Selembar Kenangan 5 Bulan Puaso
By : Rina Permadi Iiiiiiiiiiiiiiiiiiittt...... Basorak konco palangkin Si Upiak si paja ngenek tu maimbau kawan mangajinyo tu. Si Upiak yang kanai imbau lansuang mairik an tilakuang Amaknyo ka dakek tunggak Musajik nan saparo jadi tu. "Mak Amak sumbayang dakek Buk Tini tu dih Mak, buliah Upiak bisa dakek jo Si Neli tu, kan di dakek tunggak tu indak ado Amak-Amak nan bisa duduak sinan doh, kami sen nan bisa noh,' kecek si Upiak ka Amak no. Nan Amak no ko manuruik se ka si Upiak ko. Walaupun no masih kaciak-kaciak tapi bialah no baduo ditangah shaf ko, buliah lai indak putuih shaf dek tunggak nan tagak di tangah tun,' batin Amak si Upiak. Memang tiang musajik ko indak mahalangi bana shaft barisan partamo ko doh, tapi kok tibo marukuak, tibo di urang gadang akan tasundak sudah tu bisa tasungkua ka muko. Jadilah tunggak tun dicarter si Upiak jo kawannyo baduo untuak tarawiah salamo puaso tu. Sangkek tu si Upiak masih kaciak baruh, masih kalaih 3 esde, dek samo-samo kiluih jo kawan no ko, alah cocok sen no disinantu duduak. Dek dikaliliangi Amak-Amak sudah tu talatak lo di shaft partamo si Upiak jo kawan no ko indak barani batingkah doh, sadonyo ikuik walaupun kadang takalok-kalok. Sasudah Tarawiah lah sibuk lo mamintak tando tangan Ustadz nan maagiah ceramah di buku bulletin puaso masiang-masiang. Apak Upiak adolah ketua musajik sekaligus ketua pembangunan musajik nan sadang direhab dari Surau ketek manjadi Musajik nan batingkek nan banamo Mesjid Baburrahmah. Talatak di tapi labuah sasudah panurunan dari Bukik Ambacang Bukiktinggi. Apak nio Musajik ko jadi Musajik nan manjadi gerbang Bukiktinggi dari arah Medan, dek jalan tu dilalui dek oto-oto nan kalua masuak kota Medan. Salain dari itu Apak juo disiplin jo panyusunan saf sumbayang, harus rapek juo ndak buliah putuih. Salain itu Apak paliang berang kalo sadang sumbayang ado anak-anak nan balarian mahiruak mamakak. Pernah kanai gantiak talingo anak urang nan mamakak dek Apak, sambia berang Apak kecek ka inyo, Ang maju atau Abak ang? Adokkan ka den,' kecek Apak. Sadonyo jama'ah mandanga berang Apak tu, bisuaknyo indak ado taranga nan mamakak lai doh. Sahinggo Musajik tu terkenal jo nyamannyo sumbayang disinan tu, dek indak ado nan talok mahiruak dek takuik jo Apak, sadangkan nan urang gaeknyo sagan jo Apak. Pernah suatu katiko di lua bulan Puaso Si Upiak dapek giliran jadi pambaok acara pangajian sasudah Sumbayang Isya, dek sakiang nervousnyo Pak Ustadz nan banamo Pak Djohar tapi biaso dipanggia Pak Canduang tu disabuiknyo jo Pak Candung hehe..Baso Minang nan diindonesiakannyo surang. Urang bi galak sadonyo.. Piak..Piak..kato surang Ibuk2 kawan Amak, sabuik selah Pak Djohar atau sabuik Pak Canduang bana, iko indak Pak Candung hehe.Susah Urang-urang Gaek katu tu manahan galak dek kurenah si Upiak. Padohal sabananyo si Upiak memang dek gagok bana ko, manggareteknyo disuruah jadi pambaok acara, biasonyo inyo disuruah mangaji pembukaan jadi mode tu jadinyo. Upiak kiluih ko kalo lah puaso tu banyak parangai no, walaupun parangai no lai nan elok-elok miang, mode hari tu no bakandak