Precedence: bulk Hersri Setiawan: PERI KEANJINGAN sebuah cerita singkat untuk Oom Sobron BLAK-BLAKAN aje cerite singkat ini gue tulis lantaran kepancing "Serba-Serbi" sampeyan nyang "aneh-aneh" nomor 26 itu. Pasalnye? Sebab di Aneh-Aneh ke-26 itu ade sampeyan singgung Mas Hersri. Walowpun singgungan itu singgungan nyang bekesayangan, sehingge tentu aje gue kagak bakalan merase kesinggung. Mongkok malah! Tapi, sebelon gue terus nerocos bercerite, baek gue kasih dulu sekedar pertanggungjawaban. Duile, ge-ernya gue ye Oom!? Kayak wakil rahayat hasil pemilu aje: pertanggungjawaban. Keren amat! Oke deh, pokoknye - nah lu, pokoknye lagi! kayak diskusi fraksi aja - ya, fraksi mane aje punye kata azimat sama dan tunggal: "pokoknye ...") gue terus. Yang gue mau kasih pertanggungjawaban itu ade tige macem. Pertame, kalow gue panggil sampeyan "Oom" jangan kesinggung lho! Gue cuman memposisikan diri pada anak gue nyang semate wayang, si Ken, demi angetnye silaturohmi antar- kite. Percis sama seperti sampeyan nyapa gue "Mas". Walowpun sampeyan udah banyak makan tempe, gue tetep aje nggak percaye "mas" nyang keluar dari lidah Belitung itu "mas" beneran. Cuman (gue ngikutin Mas Pri, nah ini baru mas beneran!, Tomodihardjo), demi santun persudaraan atawa santun pergaulan, nyang itu tersirat pada santun kebahasaan. Kedue, gue pake kate-kate "cerita singkat". Perhatiin deh. Bukan kate gabung "cerite pendek" alias cerpen. Gue sengaje ngehindar dari peristilahan dunie sastra: cerpen nyang salah satu genre daripadanye. Sebab, kalow gue bilang nulis cerpen, artinye ngeklim supaye gue dimasukin di golongan pujangge atawa sastrawan. Itu mah kagak gampang, pan Oom? Sebab dunie sastra, Indonesia nyang pasti, pan punye "Paus". Paus Sastra! Hans Bague Jassin itu lho! Ape die udah lengser atawa belon, itu sih laen pasal. Budaye pikir kite, walowpun udah lebih setenge abad sungsang sumbel berjuang ngebangun Indonesia nyang Republik ("respublica" nyang mustinye ya otomatis "demokratis"), kenyataannye mah masih tetep budaye peodal bin paternalistik. Akibatnye, Paus Sastra Indonesia pun lantas ade banyak: dari nyang paling gede di atas, terus ke bawe sampe nyang paling gurem. Bukan berhenti di situ aje. Di atas nyang paling gede nyang pribumi itu, masih ade yang lebih gedean, non-pri tapi bukan Timur Asing, nyang bersemayam di Dunia Barat. Itulah Propesor Teeuw, Paus Sastra Indonesia Modern nyang paling top! Suse ye Oom? Gimane sih care ngelamar jadi sastrawan Indonesia? Tolong dong, gue dibantu! Ade calonye kagak sih? Tige, ini juga alesan, mengape surat ini gue tulis dalem basa Indonesia seenak gue. Toh Indonesia bukan Melayu saja, bukan Jawa thok, bukan Batak Sunda Betawi doang, dan bukan nyang mane-mane di seantero Sabang Merauke. Indonesia pan mencakupin semue-mue itu. Tapi Oom, gue kagak ade maksud bikin base Indonesia mosaik atawa Indonesia gado-gado. Sama seperti Ki Hajar Dewantara. Ketika die bilang "kebudayaan nasional ialah puncak-puncak kebudayaan daerah", tentu kagak ade maksud bikin kebudayaan baru ala baju antakusuma! Tau, ape tuh baju antakusuma? Itu baju pusake hadiah dewate untuk Gatotkaca. Orang Jawe bilang "kutang ontrokusumo", nyang dengan ini si Gatot mampu terbang sonder sayap. Wujudnya sih sederhana dan norak aje: gombalan berbunga warna-warni ditambal-tambal jadi satu. Tapol di Buru dulu kasih name baju 1001 tambalan begitu, sampe kagak tau lagi mane nyang ditambali dan mane nyang ditambalkan, baju "buto" alias baju raksasa. Istilah jaman pasca-Prabu Suharto 'kali "baju reformasi"? Nyang, maunye, cuman tambal sane tambal sini! Jadi, Oom. Base yang gue pake base Indonesia seenak gue, tapi dengan basis base Betawi. Kenape Betawi? Pertame, gue simpati ame base ini. Base Betawi ini punye nasib nyang sial. Percis kayak base Cine deh. Digusur oleh