Organisasi Darat (YP Lima Taun #2) Sawatara waktu ka tukang, kuring jeung sabaraha anggota milis nyieun sawatara riungan nu nyawalakeun kumaha sangkan Yayasan Perceka, nu dianggap ngokolakeun Kusnet, leuwih optimal, luyu jeung naon nu jadi udagan YP sorangan oge potensi/aspirasi nu aya di lingkungan Kusnet. Nya di dinya muncul istilah optimalisasi jeung revitalisasi YP teh. Malah, ambeh rada gaya, eta gempungan teh ku kuring diaranan Dewan Ekonomi Sunda. Make kecap ekonomi teh, pedah bae wacana perkara beuteung eta nu harita paling tarik. Intina: Kudu aya usaha-usaha kongkrit dina widang ekonomi, nu lain bae bisa ngahirupan nu ngalakonan eta aktivitas, tapi oge bisa ngilu ngabeayaan YP. Naha keur beaya operasional atawa keur beaya produksi. Beh dituna mah, nya ngilu migeykeun kahirupan paekonomian urang Sunda. Tangtu bae rada rohaka eta impian teh. Lain bae nyangkut modal, oge kapercekaan lulugu-luluguna dina perkara usaha eta sorangan -- nu engke, dua hal eta, pakait jeung kredibilitas, jste, nu engke lain bae nangtukeun impian-impian luhurna tapi oge nangtukeun jalanna eta usaha. Heueuh, saha nu rek percaya mun nu ngaluluguannana sorangan teu barisa usaha, karuhan modal mah? Tapi, perkara rohaka tadi, kumaha ningalina. Mun leutik burih, nya katingali rohaka. Mun sonagar jeung gede hate, nya biasa bae. How long can you go, ceuk iklan roko mah. Ngan, dina gempungan-gempungan eta, nu katewak harita: Aya karep sangkan YP jadi organisasi profesional, di mana pangurusna, atawa sawatara pangurusna, meunang honor. Teu nyamos siga kiwari. Bari puguh programna, oge rencana anggarannana. Lian ti eta, aya karep sangkan kumaha YP boga sumber pembiayaan nu maneuh, bari gagah, teu ngan ngandelkeun kaihlasan ikhwan-ikhwan milis siga salila ieu. Konsekuensina, cara gawe pangurusna ge nya kudu gagah oge nu engke pakait jeung eksistensi YP sorangan, boh sacara politis, budaya, oge ekonomi (kaasup, meureun, eksistensi di hareupeun lembaga donor atawa donatur, mun tea mah urang ge rek nurutan LSM lian nu ngandelkeun lembaga-lembaga donor. Dalah rek ngandelkeun charity ti masarakat ge, perkara ieu ngilu nangtukeun). Sanajan Ekonomi, siga disebut tadi, ambahan eta dewan teh lain bae perkara ekonomi. Tapi, oge madungdengkeun perkara organisasi jeung TI. Ngarambayah nepi ka dinya teh pedah bae, nu katingali harita: Memeh prak naon-naon, nya organisasina heula nu kudu diberesan. Mun ieu geus beres, kadituna insya Allah bakal jalan. Tugas komisi organisasi, neangan model nu kumaha nu kira-kirana bisa ngudag optimalisasi tea bari tetep ringkes. Misalna, kumaha ngawadahan potensi Kang Tirta Cs, nu harita boga karep dina widang riset ekonomi jeung (pelatihan) manajemen. Oge potensi Kang Runa, nu siap ngagejeburkeun diri total jadi aktivis. Kaasup potensi Kang Oman, Kang Tantan, Kang Nanang, Om Teddy, Teh Susi, Teh Wati, Teh Nia, Teh Botol, jste. Nya, harita, lian ti aya pipikiran sangkan ngaran Yayasan Perceka ditambahan ku Kusnet -- keur nandeskeun yen YP teh pakait jeung Kusnet, oge teu leupas tina kapentingan anggota milis Kusnet oge aya sora ngoncrang ngeunaan perlu kuatna organisasi darat. Maksudna kieu: Salila ieu, sacara organisasi, YP teh teu sehat. Sagala kagiatan, boh prakna boh gagasannana, numpu ka dua inohong : MJ jeung Ua Sas. (Kadieunakeun nambahan: Apih Sidik). Jabatan-jabatan nu lian, bendahara atawa sekretaris, teu jalan pisan. Lian ti eta, komunikasi jeung nu lian (boh sasama pangurus atawa anggota milis) malulu ngaliwatan milis. Tangtu bae di luar MJ jeung Ua Sas. Pajemuhan darat nu aya, leuwih loba dieusi ku silaturahmi ilaharna ditambah ngobrolkeun perkara lian. Kumaha ngokolakeun yayasan salaku organisasi, nu boga karep ngarangkul anggota milis, jeung migeykeun Ki Sunda, tara katoel. Cukup dina milis. Ku alatan kitu, YP kudu jadi organisasi darat. Lain organisasi milis, nu boga watek nipu: Siga nu heueuh, tapi dina prakna ngabulasin. Hartina, komunikasi di darat di antara pangurusna kudu dikerepkeun. Misalna aya rapat mingguan atawa bulanan. Malah, perkara model, keur ngigelan gaya pupuhu salila ieu, sakaligus nambahan pasukan, aya nu ngusulkeun sangkan nyieun Pangurus Harian. Nya ieu nu ngokolakeun organisasi sapopoe teh. Pupuhu jeung nu lianna, alatan ku kaweur