[UrangSunda] Budaya Sunda, haturan : Teh Tien sareng Teh Tienka

[Didin Kustandi]

 
Teh Tien, sareng Teh Tienka, kumaha daramang ?
Ih, ieu dua putri :
duka pedah sami-sami papada istri,
suka pedah sami-sami urang Sunda,
duka pedah sami-sami papada Tien,
nu puguh mah patarosan ti ieu dua Teteh teh bet saragam pisan :
 

Perkawis budaya Sunda (nu kumaha )?
Perkawis pasipatan urang Sunda (nu kumaha) ?
Perkawis nyandung (naha leres budaya Sunda) ?
Perkawis wanoja Sunda (naha leres sok ngagoda) ?
 
Waleranana, sakaterang kang Dien mah kieu.
 
1.      Perkawis budaya Sunda.
Urang kawitan ku ugeran atanapi wangenan naon anu disebat budaya. 
Budaya teh taya lian iwal ti ciciptan manusa minangka tarekah geusan bisa ngawujudkeun hirup kumbuh, nyaeta hirup babarengan sabilulungan.
Luyu sareng wangenan di luhur, anu disebat Budaya Sunda teh taya sanes iwal ti pirang-pirang tarekah Urang Sunda geusan ngawujudkeun Pakumbuhan Urang Sunda.
Gumelarna wangenan anu kahiji (umum) rupina kajurung ku kanyataan yen manusa moal tiasa hirup di ieu dunya upami teu dibantu ku manusa anu sejenna. Cobi mangga perhatoskeun kumaha teu walakayana orok beureum. Bakal kumaha jantenna upami dilurjeunkeun sakarepna. Sarengna deui, numutkeun para ahli anu garetol nalungtik makhluk hirup di ieu dunya, orok manusa mah teu aya sasamana dina hartos teu walakayana.
Di satungkebing langit-satangkaraking jagat teu aya orok nu teu daya teu upaya kajabi orok manusa ! Rupina eta margina karuhun urang ngalandih karep, sanes “orang” sanes “uwong” nanging “manusa” hartosna cenah “mana nu sia ?” da geuning sagala ti batur, sagala meunang batur, sagala pamere kaheman batur. Lajeng kumaha saterasna ? Gumantungna ka jalma sejen teh sihoreng sanes ngirangan, malah nyata kalah nambahan. Geuning aya paripaos “leutik ku leutikna, gede ku gedena”. Mekarna manusa ngabanding rampak (berbanding lurus) sareng  gumantungna  ka  manusa anu sejenna.  Ku jalaran eta, “logika” tos miheulaan, kedah
 kumaha sangkan pangabutuh katedunan. Waleranana, singket pisan “Ulah matak dijauhan batur !” Sayaktosna ieu pisan dadasar budaya anu utama dina hartos sagala rupaning tarekah, teu weleh nyoko ka dinya. Cobi geura lenyepan rumpaka (buhun) pupuh pucung : “Utamana jalma kudu rea batur, keur silih tulungan, silih titipkeun nya diri, budi akal lantaran ti pada jalma”. Kumaha carana ? Kedah uninga sangkan urang tiasa nyinglar naon rupi anu bakal mawa balukar jauh jeung batur dina hartos dipikangewa. Atuh kantenan, adat, tabeat, watek, sareng pasipatan jalma kedah janten bahan tinimbangan anu utama. Kersning Gusti Nu Maha Suci, adat-tabeat manusa teu dipola ti dituna nanging diwangun ku pangaruh alam sabudeureunana, kayaning ku pangaruh sasama manusa, ku pangaruh geografi, ku pangaruh flora sareng fauna sareng sajabina anu disebat lingkungan tea. Nya ku kituna,
 adat-tabeat manusa anu aya di lingkungan anu sami mah tiasa disebat saragem. Nanging upami noong ka tebihna, tangtos bakal katingal yen alam teh rupa-rupa, ngandung hartos budaya manusana oge tos pinasti rupa-rupa. Buktosna, geuning aya budaya Sunda, aya budaya Batak, Bugis, Toraja, Bali, sareng anu sanesna. Eta teh nembe di Indonesia anu ngan satalapok jengkol ! Kacindekanana, budaya mah “produksi dalam negeri” dina hartos sanes “barang imporan”.
Cirina :
a.       Pituin meunang nyieun nu bogana.
b.      Fungsina : geusan ngahirupkeun pakumbuhan jeung sasamana.
Wujudna :  
Mangrupi papagon anu ngatur :  UCAP – LAMPAH – PARIPOLAH
Tah, tah, tah, rupina ieu anu janten bahan patarosan Teteh-Teteh teh, UCAP anu kumaha, LAMPAH anu kumaha, sareng PARIPOLAH anu kumaha  anu luyu sareng budaya Sunda teh ? Leres kitu ? Leuh atuh, sanes tataaneun dina serat nu kitu mah. Bet ieu oge kapan tos sakieu ngagebayna. Angguranan urang jantenkeun bahan diskusi wae yuuuuu !
Prung lah, ngarah rame ! Asal ulah ambek we, bilih engke janten pasea, pan bahaya !
2.      Perkawis pasipatan urang Sunda.
Teh Tien, Teh Tienka, nu gareulis, anu balageur,
Patali sareng pasipatan Urang Sunda, saleresna kang Dien teh nuju milarian kekecapan basa Sunda anu teu aya babandinganana sareng basa nu sejenna. Kitu peta teh jalaran kapangaruhan ku pamendak salah sawios elmuwan, anu duka teuing saha namina (da nyaeta hilap deui), cenah pasipatan manusa teh kagambar dina basana anu teu aya babandinganana dina basa anu sejenna. Ulah lepat, maksadna sanes tarjamahna, tapina anu sawanda. Tah ku kituna, ayeuna kang Dien malik ngurihit, panuhun pangmilariankeun ! Engke upami tos ngempel, urang guar sasarengan dugi ka kapendak pasipatan Urang Sunda nu saleresna. Omat, nya !
