Assalamua'laikum wr.br.... Dr.Syafruddin sang Mamanda,Bung JEPE sang kakanda................. Dilahianyo nan baduo tasabuikkan namo tahimbaukan gala, bathin mahadok katangah jamba,dunsanak sadonyo sapalanta, indak disabuik kampuang jo kota, indak di kaji asa muasa, baiak di jawa jo sumatera, di bali atau Madura,banten atau di sunda, sajak muloi dari balingka, solok jo batusangka,lapeh Palembang jo Bangka, pokoknya dimana saja, Baiak nan sadang di Honda,atau mungkin basepeda, atau di ateh kureta, atau mungkin di ateh kappa,sadang di selat sunda, atau nan sadang di banda, sadang disawah sadang manjaja,atau sadang di kaja ula, Atau nan indak kama kama, sadang ma ota di palanta, duduak di bangku kaki ka meja, carito kaliliang dunia, amerika jo rusia , walau hiduik antah ka baa, nan informasi pantang tatingga, bialah lupo jo sarawa, daripado lupo berita, disiko lah awak istimewa, walaupun badan lah kanai ota, nan kito tatap ma ota..jikok dipikia di kana kana, dibaco sifat manusia, tantu ndak ado nan sempurna, tapi Tuhan mambari baka, dengan babagai ilmu dan aka, hanyo kito acok alpa, banyak lupo pado apa, karano di hati nan sakapa, syetan mambuek singasana, bakarajo samo jo si hawa, iko nan marajalela, mambuek musibah dan bencana, sajak dari kampuang jo desa, sampai ka nagari jo Negara, kito lah lupo jo Nan Esa,ndak lai pandai bado’a, hiduik takaja kaja, dikaja harta dan tahta, di kaja tamak loba, di kaja ria dan riba,Kadang sampai lupo jo nyawa. Lupo adab jo etika, dima duduak disinan manggata, indak piduli itu sia….bak kacang miang tumbuah di paga,mancari urang ka manyanda..,bak gurindam nan kalua,mudah2an ganti sitawa.
PASAN MAMAK V (kado ultah buat Dilla) Kamanakan mamak pamenan mato Buah hati limpo bakuruang Lah ampek surek kamanakan tarimo Nan carito mamak masih tangguang Dek sabab karano itu Simak dek kamanakan sabuah lai Umpamo nan indak patuik ditiru Toloang disimak dipalajari Disurek ka tigo jo ka ampek Lah mamak cubo manyampaikan Contoh umpamo nan tasirek Santano jadi tanaman Usah manjadi kacang miang Gatanyo labiah bak biluluak Lain asiang jo jilatang Sakuliliang urang nan mabuak Kok dicaliek sapinteh lalu Baiak bantuak maupun rono Banyak urang nan tatipu Takicuah pandangan mato Lagak bak cando kacang panjang Manggagai tagak jo junjuang Badaun babungo kambang Babuah samo tagantuang Buah bak cando kacang paga Babulu bak kacang ramang Bak buncih daunyo leba Babuah sapanjang gagang Ditanah tumbuah manjala Jo kayu hiduik manompang Manggagai sapanjang aka Malilik sapanjang batang Bulu bakilek ka amehan Nyampang ditimpo matohari Bungonyo rancak ka pamenan Babagai rono jo ragi Tapi kok indak hati Tadayo jo bantuak rupo Alamat ka sansai badan diri Sampai mati indak ka lupo Bungo rancak salimuik diri Guno tak labiah ka palagak Miang bakilek dek matohari Pangicuah mato rang banyak Kok lakek miang di badan Hari kok sadang tangah hari Mungkin malu talupokan Amuah rasonyo batilanjang diri Usah disabuik ka malendo Apo lai nak manggisie Kok nyampang kancang angina tibo Usah taragak nak ma ampie Gatanyo allhurabbi Digauik makin batambah Di gosok tambah manjadi Dibiakan batambah parah Cando digigik samuik api Bak di pantak salimbado Padieh kkok lai tatahani Nan gatanyo indak ta kao Banyak pulo nan bamiang Tapi nan iko talabiah bana Labieh gata dari jilatang Miang rabuang alun lai bara Gatah biluluak tasabuik juo Buah anau kato rang banyak Tapi kok tau jo caronyo Lamak bana untuak kolak Tapi nan iko kok disabuik Indak baguno ciek juo Dibalah tujuah sahalai rambuik Gatanyo labieh sakapalo Jadi pameo urang sa isuak Jadi gunjiang dek rang tuo Rang sumando parangai buruak Kacang miang ka tambiehnyo Mabuak mangieh jo manggisie Pangka bala dalam kampuang Bak minyak bacampua ayie Tatap tasisieh dalam tabuang Jauahkan sifat sarupo itu Dunie akhirat urang manyumpah Hiduik kok indak ka mambantu Jan pulo urang dibuek susah Pandai pandai hiduik jo lingkuang Usah ditiru kacang miang Kok ingin juo tumbuah bajunjuang Tirulah siriah bagagang Masih banyak contoh nan lain Contoh lah cukuik dari alam Nan lahie manganduang batin Nan tasurek sireki paham Insyaallah dilain hari Mamak ka cubo manambahkan Panjang umua murah rasaki Tasilau juo kamanakan Cupak panuah gantang balanjuang Nyampang batamu saliter indak Usah salahkan sarueh batuang Mamak manggantang nan kurak bijak Bana nan datang dari Illahi Manusia basifat alpa Kok salah mamak mangaji Usah surek kamanakan baka. 22062011.Y.Jambak (Mc Adat /penyiar Radio Pusako Minang Am 972 tgr) -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/