Orde Baru Suharto. Bedanye, base Cine digusur pake ketetepan Presiden (Suharto, siape lagi?), base Betawi digusur pake buldoser dan tongkat golep. Orang Betawi mundur bubar entah ke mane-mane. Gambang kromongnye udah kagak pernah kedengeran, kesenian lenongnye - yang gue liat di teve Jakarte bulan April lalu - aduh mak, nggak ketulungan lagi deh! Bukan lagi lenong tuh, tapi ketoprak Jawe ala sinetron! Kedue, gue kesengsem ame base Betawi udeh sejak taon 50-an, selagi becak-becak Abang Betawi masi berhias bulu-bulu ayam, dan bunyi belnye "rekotoook!" kayak gembreng kaleng amoh. Telebih lagi semenjak Bang SM Ardan (ke mane tuh die orang?), akhir 50-an, selalu tampil di majalah sastra "Kisah". Buat gue waktu itu, "Kisah" tanpa kisah Betawi Bang Ardan, nggak bisa dibilang berkisah deh! Sama seperti "Suluh Indonesia", belakangan, tanpa Firman Muntaco suluhnye jadi kagak menyale! Ya pan? Revenon à nos moutons: Peri Keanjingan. Cerite ini berasal dari pengalaman gue di hari-hari pertame bekenalan ame gaya idup orang Belande di Amsterdam. Ya Oom, di "Serba-Serbi" itu sampeyan cerite tentang orang Kulitputih mancing ikan, nyang sesudah dapet, ikan nyang udah terluka itu dilepas lagi ke aer. Jadi, biar imbang, sekarang gue cerite tentang sikep orang Belande teradep anjing piaraan mereka. Kami - gue, istri dan anak - tiba di Amsterdam di suatu taon dalam awal minggu ke-2 Desember pagi-pagi sekali. Kabut basah pekat dan, rasa gue waktu itu, dinginnye naudzubile deh! Dijemput oleh sudare-sudare istri, langsung kami mereka bawe ke pinggir kali Amstel di bilangan Amsteldijk, ke satu "woonschip". Apa ya istilahnye, kalau di kite? Di Cilacap kite punye "kampung laut". Juge di Buru Utara - di sana dinamain Kaki Aer. Tapi itu kampung terdiri dari rumah-rumah biase, bukan kapal atawa perau yang dibuat tempat tinggal. Makanye kite ambil oper aje deh istilah Belanda itu: wonsekip. Setuju kan? Turun dari mobil, ipar gue kasi peringetan, berseru: "Hersri! Liat bawah, di sini Amsterdam banyak tai anjing!" Bener memang. Di sana-sini tai anjing di trotoar. Andaikan pada gue, begitu tibe di Negri Belanda, terjadi ape nyang orang bilang goncangan budaye, "culturele schok", pertame-tame ya tai anjing inilah yang membikin aku sekok. Untung ... Nah lu Oom, keluar jawe gue yah, selalu aje "untung"! Untung. Bagi perbendaharaan batin gue, anjing bukan hewan najis bin haram. Di pulow purgatorio Buru daging anjing malah selalu dinikmatin oleh tapol-tapol secara diem-diem. Bukan cuman nyang tapol Kristen dan Abangan doang, tapi juga tapol- tapol muslim ikut menikmatin. Dengen tenang mereka belindung ke hukum "keadaan darurat"- sebagai tawanan yang harus bertahan hidup. Itu tentang hewannye. Si Anjing. Padahal ini cuman tainye. Tai anjing tak lebih dari benda najis biase. Sama halnye dengan setiap faeces ialah "kotoran". Laen dari tai babi. Kalow ini sih, bener-bener najis bin haram bin bahaye. Jadi musti disingkirin. Sebab, kalow sampe keinjek, kaki kite bakalan melonyoh bengkak-bengkak beraer, dengan rasa gatel dan panas. Begitulah Oom. Di sabana dan hutan-hutan pulow Buru tai babi, di jalan-jalan dan taman Amsterdam tai anjing. Najis! Pada satu ari kami bertige (aku, istri dan anak) ke stasion Amsterdam CS - bukan kependekan dari Comite Seksi, tapi Centraal Stasion. Di sepanjang jalanan menuju stasion pemandangan nyang paling merebut perhatian gue kagak ade laen: Sang Anjing. Ade orang yang menggandeng anjingnye dengen rante, dan sabar menunggu selagi Sang Anjing mengangkat kaki sebelah di bawah tiang listrik, membuang hajat kecil; ade nyang menarok hewan kekasih itu di keranjang, dan digantung di depan setang sepedanye; ade anjing nyang diberi iket kepala bersetrik pita merah, diberi busana bagus penutup tubuh dan diemban hangat di depan dade. Ade lagi seorang ibu