lauak talua puyuah balado jo ikan teri ka Amak no. Padohal ari baru pukua sangah duo baruh, Amak no bagai alun nak kamangaca pariuak bagai ka dapua ladoh. Akhirnyo si Upiak mamanjek batang jambu aia dimuko rumah no tu. Jambu sirah-sirah tu dimasuakkan ka dalam plastik asoy ketek nan diambiak no di dapua. Walaupun banyak samuiknyo, si Upiak lah tabiaso mamanjek batang kayu di sakuliliang rumahnyo tu, tarutamo Paraweh jo jambu aia ko. Amak acok berang kalo baju Upiak kumuah dek jambu nan bamasuakkan ka dalam saku baju, abih sirah dek rono jambu ko nan sirah pakek. Upiak mahir mamanjek batang kayu dek sangkek dulunyo acok dibaok Apak no ka Rimbo untuak mamanen cengkeh di kabun cengkeh nan di Bukik Barisan dakek kampuang nenek no. Lah manjalang sanjo Amak lah sibuk di dapua, Upiak sato mangacauan kuah lado nan dibuek Amak katu tu. Samba si Upiak sabana samba buruak-buruak sen noh. Iko menu pabukoan si Upiak : 1. Talua puyuah jo teri bakalincoan jo lado sirah batomat bapatai jo baparehan asam sundai salayang. 2. Talua itiak badadaran bacampua jo potongan tahu ketek-ketek, tapi ukatu manggiliang ladojo bawang no, Amak mamasuakkan nasi sasendok ka dalam giliangan tun, supayo kamek jo banyak kecek Amak..hehe. 3. Maco balah nan lumayan laweh duo ikua, digoreang kariang diagiah hiasan lado babalah jo bawang goreng. 4. Sayua bayam nan baru diambiak si Upiak di balakang rumah, batumih basaikkan tomaik masak ka dalam kuah no, tarapuang-rapuang bawang goreng no. Sllrrruuppp..hm... 5. Sambalado kuah untuak panyiram karupuak sirah nan laweh laweh bakawan jo karupuak magek. 6. Jambu aia, paraweh jo kalikih hasil dari pancarian si Upiak sakuliliang rumah no. 7. Ubek tawa nan babali di Jirek dakek Dokabu. Walaupun sederhana pabukoan di rumah si Upiak, tapi bamakan basamo jo talam gadang sabana cando itiak makan jadih no, sabana sero koha, indak talupoan. Hanyo sajo nan si Upiak tatap sajo kiluih-kiluih se hehe.. Sasudah tarawiah biasono salalu ado tadarusan rami-rami jo Ustadz sarato garin musajik. Sasudah tadarusan biasono kalo ado undangan Perlombaan maisi malam bulan puaso, sato pulolah si Upiak ko biasonyo batigo jo kawannyo maisi lomba cerdas-cermat anak-anak, mah inyo masih kiluih-kiluih baruh. Lumayan juo hadiahnyo, kalo indak pitih biasonyo buku tulih jo pituluik. Panguruih Musajik biasono maantaan pulang pai naiak Oto Kijang. Kalo alah sato mode tu Abang si Upiakpun sato lo, biasonyo disuruah Ustadz ikuik cerdas-cermat lo. Kawan-kawan nan lain ado nan sato hafalan Juz Amma, Pidato, Azan sampai pernah disuruah ikuik lomba pakaian muslim anak-anak. Si Upiakpun kanai suruah, tapi dek Upiak pamalu sangaik ko, indak namuah no doh. Padohal baju kuruangnyo rancak-rancak, indak ado urang lain nan mamakai sarupo Upiak pakai, dek dijaik Amak no surang. Kalo lah dakek ka Rirayo, biaso no Amak alah mulai manyiapkan bahan-bahan untuak mambuek kue. Amak indak pernah mambali kue rayo doh, dek Amak santiang mambuek kue. Kue Amak lamak-lamak sarato rancak-rancak bantuaknyo. Amak saisuak baraja di kursus Srikandi di dakek Pasa Bawah Bukik. Ado kodak kue Amak nan jadi juara ukatu