pada umumnyo. Harato pusako tinggi itu adolah milik kaum
dalam sabuah payuang panji Panghulu (Datuk) Andiko. Harato pusako tamasuak
pusako tinggi diatur penggunaannyo oleh Penghulu Andiko salaku Mamak Kapalo
Warih untuak kesejahteraan Kaum yang bersangkutan. Penggunaannyo dapek
dikuasokan kapado kamanakan nan padusi (perempuan) sebagai panjawek pusako di
rumah nan gadang.
Mamak nan Tuo sarato Mamak Tunganiang dapek dilimpahkan kuaso oleh Penghulu
Andiko untuak membantu manjago sarato mangawasi agar tidak tajadi jalan diasak
urang lalu, cupak dipapek rang manggaleh atau diganggu gugat dek anak kamanakan
nan lain. Sabab, alah jaleh sasok jarami, padan pakuburan masiang-masiang
pihak, banabu-nabu bak cubadak, baruang-ruang bak durian di dalam Kaum yang
disababkan dek karano ganggam alah bauntuak, hiduik diagieh pangadok. Sarato
disikolah Mamak nan Tuo nan harus tahu akan sawah bapamatang, parak babintalak
di dalam Kaum nan sapayuang-sapatagak di rumah gadang. Sarato, sasuai jo pituah
adat kamanakan barajo ka mamak, mamak barajo ka panghulu, panghulu barajo ka
aluah jo patuik, aluah jo patuik barajo ka nan bana, dan nan bana badiri
sandirinyo.
MANIMBANG!
Pangka Tuo adolah harato pusako tinggi nan dikuasokan Mamak Kapalo Warih
melalui Ninik Mamak dan disapakati dek Kaum, sabagai ulu budi, talago undang
kapado kamanakan padusi nan alah barumah tanggo sabagai ganggam nak ba-untuak,
hiduik nak bapangadok. Baitu juo Pangka Tuo nan dikuasokan pado Zainab dan
Rahmat Sutan Batuah pado bulan April 1965. Berdasarkan katerangan Mamak nan Tuo
nan banamo: H. Mudin (almarhum) jo surek nan dibuek pado tanggal 25 Maret 1989
nan manarangkan bahwa pambagian Harato Pusako Tinggi bagi anak kamanakan jo
urang sumando almarhum antaro Zubaidah-Darmawis talatak di Kampuang Tangah
yaitu babantuak sawah dan kolom ikan dan untuak Pangka Tuo Zainab-Rahmat Sutan
Batuah, yaitu babantuak sawah talatak di Baliak Parik sarato kolom ikan di
Kampuang Tangah, untuak baduo antaro Zubaidah dan Zainab, nan diketahui dek
surang kamanakan banamo: Abdul pado maso itu, dan Abdul kini alah almarhum.
Dan, badasarkan katerangan saksi hidup nan ditulis di ateh karateh bamaterai
pado tanggal 19 Januari 2006 yaitu nan banamo: Suarni, umur 80 tahun, suku Limo
Panjang, jabatan Bundo Kanduang Rumah Duo Puluah di bawah payuang panji Datuk
Tan Maruhun. Manarangkan bahwa, pado saat Zainab dan Rahmat Sutan Batuah
malaksanakan baralek pado bulan April 1965, beliaulah nan manjujuang bungo
sirieh kutiko bararak ka Simabuah Katianyie sarato baliau manyaksikan pulo
acaro adat Ma-agieh Pangka Tuo di Tangah Sawah, Jorong Gando, Nagari Sulit
Air.
Dari siko jaleh bahwasanyo permasalahan sangketo harato pusako tinggi nan
manyababkan ranggangnyo hubungan silaturrahmi antaro Mamak jo Kamanakan dan
bahkan manjadikan sangketo nan alun bakasudahan. Untuak dan oleh karano itu,
paralu kironyo para Panghulu atau Wakil Panghulu di nagari mambuekkan ranji
tantang harato pusako tinggi, sebagai wujud sawah bapamatang, parak bapagah,
rimbo bajaliwuong nan babantuak pusako randah, pusako tinggi, maupun tanah
ulayat kaum masiang-masiang Panghulu Andiko dalam satiok Kaum dan Suku. Supayo
dapek dicari ulu jo muaronyo silang sangketo nan tumbuah dalam adat. Bulieh nan
taganak dapek dibandahkan, nan mahilieh nak jaleh muaronyo.
