Bas jaman orba sienggo male nderbih, bagenda kenca ndiher pemilu, tuan-tuan per politik mulai me kuskas pekena-kena siding nidingi sora sirulo. Ndukur pengaci sihari-hari omong kosong pe ersora tekuak-tekuak, ngataken maka rayat sirulo ngarapken simbisa percapah mbelang bapak pembangunen tetap jadi sinatang layar-layar. Tuan simbisa pe alu semangat jawana mulai nguta-nguta ngeresmiken hasil-hasil pembangunen.
Ibandingken ras jaman reformasi si la erdalan enda lit kang kepe perbalirasna. Tuan perpolitik persebak lepat enggo mulai nguta- nguta, ncage sora ndukur pengacina pe lit ka perserina, tekuak ia. De ndukur tekuak, ma lo banci mejile kel sorana, sebab biasana simejile pertekuakna manok sabugan. Sekotan lit perbalirasna, tentu la ka bo kurang-kurang perlainna. Misalna, bas jaman orba, sope simbisa berkat nguta-nguta, dalan kukuta ipesikap-sikap, si la alus i per alus, si jelbek-jelbek irataken. Baju kaos parte juak-juak pe ibagi-bagiken man rayat sirulo kuta. Mon-mon gedung seba-guna pe enggo ka ipajekken leben. Tah serpi membangunenna e rehen (pinjamen) nge kerina e lain ka soalna, me kin? Adi jaman reformasi enda, dalan si la rata tahpe sijelbek- jelbek tuhu lanai lit, sebab enggo jadi paya. Jandi erjandi mehuli kepe sipenting akapna. De pembagian baju kaus nge pe kap, e ada me ah. Tole nari perlainna, ibas jaman orba, seh warina simbisa erpidato i kuta-kuta, cirem erbuat ipekena-kenana, cakap medate mehuli ibelas- belas. Arah pudina, biang perburu la ketadingen kuskas dingen penges- nges ipen pebiar-biar kalak, mpersingeti gelah ula lupa milih simbisa bas pemilu sireh. Bas jaman reformasi enda banci jadi labo bage kel me? Egia uga ningkena le. Uga nindu Pa jungut, sentabi ula aku jungutindu Lih gia melawen kam ku alo2.