ujian tarakhir kursus tu. Nampak di buku catatan gadang Amak nan alah lusuah tu, kodak Amak jo guru-gurunyo nan ado urang Bulandonyo. Dari buku itulah Amak salalu mancaliak kiro-kiro kue a nan kalamak dibuek dan tantunyo nan murah bahan no hehe.Kok talua ayam, itiak jo puyuah indak ka susah dek Amak doh. Dek Amak sadonyo taranak tu lai manjadi. Bahan lainnyo sarupo gulo, kacang, mentega lah dibaok an lo pulang dek Apak si Upiak, dek Apak lai dapek paket lebaran nan dibagi di kantua Apak. Biasono Upiak jo Amak mulai mambuek kue sasudah sumbayang subuah. Sasudah subuah sadono anak Amak disuruah mambaco al Qur'an walaupun mangantuak. Sasudah tun barulah kue dimulai dibuek Amak. Sudah no kuduh kalo lah manjalang tangah hari. Sambuah macan kue nan dibuek tapi sauwek tu sadang mode kue mentega jadinyo nan banyak adolah model-model kue tu nan dibuek bamacam bantuak. Amak indak suko mamakai cetakan semprit doh, jadinyo bahan kue ko bagiliang di ateh papan data sudah tu dicetak bantuak bintang, bungo ikan sagalo macam. Nan mambedakan rasonyo adolah hiasan diateh masiang-masing kue kariangko. Ado nan diagiah vla putiah trus lapis coklat. Ado nan pakai hiasan gulo warna warni merah hijau. Ado lo nan basaik-saik malingka-lingka rononyo jo coklat bagaluang. Si Upiak jo Abang no sibuk mahiasi kue nan dicetak Amak, barulah bapanggang di oven sampai raun-raun baun no. Persiapan Amak indak sajo mambuek kue ko doh, tapi juo mambuek baju untuak kami, anak-anak Amak. Sanang bana hati kalo Amak lah mambaok pai mambali kain untuak pambuek baju rayo, dek ukatu tulah Amak mambalian sipatu rayo. Tibo di rumah bapakai-pakai sapanjang rumah, balakak-lakak bunyinyo dek sipatu lokak. Amak salalu mambuekkan baju kuruang untuak rayo, baju kuruang yang Amak buek banyak modelnyo, sahinggo banyak tetangga nan kainginan mambuekkan baju jo Amak. Tapi Amak indak sempat mambuekkan doh, dek taranak Amak banyak salain Amak nio baibadah banyak di bulan puaso tu. Baju kuruang nan dibuek Amak modelnyo rancak, sarato rononyo tacelak apolai nan mamakai no juo anak Amak nan paliang manih (haha.jangan ada yang protes!!!!). Si Upiak indak bagai iri jo kawan-kawannyo nan dibalian baju rayo maha-maha dek urang tuonyo, manuruik Upiak baju nan dibuek Amak labiah manis inyo pakai daripado baju rayo kawan tu nan maha tapi indak cocok di badan mereka. Tapi walaupun mode tu Upiak indak pernah absen untuak ikuik pai manambang jo kawan-kawan samo gadangnyo. Tigo hari ka Rayo, kami disuruah Amak untuak mambarasiahkan rumah, mulai dari malap camin jo kaco jendela. Mancuci bungo-bungo plastik nan tapajang sahinggo bisa dirangkai ulang dek Amak jadi rancak jo saroman baru baliak. Teras dibasuah barasiah-barasiah sampai halaman dirapian rumpuik jo bungo nan tumbuah. Biasonyo duo bulan sabalun rayo Amak mulai mananam bungo nan banyak bungonyo saroman Dahlia nan aneka warnanyo, bungo cik ayam nan warna kuniang sarato inai randah nan bawarna merah pakek. Kok lai mujua kadang bungo ros Amak sadang banyak lo mangaluakan bungonyo. Kolam ketek nan dimuko rumahpun dikalukan aianyo jo ikannyo sasudah tu diganti jo aia