PADR MARCELLINE REMEDIOS 03. 06. 1924 – 27. 04. 2011
Padr Marcelino dos Remédios urf Marcelline Remedios ganvan Tabravaddo, Saligão, Bardez-Gõy. To zolmolo Kisumu, Kenya, Junachie 3rer 1924 hea disa. To vortolo ek boro Konknni pregador, potrkar, sompadok ani sahityik. Tachem mullavem xikop Kenya-nt zalem ani uprant Goyant yeun to Saligao-chea Mater Dei Institute hea iskolant xiklo. Padriponnachem apovnnem ailolean to Mumbointlie Parel siminarint bhitor sorlo ani yagnikponnachem xikxonn sompoilea uprant Dezembrachie 21ver 1950 hea disa Ahmedabad-cho bisp, Edwin Pinto, hannim taka Mumboint padriponnachi makhnni dili. Mumbointlea Konknni ulovpi vattharantlea lokam modem tannem aplem munnariponn choloilem, zoxe porim: Our Lady of Seven Dolours igorjent, Sonapur; St. Francis Xavier Igorjent, Dabul ani Victoria igorjent, Mahim, hea zageancher padr kur koso; ani St. Joseph Igorjent, Umerkhadi ani Mount Carmel igorjent, Bandra; hea firgozamni Padr Vigar koso. Mount Carmel igorjent vigarki choloitanam to Bandra deanery-cho dean aslo ani tea kallar tannem hi igorz novean bandli ani 1981 vorsa hie nove igorjechi ugttavnni Cardinal Simon Pimenta hannim keli. Heach vorsa Padr Marcelline-achi nemnnuk Dabul-chie igorjent vigar mhonn zali, punn thoim vechea poilinch taka 1981 vorsachea Mai mhoineant taka arecho atak yeun to azari poddlo. Ilaza khatir to pordesant gelo ani ilaz gheun portolea uprant taka Bandra Clergy Home-ant dovorlo. Padr Marcelline êk jyextt Konknni pregdor asul’lean Mumboichea zaitea firgozamni taka Konknnint sermanv sangonk vhortale. Mumboichie arkidiosezichea asrea khal uzvaddak yevpi satallem UDENTECHEM NEKETR hacho to sompadpi aslo. Mumboichea siminaristank tannem Konknni xikoilia. Konknni bhaxecher taka bori tavdarki (command) asli ani zaitea Konknni borovpianchea pustokank tannem prostavnna boroilia, Konknnicho guru Prof. Joaquim Antonio Fernandes-achea ‘Konknni Nadxastr’ hea pustokak legit dhorun. Konknni sahitik mollar tachim kaim pustokam uzvaddak aileant tanche modem MARIACHE BHOGNNAR (1961) hi tachi kadambori khub lovkik zal’li. Tachem anik ek itihasik pustok zaun asa INDIECHE MARTIR (1946). Tachim zaitim dhormik pustokam uzvaddak aileant: KHURSACHI POVITR VATT (1959), MISACHO POVITR SACRIFIS (1960), BAPA TANKAM BHOGOS (1960), adi. Tachem anik ek kherit dhormik pustok zaun asa SORGINCHO SANGATI (1961) zantunt magnnim ani sabar novenam aslim ani tem tea kallar Mumbointlea sorv kristi bhavarthiancho sangati zaun gel’lem. Padr Marcelline azari poddttoch taka Bandra-chea CLERGY HOME-ant ghalo. Khub kallak azari ason hea CLERGY HOME-ant tannem zaitim vorsam sarlim ani thoinch Abrilachie 27ver, 2011 hea disa sorlo. Abrilachie 28ver tachi pret yatra Clergy Home-ant thaun Bandra-chea Mount Carmel igorjent vhoron thoim Misachem bolidan bhettoun tachi kudd Mount Carmel igorjechie ximiterint matiek laili. [image: Image may contain: 1 person, glasses] <https://www.facebook.com/photo.php?fbid=10158776747956162&set=gm.10158113757419105&type=3&eid=ARAqGWJRbEK6pK5-4jDYAgDG4fzbDUbssMJXFOKmr39r2x7nKiN3mws_eB-P-QKbSrvLadYWVN2bWwfk&ifg=1> <https://www.facebook.com/ufi/reaction/profile/browser/?ft_ent_identifier=ZmVlZGJhY2s6MTAxNTgxMTM3NTc0MTkxMDU%3D&av=502514643> <https://www.facebook.com/ufi/reaction/profile/browser/?ft_ent_identifier=ZmVlZGJhY2s6MTAxNTgxMTM3NTc0MTkxMDU%3D&av=502514643> -- -- Saligao-Net is at http://groups.google.com/group/saligao-net To post to this group, send email to saligao-net@googlegroups.com To unsubscribe email saligao-net-unsubscr...@googlegroups.com --- You received this message because you are subscribed to the Google Groups "Saligao-Net" group. To unsubscribe from this group and stop receiving emails from it, send an email to saligao-net+unsubscr...@googlegroups.com. To view this discussion on the web visit https://groups.google.com/d/msgid/saligao-net/CAMCR53KjuC-mfSsPB8E8sSqzh6F9NZ3AW1c1UgicOcyG6O%2Bq4g%40mail.gmail.com.
