> Surtiwa <surt...@...> wrote: > Waas aheula mah di sakitar Bukit Soeharto teh teu meunang aya anu > dagang atawa pamuiman..eta teh daerah konservasi leuweung....Komo > ngaranna Soeharto..sarieuneun ngalanggar..
Bah, kuring mimiti ngaliwat ka Bukit Soeharto teh taun 1981,nuju Samarinda ti Balikpapan. Kuring nyarter mobil sewaan, mobilna teh sedan Holden, persis siga di Bandung jaman harita, taksi 4848. Pas ngaliwat ka Bukit Soeharto, si Supir teh ngadadak ngalaunan mobilna, bari tempa-tempo kasisi jalan. Kuring rada reuwas, da puguh Bukit Soeharto jaman harita, masih leuweung, teu ningali jelema saurang-urang acan, sok sieun si supir boga niat jahat. Sreg teh mobil eureun pisan, si Supir terus turun, bari ngomong pondok, "Maap Pak, sebentar". Manehna nuju ka sisi jalan, terus nempoan kahandap siga aya nu diteangan, sukuna nyepakan runtah, duka naon nu diteangan. Tapi kacirina mah manehna bingung, nu diteangan teu kapanggih. Tungtungna manehna balik deui kana mobil, neruskeun perjalanan. Panasaran naon nu diteangan ku manehna, kuring nanya: "Cari apa pak Supir, nampakna penting sekali?". "Ini gara-gara kucing!", ceuk manehna teh satengah kukulutus. Der manehna teh ngadongeng. Cenah dua poe katukang manehna teh ngaliwat ka palebah dinya sareupna, teu ku hanteu mobilna nabrak ucing anu meuntas, nepi ka paehna. Pa supir kacida reuwasna sabab manehna percaya pisan eta kila-kila rek meunang musibah. Keur palakiahna supaya teu meunang musibah, bangke ucing teh kudu dikurebkeun jeung diboehan. Ngan cilakana mana aya nu dagang boeh di leuweung mana geus reupreupan deuih. Kapaksa we kameja bodas nu keur dipake, dilaan terus dipake mulen bangke ucing. Rurusuhan manehna ngali kuburan ucing make konci roda. Beres weh ucing teh dipulasara. Manehna neruskeun perjalanan ukur dikakaos sangsang. Tepi ka Balikpapan, kakara manehna inget dina saku kamejana teh aya duitan, nu lumayan gede. Jadi lapur kakubur jeung bangke ucing. Rek balik deui teu mungkin jeung rada sieun da tas nabrak ucing. Tah kabeneran ayeuna manehna ngaliwat deui. Tadi euereun teh maksudna rek dikali deui da teu jero, da ngalina ge ukur ku konci roda. Tapi manehna poho deui lebah-lebahna jeung ngarasa rusuh bisi panumpang kesel, lila teuing nungguan dina mobil. "Tapi enggak apa-apa Pak, yang penting saya selamat tidak dapat musibah", ceuk manehna teh ngupahan maneh. Teu ditembalan, ngan dijero hate we ngagerentes: "Har.. ari Bapa Supir, ari eta duit nu ngilu kakubur, lain musibah kitu?" Baktos, WALUYA
