Kmd. moderator, dunsanak sarato anak-kamanakan nan ketek indak disabuikkan namo dan gadang indak ka dipanggiakan gala. Tarimo kasih ambo alah ditarimo jadi anggota palanta kito iko. Namo ambo Noor Indones glr. St. Sati, suku Tanjuang, asa nagari Sitalang, Agam, pansiun guru labiah kurang sapuluah tahun nan lalu. Salamo iko tulisan ambo dititipkan di situs nagari.org nan dibuek dek angku doto Abraham Ilyas meskipun situs nagari ambo "Sitalang nan barajo Sorang" lai pulo dibuekkan dek angku doto tu di http://www.geocities.com/ctalang Karano palantikan Gubernur Sumsel tg 7 dan sabalum itu urang awak di Palembang alah tabagi duo pilihannyo mako ambo kirimkan gurau palanta di dalam milis iko. Demikianlah sebagai sebagai awal kato dari ambo. Wassalam
*ba sangek* = memiliki sengat, maksudnya memiliki pengaruh *tipak* = kelompok *sarangkek* = bersama-sama *bagak* = berani *ta suruah* = terperintah. Dalam budaya Minagkabau anak kecil (wong cilik) yang disuruh-suruh - vertikal, berluku pada Sistem kerajaan. *ta sarayo* = diminta tolongi. Dalam budaya MK-di luhak, yang ada kerjasama/koperasi - horizontal. *Luhak ba pangulu, rantau ba rajo*. *manjambo* = merangkul *rapek kaciak* = rapat kecil *manenteang* = mendukung *urang di labah* = orang yang diserang kawanan lebah. Kalau disengat lebah, bisa jadi lebah yang menyengat hanya satu ekor ! *guam* = penyakit pecah-pecah bibir pada anak kecil, jarang diderita orang dewasa *salah cotok* = beras yang dicotok paruh ayam, bisa meleset terpelanting *gagabiya* = gelambir pada leher sapi. Organ ini berfungsi sebagai pelindung urat nadi di leher. *Urang Awak dan Pilkada Sumsel* Hari itu Sinayan pukua sambilan pagi. Palanta Mak Sati lah tabukak. Usuik dan Mak Sati sibuk jo karajo surang-surang. "Mak Sati, ko ado SMS masuak". Si Usuik mamacah kasunyian "Cubo baco ! Baa bunyinyo ? Dari sia ?" Si Usuik mambaco: *"Mak Sati ! Nan rancak awak adokan dialog tantang hasil pilkada Sumsel 2008. Mamak awak Dt. Sri Paduka Bagida Alex Noerdin ka dilantiak, tapi urang sumando awak Syahrial Oesman nan bagala Tuanku Bagindo Basa nan Kayo dek lah kalah, baa nasibnyo ? Pangirim St. Nagari Basa."* Jawek lansuang Suik ! buek SMS undangan untuak simposium palanta, kito adokan hari Kamih dan tolong siapkan tampek. *"Silakan datang hari Kamih, sasudah sumbayang luhua di palanta Mak Sati. Ajak nan agak basangek"*, si Usuik ma SMS baliak. Hari Kamih, kiro-kiro pukua satu palanta Mak Sati lah rami. Ruang sidang nan bakapasitas duo puluah urang hampia panuah. Ota tadanga lapuak-lapak, maklum nan hadirko, tipak nan manang. "Assalamualaikum warohmatullahi wa barakatu", Mak Sati mambuka pertemuan". "Alaikum salam warohmatullahi wa barokatu", hadirin sarangkek manjawab salam. "Mari kito mambuka sidang dengan mambaco basmalah ba samo-samo." Dengan patuah sarangkek, jamaah mambaco bismillahirrohmanirrohim. "Syukur alhamdulillah kito sampaikan pado Allah, salawat dan salam pado Muhammad salallahu alaihi sallam, tarimo kasih ambo sampaikan ka angku-angku para hadirin". "Indak bapanjang mukaddimah, ambo silakan juru bicara nan ka manyampaikan mukasuik". "Ambo Mak Sati". Sutan Nagari Basa manunjuak sambia tagak. "Ambo Sutan Nagari Basa, *tagak bukan karano bagak, mangecek indak karano cadiak tapi karano tasuruah-tasarayo, bak kecek urang awak, manjambo ba uleh tangan, ba kato basalin lidah*, sabagai corong hadirin." "Mak Sati Urang nan arif bijaksano, tampek ambo ma antakan sambah. Sabalun ka mari, kami lah rapek kaciak, manyusun materi nan ka ba bao ka palanta iko. Inti sarinyo sebagai berikut: Pemilihan gubernur Sumatera Selatan 2008 nan lalu alah sukses, tapi *mambao dampak ka urang awak*. Dampak iko, kami raso paralu dibarasiahkan malalui dialog sarupo kini. Ado ampek masalah, nan ka disampaikan oleh ampek urang. Nan partamo, silakan angku Sutan Bandaro!" "Assalamualaikum warohmatullahi wa barokatu." "Ambo ka manyampaikan tantang kalompok Griya Agung dan kalompok Sanjaya." "Nan dimukasuik kalompok Griya Agung iyolah kalompok Minang nan meneteang Syahrial Oesman pado pilkada gubernur Sumatera Selatan 2008." "Kalompok ko disponsori oleh sebagian besar pengurus BMKM (Badan Musyawarah Keluarga Minang) dengan mambao namo BMKM, dan *malibatkan urang Minang bataraf nasional, seperti bapak Azwar Anas, bapak Hasan Basri Durin.