ku pagawean lian, nu leuwih wajib, nya cukup nitenan ti kajauhan. Paling dina waktu-waktu nu ditangtukeun narima laporan jeung ngaevaulasi. (Kuring sorangan ngusulkeun model lembaga, ambeh nu ngurusna asa diaku jeung otonom). Ari perkara TI jadi salah sahiji perhatian pedah bae YP atawa Kusnet deukeut jeung internet. (Malah aya nu nyebutkeun, urang Kusnet teh umumna jarago IT, salila eta euweuh organisasi ka-Sunda-an nu museurkeun perhatiannana atawa mere perhatian nu leuwih kana soal TI ieu, kaasup organisasi nu ngadangkal ngaropea atawa ngamangpaatkeun milis-milis wewengkon nu aya salaku media komunikasi jeung balarea, munasabah mun perkara ieu nu malah jadi domain YP-Kusnet. Paling heunteu jadi salah sahiji concern YP-Kusnet). Lian ti kitu, perkara ieu jadi salah sahiji pasoalan nu disanghareupan urang Sunda. (Oge Indonesia. Tingali rubrik TI Kompas poe ieu). Tugasna, lian ti nyieun proposal usaha warnet atawa usaha provider pisan nu sipatna profit oriented, oge ngusahakeun nyieun model warnet keur di pilemburan nu hartina kudu murah, boh investasi jeung teknologina, boh beaya operasionalna. Tangtuna ngukur kana infrastruktur nu aya kiwari. Oge, mun teu salah, komisi TI ieu oge boga tugas ngarumuskeun kawijakan pengelolaan website nu aya di lingkungan Kusnet. Naha rek jiga salila ieu: Ukur jadi tempat arsip naon nu geus aya dina milis (bari dina milis sorangan aya fasilitas file, nu oge bisa dipake jadi tempat arsip. Atawa, keur hal-hal nu sipatna dasar atawa reference, ku naon teu dialungkeun bae ka wikipedia bari jelas sumberna? Bari dina pangwilujeng ka anggota anyar, file atawa lema wikipedia teh diwawarkeun), atawa rek jadi situs berita, atawa database ekonomi atawa budaya Sunda, atawa database (profil) anggota Kusnet, atawa sakalian jadi portal pikeun sakabeh web nu aya pakaitna jeung Sunda? Udagannana, nya taya lian sangkan potensi nu aya (waktu, tanaga, oge dana) efektif jeung efisien bari keukeuh hayang nambah rengrengan SDM nu miboga spirit pergerakan atawa volunteerisme, visi, oge kapercekaan teknis. Perkara kumaha ngokolakeun milis Kusnet ge, mun teu salah deui bae, kaasup tugas ieu komisi. Di antarana: Kumaha ngaoptimalkeun fitur-fitur nu aya dina milis sorangan pikeun kapentingan Sunda. Contona: Survei ngeunaan gajih anggota milis (survei panghasilan urang Sunda), seni Sunda nu dipikaresep, presepsi ngeunaan politik atawa hiji inohong, milih pangurus yayasan, ngaoptimalkeun fitur database, jste. Lian ti eta, perkara ngaoptimalkeun media massa, kaasup ngeusi acara di radio, gawe bareng jeung media citak nu aya, ngawangun radio internet, agen iklan pikeun acara-acara/rubrik kaSunda-an di radio atawa media citak, oge jadi garapan ieu komisi strategis. Hanjakal, naon nu ditaratas dina DES teh ngabuntut bangkong. Lian ti perkara waktu jeung pipikiran nu kacoceng ku urusan lian, mis komunikasi antara anggota DES sorangan, antara anggota milis, atawa antara pangurus YP, oge ngagunduk bari teu kaburu ditugaran. Antukna, eta momentum teh kaburu pareum bari teu kungsi kamangpaatkeun. (Conto mis komunikasi: Perkara DES nu dianggap organisasi -- malah organisasi tandingan YP -- perkara ngamangpaatkeun PT nu aya, nu dipiboga ku salah saurang anggota milis, nepi ka nganggap koperasi atawa PT ngan hiji-hijina opsi dina perkara ekonomi, atawa perluna nyieun organisasi lian di luar YP). Tah, meneran lima taun YP ayeuna, saha nu nyaho hal-hal nu geus ditaratas tadi teh bisa dibuka deui. Bari dilakuninglaju. Lain rek neruskeun papasean atawa pacengkadan. Tapi, sabalikna: Kumaha YP-Kusnet, bisa optimal. Boh salaku organisasi nu berbadan hukum, boh keur ngawadahan (kaasup ngamekarkeun) potensi anggota milis. Oge salaku wadah nu ngilu ngaronjatkeun karaharjaan bangsa Sunda. Bari tetep nyekel udagan nu pangdeetna: Ngajaga silaturahmi jeung duduluran di antara anggota Kusnet sorangan. Shalawat sareng salam kapihatur Purnama Alam, Muhammad SAW, kalih kulawarga, rengrengan sobat-sobatna, oge kum ka sakur nu percaya kana naon nu dicandak ku anjeunna. Amin. Salemba, 12 Januari 2007
Maman Gantra Jalan Salemba Tengah 51, Jakarta 10440. 0812-940-5441 --------------------------------- Don't get soaked. Take a quick peak at the forecast with theYahoo! Search weather shortcut.