Kanggo saheulaanan mah, ieu bae : 
Clom, kunyunyud, giriwil !
Ieu babasan nuduhkeun kalakuan koreh-koreh cok, harita ngoreh harita macok ! Nu kitu teh kapan kalakuan hayam nu teu wawuheun sareng visi, missi, tujuan, sareng program da nyaeta kapan teu kagunganeun wawasan. Kakara gawe sabulan, kahayang geus ngawang-awang, leuheung basa mun katedunan, kumaha mun teu kaladangan ? Tapi kawasna mah ieu yeuh bibit panyakit korupsi teh ! Kulantaran hayang gancang geura beunghar !
Giri lungsi tanpa hingan.
Duka naon tujuanana, urang Sunda sok api-api. Api-api tea kapan tebih ti bukti. Api-apina kitu, padahal kieu. Api-api teu boga duit, padahal saku merekis. Api-api sudi najis, padahal nu saenyana, kapieling unggal usik ! Tapi ketah, kadang-kadang mawa rejeki tah sakadang api-api teh. Contona ? Jaman Ciamis subur ku cengkeh, caturkeun aya aki-aki kuleuheu ningalian motor nu ngajajar di tokona. Si Toke nu boga toko meureun heureuy maksudna mah, ngaheureuyan si aki tea, pokna ”Naon, ki, motor ? Pek pilih hayang nu mana, satengah harga ge dibikeun  ka  akina,  asal kontan we ayeuna !” Kumaha walon si aki ?  ”Ah, bet saparapat harga gen biheung kabayar ku aki mah !” Si Tokeh ngagakgak kawas nu bungah,
 bari terus ngahoak deui : “Saratus ribu we atuh ki, sok kadieukeun duitna !” Nyaan ? Enya, sok kadieu ! Ke heula sakeudeung ! Kituna teh bari ngagupayan Pulisi nu kabeneran jaga di parapatan. Saur si aki ka Pulisi : “Pangneleponkeun anak aki sina kadieu !” Waktos si Pulisi naroskeun saha, di mana, si aki ngaharewos duka naon. Orokaya, si Pulisi rampang-reumpeung bari terus masang HT-na. Ukur selang satengah jam, naha atuh ari kurunyung teh ……. Kapolres ! Motor tilu dibayar tilu ratus rebu, padahal hargana nu saenyana, hijina teh satengah juta ! Aya sabaraha cing, artos si aki dina kantong butut urut sakola budak teh ? Cenah teu kirang ti tilu juta ! Ladang cengkeh nu katarima cikeneh ! Heheheeeeh !
Kurung batok.
Rumasa teu rumasa, Ki Sunda teh boga sipat kurung batok, kanyahona ukur nu aya dina batokna, batok batur dianggap kosong molongpong, pangrasana :  ing-ter-ing-ter-ing-ter-ing !  (dilagukeun tea geuning) turdo ! turdooooooooo ! Kitu geuning saur Mang Koko !
Yu, urang piceunan sipat goreng model kitu !
3.      Perkawis nyandung.
Kang Dien bade malik tumaros : Dupi Hamzah HAZ urang mana ? Dupi Puspo Wardoyo urang mana ? Dupi ..... ah da seueur nu nyarandung mah ? Naha geuning bet nuding ka Urang Sunda ? Yeuh Teteh, bilih teu acan uninga, Urang Sunda mah dienyana oge daek nyandung ………… da tara dibeja-beja ! (eh bit, ketah !). Sanggem kang Dien mah kieu : ayana nu nyarandung teh kumargi aya tilu faktor pangjurung. Faktor kahiji, aya (pameget) nu hayang nyandung. Faktor kadua, aya (istri) anu daekeun dicandung. Faktor katilu, aya Panghulu anu daek …. mangnyandungkeun ! Lebah dieu mah ulah nyarioskeun larangan da kapan parantos sidik nu resep ngandung mah pastina oge resepeun ………… kana larangan ! (ha ha ha ha !).
4.      Perkawis wanoja Sunda.
Upami ningal kahirupan jaman ayeuna, beuki eces, beuki jentre linuhungna sepuh kapungkur. Nyata waspada bakal kumaha balukarna mun wanoja Sunda dialabur sakarepna. Kapan kapungkur mah wanoja teh kalintang diapingna. Teu kengeng luar-leor sosoranganan, komo upami tos nyedek ka sareupna, ih, dipahing pisan. Paribasa sanekala ! Kelong Wewe ! Wah rupa-rupa tea wae. Sihoreng teh, matak awon balukarna. Nanging sok sanaos kitu, ulah salempang da sadayana ge aruninga, yen istri teh kabagi tilu rupi. Sadayana pada uninga anu istri padati, anu mana istri japati, sareng nu mana istri sajati.
 
Cag !
Kang Dien
		Do you Yahoo!?Friends.  Fun. Try the all-new Yahoo! Messenger


Komunitas UrangSunda --> http://www.UrangSunda.or.id









Yahoo! Groups Sponsor


  ADVERTISEMENT 












Yahoo! Groups Links

To visit your group on the web, go to:http://groups.yahoo.com/group/urangsunda/ 
To unsubscribe from this group, send an email to:[EMAIL PROTECTED] 
Your use of Yahoo! Groups is subject to the Yahoo! Terms of Service.