Mejuah-juah, Enggo ndekah kel me setuhuna lanai kubegi kata "napa nipi" bas cakap Karo, apaika bas cakap Cina, e adha me ah, nina arah kutanta ah. Tah kai ertina pe labo min kuangka kel, merembo-rembo tik ah je tentu lit nge pengangkaanku. Ula kam tawa, kam simeteh, de pengertin silit bas aku la teng-teng.
Nina ernina-nina, "napa-nipi" emkap sada acara bas budayanta kalak Karo, acara petembe-tembe nipi kubas keadaan situhuna si sue ras makna nipi siernipi. Sikuingetna, lit telu pihak si ikut bas acara napa nipi, pemena tentu saja si ernipi, biasana kalak si mbisa tahpe kalak simehaga. Peduaken, guru mbelin simeteh surat, sibeloh ngantusi nipi. Siguru mbelin nuriken antusenna rikut pe ras akibat-akibat si mungkin terjadi ibas pudi wari nandangi siernipi tah pe silit kaitenna ras siernipi. Gelah ula sempat turah si la bagi nuate, ras pe segelah nipi si mehuli banci jadi bagi si inipiken, emaka ilaoken me lakon "napa-nipi". Alu lakon e, iarapken maka nipi siernipi jadi "sapa", saimara lalit sibangger. Pihak sipeteluken siterlibat emkap pihak-pihak ketiga si ikut atan bas acara napi nipi, bali ia si tersena bas nipi siernipi, tahpe erkiteken perlu ibas ngelaloken acara. Tua-tuanta siarah lebe ndube tuhu enggo meganjang pemetehna, beloh ia enciptaken sada budaya si merandal. "Upaya untuk merealisir suatu mimpi " kepeken enggo seh iukurina. Merandal nge min, tuhu merandal, tapi bagi katanta ndai, acara napa nipi enggo ndekkahkel me lanai terbegi, tah uga maka bage, lanai bo kuangka. Banci jadi, acara napa nipi lanai lit bas kegeluhen budaya Karo sigundari erkiteken kalak simehaga sigundari lanai pernah ernipi, nipi-nipin ngenca rusur. Lit ka deba, siernipi la tehna kai isi nipina, ibelasina saja kai si ternipi bas sanga ia terpedem. La perduli nipi suari, nipi tekuak manok, nipi tengah berngi, tah pe nipi cinder. Guru mbelin simeteh surat tentu saja lanai bo ngasup ngantusi nipi si ernipi. Uga banci ibahan acara napa nipi adi nipi siernipi pe lanai terantusi? Tapi guru perdihul-dihul merangkap perlanja serba-serbi biasana erlumba-lumba nuriken antusen nipi kalak mehaga. Rikut ka pe pengajok maka acara napa nipi sangat teramat sangat diperlukan demi kebaikan si ernipi bagepe jelma sekelewetna rayat sirulo. Ma enggo kuh kel, singantusken nipi guru perdihul-dihul perlanja tihun, nipi pe la jelas tampok benanana, uga nari tuhu ningen erbahan lakon napa nipi sipayo arih? Mejuah juah kita kerina