sumua nan barasiah. Pas malamnyo sagalo nan dijamua alah kariang jo barasiah, Amak mulai mangaluakan lapiak permadani simpanan Amak nan sabana rancak. Lah malam hari lah kalatiahan sadonyo, tapi rumah lah cando urang nak kabaralek bantuaknyo, panuah warna-warni segar. Amakpun mulai mangaluakan kue-kue nan agak anguih sarato nan pacah-pacah untuak kami makan basamo sambia galak-galak. Duo hari ka Rayo Amak akan mambuek kue lain nan indak tangguang lo lamaknyo yaitu Ajik Banduang. Kue ko bawarna merah jambu batungkuih jo karateh minyak warna putiah, kue kolah nan paliang disukoi si Upiak. Mode ko kiro-kiro wujuiknyo ha : Bahan-bahan : 1. Katan dari sakilo sipulik 2. Gulo sangah kilo 3. Karambie diparudan ciek 4. Santan ciek karambie 5. Peren, panile jo garam 6. Karateh minyak putiah 7. Pawarna merah Caronyo : 1. Gulo dipacah jo santan, pawarna, peren, panile plus garam sampai manggalagak, masuakkan katan saketek saketek sambia diaduak. 2. Masukkan karambia baparudan aduak sampai samparono padu. 3. Potong karateh bantuak kotak-kotak trus ujuang-ujuangnyo dipotong-potong caia 4. Dinginkan sabanta adonan tadi, dibungkuih jo karateh minyak tadi jo caro sendok sasendok tuh dibungkuih jadi mode gulo-gulo gapuak nan ujuang karatehnyo barumbai-umbai. 5. Siap dihidangkan Ajik Banduang ko antah baa indak bisa lamo batahan di rumah Amak doh, sia nan mamakannyo biasonyo mintak dibungkuihan untuak baok pulang, kato urang biasonyo mamakan Ajik Banduang ko jarang nan lamak dek biasono alah mulai rasan dek inyo pakai santan jo karambia ko. Upiak pernah batanyo ka Amak baa mangko Ajik Banduang namonyo, baa dek indak Ajik Bukik, Padang atau Jakarta. Kecek Amak, iko namonyo alah dari Rang Gaek saisuak, jadi indak tau lo Amak baa mangko Ajik Banduang diagiah namo dek Rang Gaek sisuak tu. (Kalo pembaca ada yang tau, tolong di share ya!!!). Mambuek Ajik Banduang ko iyo sabana tapacua paluah si Upiak dek mangacauan aduak an nyo, sabana kampuah rasonyo badan, dek sasudah maaduak-aduak di dapua sudah tun tapuruak lo duduak lamo-lamo mambungkuihnyo, tapi hasilnyo memang lamak bana, kamek jo manihnyo pas bana. Basambuang dih.. penulisnyo kalatiahan hehe. ................................................. Oke wak sambuang liak. Sahari ka Rayo maso tu Amak alah basiap-siap nak ka pai ka pasa bawah untuak mambali lauak pauak jo langkok-langkok untuak pamakan bisuak Rayo. Rencananyo Amak akan mambuek : 1. Pangek itiak Koto Gadang bakinco jo cubadak mudo 2. Randang dagiang bakinco jo kantang ketek-ketek 3. Gulai putiah yang didalamnyo ado potongan lado ijau, merah, rawit, tahu, tempe, patai, buncih, bungo lobak, teri aluih, jo potongan ketek-ketek mincaro ayam. (Iko cocok untuak dimakan jo lontong atau katupek ditaburi karupuak merah atau emping) 4. Pical nan lamak bana. 5. Emping Itulah menu nan biasonyo ado di Rayo partamo tu nan dimakan sasudah sumbayang Rayo. Babaliak carito ka pasa bawah tu, iyo sabana rami suasana pakan pas sahari ka rayo tu. Pasa ateh, pasa bawah, pasa lereang, pasa aua tajungkang jo pasa banto, umaik manusia bantuak tumpah ruah mamanuahi jalan-jalan nan ado. Upiak