Dan, andaikan tajadi kasalahpahaman tantang Pusako Tinggi dalam bantuak
apopun juo, mako surang Panghulu Andiko atau Wakil Panghulu dapek mancari jalan
kaluah (solusi) dalam rangka, urang nan mahukum adieh, bakato bana, bayiek itu
sacaro individual dalam kaum, maupun dalam nan sa-Datuak Niniak, sampai ka
dalam Suku sakalipun. Sabab dalam adat, surang Panghulu Andiko-lah nan akan
manyampaikan barih jo balabeh pado Kaum nan basalisieh paham. Karano, disikolah
lataknyo urang nan ka mahawai sahabih raso, marosok sahabih gawuoang sarato
pucuaknyo nan cewang ka langik, ureknyo nan cungkam ka bumi. Sarato, disikolah
liang katabuak, gantiang kaputuih.
Namun, sangketo tanah pusako tinggi nan tajadi, dalam hal iko pangka tuo
antaro Mamak jo Kamanakan dalam kaum rumah gadang Duo Puluah, di bawah payuang
panji Datuk Tan Maruhun, alah dibaok kato baiyoh, rundiang mufakat dalam Kaum
karono kusuik tak kunjuang salasai, karuah tak namuah janieh dan alah batampuah
pulo bajanjang naiak batanggo turun ka Datuak Niniak Urang Sambilan (Datuk
Malakewi), sarato ka dalam pasukuan Limo Panjang. Akan tetapi, sampai disiko
liang indak juo tabuak, gantiang indak juo putui sarato panjang nan indak
baujuang, lebah nan indak batapi. Kini, biang katabuak, gantiang kaputui,
sasudah lurah alah ditajuni, bukik lah didaki dek Pengurus Kerapatan Adat
Nagari Sulit Air, sabagai lembaga tertinggi adat dalam Kanagarian Sulit Air,
dalam Sidang Majelis Peradilan Perdamaian Adat Nagari, pado hari kini nangko!.
MAMUTUIKAN:
1. Bahwa, Harato Pusako Tinggi nan babantuak salupak sawah atau tanah
nan talatak di Baliak Parik, Jorong Silungkang, Nagari Suliak Ayieh, Kabupaten
Solok, Provinsi Sumatera Barat, adolah milik Suku Limo Panjang, Kaum Rumah
Gadang Duo Puluah di bawah payuang panji Datuk Tan Maruhun. Akan tetapi,
ganggam alah ba-untuak, hiduik alah diagiah ba-pangadok, sasuai jo banabu-nabu
bak cubadak, baruang-ruang bak durian di dalam Kaum.
2. Bahwa, Ramdan sebagai Mamak nan Tuo, berkewajiban untuak manjago
sarato marawat sawah nan tasabuik di ateh dari hal-hal nan marugihkan
kepentingan anak kamanakan. Dan, ia tidaklah berhak untuak maambiek hasil dari
sawah tasabuik dengan alasan apopun juo. Sabab, harato pusako di Minangkabau
adolah milik suatu Kaum nan diatur penggunaannyo oleh Mamak Kapalo Warih, di
antaranyo dikuasokan pemanfaatannyo kepado anak kamanakan padusi nan ka
manjawek pusako di rumah gadang, nan disabuik: harato pangka tuo. Dan, adat
Minangkabau indak mangenal istilah: punah!, kalaulah indak
basijari-basitompok, indaklah basapinjik-basaganggam, baitu adat nan bajawek
sarato pusako nan batarimo.
3. Bahwa, satalah urusan iko diserahkan oleh masiang-masiang pihak
kapado Majelis Hakim untuak dicarikan ayia nan janiah sayak nan landai, Majelis
Hakim berketetapan untuak menentukan hak penguasaan pangka tuo dari
(almarhumah) Zainab kapado anak-anaknyo sandiri, yaitu Siti dan Tuti. Salain
itu, anaknyo nan laki-laki yakni Budi, Andi dan Dodi hanyolah sabagai mamak nan
bakawajiban untuak manjago sarato mamaliharo pusako tinggi nan alah manjadi hak
dunsanak sarato kamanakannyo.
