Jumat, 29 May 2009 Politik Garugah-Pugah Kadang-kadang, politik samo jo karatu joker dalam main remi. Inyo bisa masuak ka karatu apo sajo.
Dalam barita surek kaba 'Singgalang' kapatang, jilbab juo dijadikan masalah dalam politik. Itu pulolah nan dijadikan bahan ota dek komunitas lapau Uwo Pulin. "Ikolah mode politik di nagari awak. Kasadonyo se jadi masalah dan dipolitisir. Barangkali sabanta lai, takantuik juo bisa dipolitisir. Umpamonyo anak calon presiden Anu pangantuik. Atau calon presiden itu kantuiknyo busuak. Ambo iyo kurang katuju jo caro-caro sarupo iko," kato Kudun. "Baa tu?" Tanyo Mak Pono. "Pokoknyo ambo indak katuju dan alasannyo bialah ado dalam kapalo ambo surang. Nan jaleh, iko bantuak induak-induak bacakak. Ado-ado se nan ka dijadikan gunjiangan untuak lawan. Barangkali awak-awak ko banyak nan pernah mancaliak induak-induak bacakak. Mulai dari A sampai Z dijadikan bahan gunjiangan nan intinyo mampaburuak lawan," jawek Kudun. "Tapi, kan jilbab tu bukti dari urang tu lai taat atau indak," kato Pak Osu. "Tiori dari ma pulo dapek dek Pak Osu nan sarupo itu? Indak ado jaminan bahaso jilbab adolah bukti urang tu taat atau indaknyo. Taat tu datangnyo dari hati nurani dan niaik. Walau indak pakai jilbab, tapi kalau hati nan niaiknyo barasiah, iklas, iko labiah rancak dan labiah tahormat daripado pakai jilbab, tapi parangai jo kurenahnyo cingkahak. Banyak urang nan indak bajilbab, tapi taat baibadah dan sabaliaknyo, awak indak pulo buliah mamiciangkan mato, ado urang bajilbab, tapi hatinyo busuak. Jilbab dek urang sarupo itu indak labiah dari pakaian dan mode," baleh Kudun. "Di India banyak lo padusi nan batutuik kapalonyo mah," sorong Tacin. "Nah, itu buktinyo. Apo tutuik kapalo urang India tu bisa awak jadikan jaminan inyo taat? Jadi, ambo mancaliak politisi awak ko lah banyak nan sasek aie. Ado-ado se nan dijadikan masalah. Tu mah kini lah bantuak parang buruak-mamburuak-an nampak di dalam tipi," sambuang Kudun. "Itu namonyo badan gadang, tapi utak dan caro bapikia masih ketek. Awak mangaku juo demokrasi, tapi mamburuak-buruak-an kawan, mambukak kada jo tukak lawan. Apo salahnyo calon-calon pamimpin sarato timnyo mangecek masalah-masalah negara untuak mancari solusi dari masalah tu. Kan negara awak ko sajak dulu banyak masalahnyo? Ko indak, nan indak masalah dijadikan masalah. Nan masalah bana, dianggap indak ado apo-apo," kato Tan Baro nan dari tadi hanyo mandanga sajo ota kawan-kawannyo. "Itu namonyo politik garugah-pugah mah, Tan! Kok tibo main bola caro kampuang ambo saisuak, namonyo main patang. Kalau lah bantuak itu, indak bola nan disimbek lai, tapi tulang kariang lawan. Kalau paralu main dongkak tarajang gai," potong Kari Garejoh. "Yo, di kampuang ambo iyo bantuak itu lo mah. Kadang-kadang indak bola lai nan dikaja, tapi batih lawan. Disipak dari balakang, tasidudu dan jatuah. Kalau lah jatuah, dipijak bana. Ikolah mode politik anak-anak nampaknyo," kato Mak Pono pulo. "Itu makonyo nagari ko bantuak oto mogok dalam lunau. Masinnyo lai iduik. Malah, suaronyo labiah kareh dari nan sabananyo, tapi hanyo di sinan-sinan sajo. Indak barinsuik. Nah, kalau bantuak iko se taruih, bilo ka bisa bantuak nagari urang? Awak mangaku juo hebat, tapi......., ah, sudahlah," kato Malin Kacindin pulo. (Espe St.Soeleman) http://www.hariansinggalang.co.id/index.php?mod=detail_berita.php&id=1813 --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
