Kamana Imam Masjid, Syekh Muhammad bin Subail? Bari ngarasa kahormatanana ditincak-tincak ku Juhaiman, anjeunna ngalungkeun Jubah khususna nu warnana abu-abu terus "ngaleungit" ngahiji jeung rewuan jamaah nu keur kacow. Lumpat nyalametkeun hirupna, Sang Imam nu umurna 55 taun, tepi ka bagean luhur Gerbang Fatah. Sang Ulama, nu mangrupakeun perwakilan bidang agama Saudi, nu boga tanggung jawab di dua masjid : Masjidil Haram jeung Masjid Nabawi di Madinah, nelepon dununganana Syekh Nasir bin Rasyid. Sanggeus nyaritakeun kajadian nu kacida ngerakeunana, Ibn Subail nempo kana Jandela, nyaksian kumaha para pelaku pemborantakan nambahan ararsup ka Masjidil Haram ngaliwatan jalan motong dihandap. malah mobil-mobil maranehna dibawa asup, diparake dijero masjid.
Sanggeus kitu Ibn Subail turun deui kahandap, satekah polah teu narik perhatian, terus asup ka kantor pulisi jaga di Masjidil Haram. Pos ieu aya di Gerbang King Abdul Aziz. Anjeunna nanya ka petugas didinya: "Ari maraneh geus lapor ka atasan?" "Kuring geus laporan, Imam Mahdi parantos sumping", ceuk petugas nu mimiti kahasut gara-gara soak ningali dua urang dipaehan dina waktu ukur samenit, nepika percaya "poe akhir" geus datang .... Ibn Subail gancangan nyadarkeun petugas tina pikiran teu warasna. Anjeunna apal pisan nu "ngambil-alih" Masjidil Haram teh, sabab sabenerna Juhaiman jeung pengikutna tadina arek dihukum, tapi dibebaskeun ku rekomendasi Ulama Abdul Aziz Bin Baz. Emutan anjeunna, kabeh lalaki nu mamawa pakarang teh teu kaciri saeutik-eutik acan siga Juru Selamat saperti nu digambarkeun dina agama. Patugas anu jadi sadar teh janji arek bertindak, sanajan kaciri manehna teu pati antusias perang, malah nyumputkeun maneh disajeroeun saragamna. Jam 8:00 isuk-isuk, Pulisi Mekkah mimiti ngarespon situasi genting ieu. Hiji mobil polisi dikirim ngadeukeutan kakacowan nu numpuk di panto gerbang. Kakara ge tepi, mobil teh diborobot tembakan ti sniper ti puncak menara. Supirna tatu, baloboran getih, ngacleng kaluar mobil. Sanggeus nyaksian "pembaiatan Imam Mahdi", jamaah nu jadi sandera ku Juhaiman mimiti sabagian dititah kaluar ti Masjid. Ibn Subail sadar anjeunna kudu tetep nyamarkeun dirina. Anjeunna nutupan pameunteuna tepi kana taktak ku sorbanna, saperti nu dilakukeun ku jamaah ti luar negeri. Anjeunna gabung jeung Jamaah asal Indonesia nu keur tagiwur. Juhaiman teu perlu urang Indonesia, nu teu nyarita ku basa Arab jeung teu paham kana rencana-rencana gede Juhaiman. Para pemborantak teh ngantep jamaah Indonesia kaluar teu diganggu. Atuh Imam Masjidil Haram oge salamet kaluar ti masjid teu aya nu nakon .........