Diambiak dari harian padang Ekspress Ndak tantu ka di komentari lai, iko lagu lamo rilis ulang.
Is St Marajo www.cimbuak.net Kampuang nan jauah dimato dakek dijari BANTUAN GAMPO KANAI KAMPO Bakaru muko si Atang pulang dari kantua panitia. Pena nan kapanekan kulitansi tapacik juo baru di tangan suoknyo. Amplop barisi pitih nyo ganggam di tangan kida.Inyo bajalan manuruik an jalan urang parimbo, indak manampah jalan gadang. Kok lalu di jalan gadang beko, tantu banyak urang batanyo Dari ma, manga, bara dapek, lah bara lamo baurusan. Macam-macam se nan ditanyoan urang satiok lapau. Atang badendang-dendang surang. Indak jaleh, apo badendang dek gadang hati, sakik hati, rindu dendam, atau apo. Saroman urang tere. Mangecek indak tantu adok, mancaliak indak tantu arah. Kutiko keadaan si Atang nan satangah tea satangah gilo tu basobok lah inyo jo si Jila. Jila sadang manunggu durian. Kok lai ado durian urang nan ka runtuah. "Tang! Lah mamacik pena pulo waang kini? Lah jadi juru tulih? Atau, lah jadi sastrawan pulo waang kini? Apo nan waang buek? Novel? Lah bara judul novel waang nan sudah?" tanyo Jila dari ateh pondok durian. Atang tagagau. Nyo caliak suok kida. Nampak si Jila, baru taubek hatinyo. "Untuang waang lai disiko kawan. Kok indak lah maambua waden ka dalam lurah dalam ko mah," kato Atang. "Manga waang? Ka bunuah diri?" tanyo Jila. "Sabananyo waden musti bunuah diri. Tapi agamo awak malarang," jawek Aang. "Baa mangko nak bunuh diri bana? Lah sulik bana iduik kini ko?" tanyo Jila. "Baa kaindaklah. Lah runtuah rumah den dioyak gampo. Lah datang apak-apak tu mancaliak. Lah bajanji bagai sagalo apak nan tibo ka maagiah bantuan ka urang nan kanai musibah gampo. Tapi lah ka masuak puaso pulo awak, baru kalua pitih gampo tu," jawek Atang. "Salah waang. Manga waang maarok bantuan urang," solang si Jila. "Haram talak waden indak maarok bantuan bagai doh! Apak-apak tu nan bajanji. Indak ado bagai waden mintak apo-apo doh ka baliau tu. Waden ko indak pengemis bagai doh kawan! Inyo nan bajanji. Sebagai dari janji apak-apak tu, tantu waden nan rakyat badarai ko manjadi harok. Tanyato lain kecek apak nan iko, lain pulo kecek apa nan itu," baleh si Atang. "Bajanji tu memang lamak, kawan. Urang mamuji awak. Soal janji tu lai bisa dipanuhi atau indak, bukan salah urang nan bajanji, tapi takadia buruak urang nan manarimo janji," jawek Jila."Baa mangko baitu?" tanyo Atang. "Soal pitih gampo misalnyo. Labiah satahun janji dibuek, alun juo sadonyo urang nan dijanjian tu dapek. Bahkan ado pulo nan mancubo maakai baa supayo pitih gampo dapek pulo dek kalera-kalera nan diateh tu," kato Jila. "Maakai baa?" tanyo Atang."Pamarentah ka maagiah bantuan pitih. Langsuang ka urang nan kanai gampo. Lalu ado pulo rencana, indak pitih nan diagiah doh. Tapi bahan bangunan. Papan, simin, paku, atok. Itu kan ka jadi proyek pulo. Kini, timbua pulo kicuah baru," kato Jila. "Kicuah baru baa?" tanyo Atang. "Teken tujuhratuih limo puluah, tarimo limo ratuih," jawek Jila. "Bana! Iyo bana baitu kawan! Itu mako waden nak bunuah diri. Iko pena nan den pakai untuak maneken kuitansi bantuan gampo tadi. Alun den tutuik bagai doh saok pena ko. Iko ampolop barisi kepeang. Antah mato den nan alah bula, tampak di den dalam kulitansi tu tujuah ratuih limo puluah ribu rupiah. Kutiko waden manarimo ampolop kepeang ko, sasudah den bukak, den etong, basobok pitih tu limo ratuih ribu. Ko ha!" kato Atang sambia maagiah an pena jo ampolop kepeang tu ka si Jila. "Nan duo ratuih limo pulah lai di ma?" tanyo Jila. "Ma jaleh di den," jawek Atang tarabo. "Ongkos kirim dari Jakarta kamari ndak? Biaso roman tu. Mangirim pitih awak ado ongkos kirimnyo," kato Jila. "Indak ado dikecek an dek panitia nan mambagi-bagi kepeang tu doh. Kecekyo, pitih ko pitih bantuan pamarentah. Nan tukang bagi tu kan urang pamarentah. Ongkos apo juo lai?" kecek Atang."Mungkin sasek apak- apak tumah," kato Jila. "Sasek baa?" tanyo Atang. "Banyak apak-apak tu nan sasek kini. Sasek lidah, sasek tulih, sasek etong, sasek lubang, sasek nan basasek-sasek an," jawek Jila. "O, jadi sasek apak-apak tu yo? Tujuah ratuih limo puluah tu, sasek sabuik. Limo ratuih ribu sasek etong. Nan tatangkok basah di hotel tu sasek lubang. Nan marampok ameh urang, sasek nan basasek-sasek an. Baitu?" tanyo Atang. "Iyo gak ati den, Tang," jawek Jila. "Baa Jila. Kok lah sasek sado apak-apak tu, kan lah patuik rakyat badarai roman den ko bunuh diri ndak ha?" tanyo Atang. "Baa kok roman tu bana?" tanyo Jila. "Kok sasek pulo apak-apak tu manyabuik rakyat ko. Nan nyo mukasuik rakyat, nan nyo sabuik mayat. Nan nyo sabuik gampo, nan nyo karajoan kampo. Di kamponyo sado pitih rakyat ko. Indak paduli dek inyo ptih gampo, pitih urang miskin, pitih musajik. Nan bisa dikampo dikampo," jawek Atang. "Saroman urang mangampo manggih? Dipacik arek-arek jo duo tangan, dilatak an di karampang, kaki direpak an, kulik manggih mangalokak, isi manggih nan putih tu tagadayak. Dimakan sambia tagak, Baitu?" tanyo Jila. --~--~---------~--~----~------------~-------~--~----~ =============================================================== Website: http://www.rantaunet.org =============================================================== UNTUK SELALU DIPERHATIKAN: - Hapus footer dan bagian yang tidak perlu, jika melakukan reply. - Posting email besar dari >200KB akan di banned, sampai yang bersangkutan menyampaikan komitmen akan mematuhi Tata Tertib yang berlaku. - Email attachment, DILARANG! Tawarkan kepada yang berminat dan kirim melalui jalur pribadi. =============================================================== Berhenti (unsubscribe), kirim email kosong ke: [EMAIL PROTECTED] Webmail Mailing List dan Konfigurasi keanggotaan lihat di: http://groups.google.com/group/RantauNet/subscribe Dengan terlebih dahulu mendaftarkan email anda pada Google Account di: https://www.google.com/accounts/NewAccount =============================================================== -~----------~----~----~----~------~----~------~--~---