4. Lembaga Kerapatan Adat Nagari cq Bidang Peradilan Adat
ma-instruksikan kapado Niniak Mamak atau Panghulu Andiko Rumah Duo Puluah
(Datuk Tan Maruhun) untuak malaksanakan acaro adat maisih Pangka Tuo, bagi
anak kamanakan-nyo yaitu Siti dan Tuti, sasuai jo pituah adat ganggam
bauntuak, hiduik bapangadok.
5. Lembaga Kerapatan Adat Nagari (KAN) Nagari Sulit Air ma-instruksikan
pado Barmawi (Mawi Garam) untuak mamindahkan masin heller nan talatak di ateh
sawah pangka tuo itu nan talatak di Baliak Parik Jorong Silungkang, kacuali ado
kasapakatan jo Siti dan Tuti salaku panarimo pusako manuruik adat nan bajawek
pusako nan batarimo di Nagari Sulit Air, dan alah pulo melalui persetujuan
datuk andikonyo (Datuk Tan Maruhun).
6. Siti jo Tuti dibabankan mambayieh biaya Peradilan Perdamaian Adat
Nagari, nan barupo:
a. Mambayieh Honor Hakim Majelis Peradilan Perdamaian Adat @ Rp 50 000, Rp
150 000
b. Mambayieh Biaya Administrasi Peradilan Adat Rp 100 000
c. Mambayieh Biaya Administrasi KAN Rp 25 000.
________________________________
Jumlah Rp 275 000 (Duo Ratui Tujuah Puluah Limo Ribu Rupiah)
Baitulah kaputusan Peradilan Perdamaian Adat Nagari, Kanagarian Sulit Air nan
dilakukan dalam suatu Persidangan, oleh Majelis Hakim Peradilan Perdamaian Adat
Nagari nan tadiri dari 3 (tigo) urang Majelis Hakim: Datuk Endang Pahlawan
sabagai Katua Majelis dan Datuk Gampo Sinaro sarato Datuk Pado Gomuok
masiang-masiang sabagai Anggota Majelis Hakim Peradilan Perdamaian Adat Nagari,
sasuai nan ditunjuak oleh Ketua Kerapatan Adat Nagari (KAN) sasuai jo Surek
Kaputusan No: 009/KAN-SA/VIII-2006, tertanggal 29 Agustus 2006.
Sidang Majelis Peradilan Perdamaian Adat Nagari dilakukan di ateh Balairuang
Sari, atau nan populer dalam pituah adat sabagai Medan nan Balinduang, sarato
dalam kawasan Medan nan Bapapaneh, Nagari Sulit Air, pado hari Kamis tanggal 23
Nopember 2006, dan alah dinyatokan tabukak untuak umum.
Majelis Hakim Peradilan Perdamaian Adat
T t d
Datuk Endang Pahlawan
Ketua Majelis
T t d
Datuk Gampo Sinaro
Anggota Majelis
T t d
Datuk Pado Gomuok
Anggota Majelis
Mengetahui,
Lembaga Kerapatan Adat Nagari (KAN) Sulit Air
T t d
Datuk Tumangguang
Ketua Umum
---------------------------------
Food fight? Enjoy some healthy debate
in the Yahoo! Answers Food & Drink Q&A.
============================================================
Sukseskan Pulang Basamo se Dunia, Juni 2008.
------------------------------------------------------------
Website: http://www.rantaunet.org
============================================================
UNTUK SELALU DIPERHATIKAN:
- Hapus footer dan bagian yang tidak perlu, jika melakukan reply.
- Email dengan attachment tidak dianjurkan, sebaiknya melalui jalur pribadi.
- Posting email, DITOLAK atau DIMODERASI oleh system, jika:
1. Email ukuran besar dari >300KB.
2. Email dikirim untuk banyak penerima.
--------------------------------------------------------------
* Berhenti (unsubscribe), berhenti sementara (nomail) dan konfigurasi
keanggotaan, silahkan ke: http://rantaunet.org/palanta-config
* Membaca dan Posting email lewat web, bisa melalui mirror mailing list di:
http://groups.yahoo.com/group/RantauNet/messages
http://groups.google.com/group/RantauNet?gvc=2
dengan mendaftarkan juga email anda disini dan kedua mirror diatas.
============================================================