*" "Kaduonyo mantan gubernur Sumbar dan mantan menteri, sarato nan lainnyo bapak Gamawan Fauzi, gubernur Sumbar kini, ibu H.M Arma dan lainnyo tokoh regional." "Kakalahan Syahrial Oesman, calon nan mereka dukuang, ambo raso marusak citra tokoh-tokoh tadi, tarutamo di mato urang awak." *Puyuah anak urang Koto Nopan Bao bapikek lah daulu Guruah yang indak jadi ujan Bumi jo langik nan dapek malu* "Iko paralu dipikiakan marehabnyo. Tarimo kasih." "Nan kaduo, silakan angku Sutan Indomo !" "Ambo manyampaikan masalah Kinantan Center sebagai tim sukses Alex Nurdin, dan Gumarang center selaku tim sukses Syahrial Oesman." "si Kinantan ba kukuak, dek karano Alex manang, sadangkan si Gumarang tajilapak karano Syahrial kalah." "Ba a tu salanjutnyo ? Kinantan tinggalah basamo pak Alex, dan Gumarang pai lah jo pak Syahrial." "Iko paralu pulo dipikiakan. Tarimo kasih !" "Usuik tolong catat rapi-rapi." Mak Sati ma ingekkan sekretarisnyo. "Nan katigo, silakan Sutan Mangkudun !" "Nan ka ambo ka mukokan tantang kondisi kaduo kandidat" "Yaitu antaro mak Datuak dan urang sumando." "Mamak rang Minang di Sumsel, Dt. Sri Paduko Bagindo Alex Noedin ka dilantik tanggal 7 November 2008 jadi gubernur Sumsel 2008 -2013." "Urang sumando awak pak Syahrial Oesman kok nyampang jadi tasangko korupsi proyek Tanjuang Api-Api tantu ka diantakan urang masuak pinjaro." "Ba a masalah iko, bialah sarupo itu sajo atau ado solusi ?". Sakian, tarimo kasih. "Nan ka ampek, terakhir, silakan angku Sutan Saidi." "Ambo manyampaikan masalah organisasi awak, BMKM. Nan salamo iko, bak kayu gadang di tangah padang, ureknyo tampek baselo, batangnyo tampek basanda, daun nan rimbun tampek balinduang. Hasil karajo pengurus salamo iko memang luar biaso. Alah berhasil mambangun sekretariat dan musajik gadang dan menjalankan roda organisasi dengan optimal, tapi kini *ta tumpang biduak tirih. Ma ajak pulo tokoh-tokoh urang awak*." "Andam karam ka sadonyo. Tantu kini, panguruih ilang wibawa." "Ka maa muko ka di andokkan." "Nan ambo tanyokan, apo ka dipabiakan atau paralu di paelok i BMKM ko." "Ta labiah, ta kurang, mohon maaf. Sakian, tarimo kasih !" Mak Sati selaku moderator, mananggapi. "Ambo simpulkan sbb." "Partamo, karajo di Griya Agung, kampanye mandukuang urang sumando sangek mamalukan." "Para tokoh urang awak nan hadir di Griya Agung, samo atau sarupo manolongi *urang di labah,* paralu dicarikan jalan kalua pa ubek hatinyo." "Papatah awak mangatokan, *lah tuo mako diguam*. Nan kaduo tantangan Kinantan Center dan Gumarang Center salaku tim sukses, itu masalah ringan. Masalah bisnis." "Kalah-manang bagi tim indak paralu." "Nan paralu pitih." "Gumarang kalah, indak ka mangumbalikan pitih Syahrial doh." "Kinantan manang, indak pulo ma arokkan tambah pitih Alex Nurdin." "Namun tatap dimasuakkan agenda untuak diolah." "Nan katigo, kondisi kaduo calon." "Kandidat nomor urut satu manang akan dilantik jadi gubernur tanggal 7 November 2008. Maso bakti jaleh limo taun. Kandidat nomor urut duo, lah kalah." "Siriah baliak ka gagangnyo, pinang baliak ka tampuaknyo (PNS)." "Namun ado kaba nan marisau." Kok iyo takaik ka Tanjuang Api-Api, nyampang sato taponis, tapaso pindah ka baliak tarali basi, masa bakti nan alun jaleh, mungkin limo taun pulo." "Kok iko nan tajadi, ka baa juo." *"Tangan mancancang, bahu mamikua." "Main ayia basah, main api anguih." "Bia anak - bia minantu, bia sumando - bia mintuo, bia kelawai - bia besan, nan utang tatap ka babayia."* "Antah kok lai tuan-tuan nan pandai manyogok KPK?" Nan ka ampek, masalah organisasi BMKM, nan salah panguruihnyo." "Paralu diteliti apokoh kegiatan mereka nan mandukuang Syahrial, lai marupokan hasil musyawarah dan mufakat atau dikarajokan tanpa musyawarah." *"Salah garogok ulu malang, salah cotok malantiangkan, gagabiya buliah bareknyo*." "Karajo iko alah salah garogok dan kini gagabiya (IKM-IKM/urang awak) lah kanai baban barek.". "Kok tindakannyo indak mengikuti AD-ART labiah elok mengundurkan diri, daripado dimundurkan." "Salah ka Tuhan, minta ampun, salah ka manusia minta maaf". "Ka ampek masalah iko paralu dirumuskan." "Tolong Malin Marajo mambantuak tim pe rumus salasai palantikan Mak Datuak Sri Paduko Bagindo Alex Nurdin manjadi gubernur." "Awak ulang dialog palanto ko baa, cukuik sakitu !" Sado nan hadir kompak sa iyo jo saran Mak Sati dan ba samo-samo ma ucapkan alhamdullillahi robbil alamin. --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
