Hæ. Í 32. gr. frumvarps um náttúruvernd ( http://www.althingi.is/altext/141/s/0537.html) er kveðið á um kortagrunna. Mig langar að skila inn umsögn um málið í mínu nafni (þar sem samtökin vilja ekki að almenningur segist tala fyrir þeirra hönd) en vil vita hvort þið viljið að ég taki eitthvað sérstaklega fyrir.
Greinin er svona:
32. gr.
Kortagrunnur um vegi og vegslóða.
Ráðherra skal í reglugerð kveða á um gerð kortagrunns þar sem
merktir skulu vegir og vegslóðar sem heimilt er að aka vélknúnum
ökutækjum um. Gerð kortagrunnsins skal vera í höndum Landmælinga
Íslands sem jafnframt annast uppfærslu hans í samræmi við reglur sem
ráðherra setur. Ráðherra staðfestir kortagrunninn og skal útgáfa
hans auglýst í B-deild Stjórnartíðinda. Upplýsingar úr
kortagrunninum skulu veittar án endurgjalds og skulu Landmælingar
Íslands sjá til þess að þær séu aðgengilegar. Í reglugerð um gerð
kortagrunns skal kveða á um samráð við sveitarfélög og aðra
hagsmunaaðila sem og um kynningu grunnsins.
Við mat á því hvort tilteknir vegslóðar skuli merktir í
kortagrunninn skal sérstaklega líta til þess hvort akstur á þeim sé
líklegur til að raska viðkvæmum gróðri, valda uppblæstri eða hafa að
öðru leyti í för með sér náttúruspjöll. Einnig má líta til þess
hvort um greinilegan og varanlegan vegslóða sé að ræða og hvort löng
hefð sé fyrir akstri á honum. Heimilt er ráðherra að ákveða að
umferð á tilteknum vegslóðum skuli takmarka við ákveðnar gerðir
ökutækja, vissa tíma eða við akstur vegna ákveðinna starfa.
Upplýsingar um vegslóða í kortagrunni fela ekki í sér að þeir
séu færir öllum vélknúnum ökutækjum og leiða ekki til ábyrgðar ríkis
eða sveitarfélaga á viðhaldi þeirra.
Eftir útgáfu kortagrunns skv. 1. mgr. skulu útgefendur
vegakorta, þar á meðal stafrænna korta fyrir GPS-tæki og álíka
búnað, sjá til þess að upplýsingar á kortum þeirra séu í samræmi við
kortagrunninn. Ef á þessu verður misbrestur er Umhverfisstofnun
heimilt að krefjast þess með skriflegri áskorun að útgefendur hætti
dreifingu vegakorta sem veita rangar upplýsingar um heimildir til
aksturs vélknúinna ökutækja á vegslóðum og að þeir innkalli þau frá
öðrum dreifingaraðilum. Verði útgefendur ekki við áskorun
stofnunarinnar innan tilskilins frests er henni heimilt að beita
dagsektum í þessu skyni, sbr. 3. mgr. 87. gr.
Í öðrum ákvæðum frumvarpsins gæti verið kveðið á um önnur gögn sem gætu
vakið áhuga fólks og þau mögulega átt heima í OSM. Endilega lesið yfir
frumvarpið og athugið hvort það sé eitthvað sem þið mynduð vilja hafa
öðruvísi (og tengist OSM).
Með kveðju,
Svavar Kjarrval
signature.asc
Description: OpenPGP digital signature
_______________________________________________ Talk-is mailing list Talk-is@openstreetmap.org http://lists.openstreetmap.org/listinfo/talk-is
