Assalamualaikum Wr.wb......Inyiak H.J.Malako Nan Putiah..............! Saujuk sambah dengan simpuah, ibarat bungka nan piawai naraco luruih main daun, indak basibak jo basisiah indak babateh jo bahinggo, Sungguahpun inyiak surang nan tasabuikkan namo tahimbaukan gala talewakan tuah, dilayienyo inyiak nan ba imbau, bathin ma hadok ka nan rapek rundiang talewa ka nan banyak sambah jatuah ka palanta......Sambah kapado niniak mamak nan gadang basa batuah, nan bapucuak bulek ba urek tunggang, kapai tampek batanyo kapulang tampek babarito. Nan bak umpamo kayu gadang ditangah koto, ba urek limbago matan badahan cupak jo gantang barantiang barih jo balabeh, babungo rimbun jo adat, badaun mungkin jo patuik, babuah kato nan bana. buliah baselo di ureknyo dapek basanda di batangnyo gantungan cupak nan duo, partamu cupak usali, kaduo cupak buatan..................................................! Sambah kapado hulubalang jo panglimo sarato manti pagawai adat, parik dalam pagaran kokoh, sandi andiko dalam kampuang, tampuk jo tangkai dalam nagari, urang nan arief bijaksano, tau dikieh kato bayang, takilek ikan dalam ayie, ikan takilek jalo tibo lah tantu jantan batinonyo, santan dirumah lah barameh...........................! Salam jo sambah kapado baliau, Bila maulana jo tuangku, sarato imam dengan khatib, urang nan cadiak tau jo pandai, palito nyalo maso di dunia bendangnyo sampai ka akhirat, urang nan tau di halal dengan haram sarato sah dengan bathil, tagaknyo rintang bapituah duduaknyo gilo bacamin kitab......................! Taruih kapado.......Nan mudo salendang dunia, nan capek kaki ringan tangan, capek kaki indak panaruang, ringan tangan indak pamacah, aso tarantang duo sudah, bahati suci bamuko janiah, nan tau di malu dengan sopan sarato raso jo pareso.............................! Taruih salam jo sambah kapado........... Bundo kanduang.......Limpapeh rumah nan gadang, sumarak anjuang paranginan, pamenan dalam kampuang, hiasan dalam nagari, kok iduik tampek baniat, kok mati tampek banaza,ka unduang unduang ka madinah ka payuang panji ka sarugo, amban puruak aluang bunian urang nan duduak jo sukatan, Nan bak rangkiang si bayau bayau, hauih ka tampek mintak minum, lapa ka tampek mintak nasi..........................................! Ujuik kato buah rundingan sakironyo paham dikahandaki, bahubuang jo maso nan ditampuah, maliek diateh rupo basiang ateh nan tumbuah, tumbuah sarupo iko kini, syariat ado ba hakikat,lahie kulik manganduang isi, dilua nan tampak nyato didalam kandungan ilimu............Jikok dipiliah jo ikhtiar jikok aka dijalankan, jo tanang budi marangkak, ka ateh nyato ta ambun jantan, kabawah jaleh takasiek bulan.. sampai tabagi dek ulimu, lahia manjadi buah ama. Dek enggeran soko nan tatagak, malinteh di ujuang padang, basilek dipangka karih, kato salalu ba umpamo, rundiang nan banyak bakiasan..........................! Mandanga rundiang dari inyiak, gumanta rasonyo badan tapacak paluah di kaniang, bakaja darah ka muko sababkan baa dekbaitu....................! Adok ka badan diri nangko, nan bak umpamo biduak kaciak baru kasudah, kalangkapan balunlah cukuik, balayie manapi napi, katangah takuik dek galombang, ka taluak ngari dek buayo, pulau di tangah nan bacito................................Nyato badan kamari tangguang nan bak umpamo ampulua kayu, ka papan lebanyo tangguang, katunggak rapuah pulo, antah ka jadi sibiran sajo
Tapi........... di elo dek cinto hati Di doroang dek kandak bana Tandonyo cinto ka nagari Dicubo cubo baraja Sabanyak bareh di gantang Dicubo cubo batanak Kok indak bana dunsanak ka kanyang Kok lai pa ubek litak Takana pitaruah inyiak juo.......... Dima bumi dipijak Disinan langik di jujuang Tapi bukan alasan nan bijak Untuak kito lupo jo kampuang Karano.................. Adat dek kito bakundang pai Kok sara' lakek di tubuah Walau ka tingga di lua bumi Dipakai bapantang lusuah Bakarih si kati muno Patah alah basimpai alun Ratak sabuah jadi tuah Jikok dicaliak pusako lamo Dibangkik tareh nan talamun Lah banyak ragi nan barubah Mako taniat di dalam hati Tacito didalam kiro kiro Mangambangkan seni anak nagari Malestarikan budaya kito Di cubo cubo baraja Sambia manunggu guru tibo Walau badan larek di jawa Nan Minangkabau bacarai tido Calak calak kaganti asah Sambia mananti tulkang tibo Di ansua ansua manarah Isuak kok tingga mangatam sajo Baa toh hanyo lai, satantangan apo nan alah inyiak sampaikan di palanta................... Diambotu kini.......... Nak ayie pincuran tabik Nak ulam pucuak manjulai Sumua digali ayia datang Sasuai garak jo garik Di ama pacah mukasuik sampai Indak tabado hati sanang Kok indak tabuek jo tapak tangan Tantu jo niru ka panampuang Satitiek nak dilauikkan Sakapa dijadikan gunuang Maklumlah inyiak tantang itu, nasib umpamo diri kami........... Nan bak manetek niro pinang, antah barayia antah indak, nan bak alu patah batimpo musim pabilo ka bataruak...... Umpamo padi salibu, awak tumbuh musim talampau, urek bagantuang ka jarami, rangkiang tinggi nan bahadang....... Tapi mandanga rundiang dari inyiak, sajuak rasonyo dalam hati sanang rasonyo kiro kiro.................... Sampaikan lah dek inyiak dari sinan, nak kami amiiinkan dari siko, dimukolah inyiak bajalan kami ma iriang dibalakang alah kasanang hati inyiak, sakian sajo rundiang disampaikan baa pangana dek nan basamo..........................?? Salam panutuik dari ambo, bak kato inyiak juo............ maklaumlah kito dirantauko, dek sulik balega di nan sampik, sarik manuka di nan indak, mako dalam silaturrahmi awak dipalantako, tantu mungkin ka basuo sumbang salah sasek jo gawanyo, ibarat datang kok indak tapabasokan, tibo kok indak tamuliakan, patuik ditangah ta ka tapikan, patik di hulu ta ka hiliakan, ipa bisan ta parampiangkan atau email kok indak ta jawek, pasan kok alun batarimo tantunyo yo hati sajo dipalapang maklum sajo dipabanyak....... Cupak panuah gantang balanjuang Nyampang basuo saliter indak Usah salahkan sarueh batuang Kami manggantang nan kurang bijak. Kalilawa dipulau rimbang Anak ruso mati tadabiah Kok gawa toloang ditimbang Kok doso ampunkan labiah Atai atai sibungo atai Ka duo bungo si tawa Walau tacacah jangguik ka lantai Nan manusiabasifat gawa Talantuang ka naiak, tasingguang ka turun, rela jo maaf dunsanak barikan.....Wass. Yanto Jambak 03072009. (Yan Majo Basa) --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---