nan maikua Amak manjadi kalatihan sabana latiah. Lah salasai babalanjo Amak naiak oto di pasa Banto. Naiak Mersi nan bawarna kuniang nan jalannyo arah ka Gaduik Tilatang Kamang, tapi lewat muko rumah, makonyo Amak suko naiak Mersi tu. Salain itu Upiak juo suko diajak Amak naiak Mersi dek dakek parantian Mersi tu ado nan manggaleh ubek tawa. Amak manyuruah Upiak mambalinyo 7 bungkuih sabanyak urang nan ado di rumah. Asam duo santan limo dek Abang nan nomor 3 jo Apak indak suko nan basantan. Tibo di rumahsi Upiak sabana kalatiahan jo sabana auih, indak tatahankan deknyo untuak manaruihan puaso doh. Amak lah ibo lo mancaliak si Upiak, panek Amak manyuruah Upiak mambataan puaso. Nan Upiak bakareh indak namuah, bukan apo-apo, Upiak malu beko kanai galak an dek Abang-Abangnyo nan batigo tu. Tapi akhirnyo si Upiak mangalah juo, dibaoknyo Ubek Tawa satungkuih ka dalam kamarnyo, dilatakkannyo dalam lamari baju. Sudah tu nyo caliak-caliak Abang-abangnyo bi lalok sadonyo. Diam-diam nyo bataan puasonyo sakali tu, tapi sasudah dibataannyo tu Upiak sabana manyasa, dek lah umpang lo ciek puasonyo, padohal salamoko sajak nyo TK indak pernah umpang puasonyo doh, salalu panuah 30 hari. Lah malam hari rumah biasonyo alah rami dek bako nan alah ka rumah mambaok kue bolu jo raga-raga. Dari kampuangpun biasonyo alah tibo lo kiriman lamang jo lapek sipuluik itam. Nan si Upiak lah sibuk bamain kambang api jo lilin warna-warni. Laman lah cando pasa malam dek lilin nan baiduikkan sapanjang teras jo sakuliliang kolam ikannyo. Kambang api bapalituakkan kawek pamaciknyo baambuangan ka ateh batang limau di muko rumah. Malam takbiran di ukatu Upiak ketek ko adolah malam nan sangaik manyanangkan hati si Upiak. Dek bisuak alah Rayo, sadono nan disiapkan alah buliah dinikmati sadonyo bisuak hari tu, tamasuak pai manambang nan seru. 24 tahun kemudian. Amak lah mulai tuo tapi masih sehat Alhamdulillah, baitu juo jo Apak. Abang Upiak indak sadonyo hadir doh, dek alah bi marantau. Niya di rumah masih setia mangawani Amak di rumah. Rayo sakali tu Upiak pulang dari Rantau sasudah bara lamo indak bisa pulang dek Upiak baranak ketek sudah. Musajik pagi tu sabana rami, suasananyo sajuak sasudah rinai turun sabanta. Urang sambayang Rayo duduak di dalam Musajik. Musajik nan dulu dibangun Apak alah salasai, rancak sarato laweh. Upiak duduak di tapi tunggak dakek pintu kalua, Amak duduak sabalah Upiak, anaknyo nan baumua 2 tahun duduak dakek tunggak. Sabalah Amak Upiak ado Buk Tini nan kinialah pakai kursi penyangga dek indak bisa laih untuak duduak normal di musajik. Siap Tahyatul Masjid Ibuk Tini basalaman jo Amak, takajuik mancaliak Upiak nan alah lamo indak basuo. Ibuk tu manangih dek anaknyo konco palangkin Upiak indak bisa pulang Rayo tu. Kawan Upiak tu marantau ka Jakarta. "Ondeh.lah jadi Amak lo anak wak kini.. kecek Liau sambia manangih mancium Upiak.." Iko cucu ambo ko? Kecek Liau. Upiak sabana taharu mancaliak sakuliliangnyo, roman urang tuo lah samakin tuo, nan dulu samo gadang alah jadi Amak urang lo... Wassalam Rina, 33, batam -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.