mude dengan anjing di gendongan, sedang anaknye sendiri - nyang belon terlalu pandai berjalan - terseret-seret di gandengan tangannye. Sama dengan pemandangan di jalanan setapak di sela- sela kusu-kusu di pedalaman Buru. Si ibu menggendong babi, si anak dibiarin jalan sendiri, si bapak di belakang mengawal dengan tombak di tangan! Akhirnya duduklah kami di bangku peron. Menunggu kereta api jurusan Abcoude. Mata gue tertumbuk pada pemandangan yang berkontras. Di arah sane lemari-lemari kuning otomat menjual karcis kereta api, di sane lagi lemari-lemari coklat otomat menjual berbagai macem coklat dan minuman kaleng. Di bawah sana tadi malah antrean panjang, orang-orang minta duit pada tembok! Itu pemandangan yang satu. Manusia dilayani oleh mesin- mesin nyang setia, jujur, adil, dan kagak mau disogok atawa korup. Toh pasti sang Mesin kagak kerje demi kesadaran akan peri kemanusiaan! Tapi, kalow dibawe ke Indonesia, 'kali bakalan disambut tiga penggede monopol Pancasila. Cak Ruslan Abdulgani kasi piagam lulus penataran P-4! Bung Harmoko kasi pedato puja-puji, dan Pak Harto pukul gong. Lantaran mereka itu mesin-mesin nyang pinter bin prigel ngamalin Pancasila, paling dikit satu sila dari sila-silanya: yaitu Sila Peri Kemanusiaan yang adil dan beradab! Pemandangan yang kedua. Kembali lagi mata gue ketumbuk pada Sang Anjing. Seorang perempuan setengah umur (umur rata- rata Indonesia, bukan Belanda) dengan seekor anjing di pangkuan. Dielus-elusnye anjing itu tak henti-henti, diajak bicara, diangkat-angkat moncongnye ke depan wajah sendiri, dan berulang-ulang diciuminye. Adapun Sang Anjing, seperti tabiat semua anjing (baek anjing nyang paham base Belanda maupun nyang ngerti base Jawe), adatnye cuman ngejulur-julurin lidahnye sembari napasnye terengah-engah. Kadang lidah itu menjilat-jilat moncong sendiri, dan kadang menjilati pipi si Pemiara. (Oom! Cemburu nih, ye!?) Terkelebat di angan-angan gue baris-baris lagu "Lebur" karangan FX Sutopo. Pelahan gue menyanyi: Di dalam aku mencari tertumbuk pandangku o, dewi aku butuh cintamu engkau butuh hatiku dst. dst. + Orang sini rupanye udah meliwati tahap peri kemanusiaan? Kata gue pada istri gue, sembari mengusap-usap rambut Ken yang ketika itu enam taon. - Huh! Jangan lu kaget kalow nanti udah liat gaye idup orang Barat. Gaye idup nyang sebenernye kagak lagi menyentuh idup nyang sebenernye ... Lu bise ngerti nanti, kenape gue lebih suke hidup di negrimu ... - Jadi lu nggak percaye ame kampanye green peace? Bantah gue. Walowpun itu pelaksanaan maha terlambat semboyan renesans zurück zur Natur? - Bisa percaye bisa kagak. Cuman nyang pasti, itu gerakan arus bawah nyang sangat kecil aja ... Lu pikir kite di sini udah lewat tahap peri kemanusiaan? Udeh masuk peri kebinatangan dan peri keanjingan? Lantaran Pangeran Bernhard mimpin WWF dan mevrouw di sana itu menciumin anjing? - Lantas? Gimane lu nerangin semuanye itu? Lu bilang ade klinik binatang di Utrecht, ade toko busana anjing di Amsterdam ...? - Gimane? Barusan lu nyanyi lagunye FX Sutopo. Nah itu 'kali jawabnye: mengisi idup. Jangan juga lu lupa. Siape tuh nyang menabur benih-benih peperangan di Afrika, kemelaratan di Indonesia dan di Dunie Selatan umumnye? Ape itu lantaran jaman Peri Kemanusiaan udeh liwat? Gue diem. Istri gue juga diem. Ken menabur remah-remah roti pada merpati-merpati dan burung-burung gereja nyang datang berkerumun. Di angan-angan gue hadir bayangan Ibu Theresa nyang bertubuh rapuh tapi berhati mulia. Kate-kate ucapannye seakan bergaung memenuhi bangsal stasion: "Setidak-tidaknya biar orang-orang ini, meskipun baru sesudah meregang di ujung maut, tau dan merasa pernah mendapat kasih sayang tangan sesamanya di dunia ..."*** Kockengen, Juli 1999 ---------- SiaR WEBSITE: http://apchr.murdoch.edu.au/minihub/siarlist/maillist.html