Soal gelar kepeken persoalen simbelin bas kegeluhen manusia sebelang- belang doni. Tah piga ribu kali enggo runggu-runggu netapken sada gelar bas doni enda kuakap lanai bo terkira. Megati terbegi gelar sada negara, kota, tahpe ingan, salih-salih ia.
Kota Mumbai si bom kalak ndebih, nai gelarna "Bombay", tah kai sebabna maka isalihken gelarna, labo jelassa kel. Mungkin tah mela kalak India gelar kotana rusur i jadiken jadi gelar pia/bawang (bawang bombay), tah mungkin perban biarna i bom kalak, jadi alergi man kata bom, e lo jelassa kel. Bageka pe gelar kota "Makasar", nai pernah gelarna Makasar, basa sada masa salih jadi "Ujung Pandang", ncage salih ka ngolihi ku "Makasar". Kuakap alasenna pe labo perbahan tabehna nanam "coto makasar" meikin? Tentu melala alasenna, sijelas, teridah makana gelar-gelar resmi sibage rupana la gel-gel, la abadi, banci saja isambari katawari pe, sipenting sue ras peraten si erkuasa . Ertina "KEKUASAAN" e me sipenting. Kai pe ninta adi lolit pengkebetta lo diate kalak pe. Taren-taren cirempu bas wari mbergeh negeri kepar enda, teringet aku persoalen gelar bandara "kuala namo". Kita tempa-tempa merhat maka ibas penggelarenna teridah me "karo". Alu alasen utama maka taneh kuala namo taneh ulayat kalak karo. Tentu lit ka tambahen alasen sideban, misalna soal kata "Kuala" ras "Namo". Nina permen kami Kuta Nangka nari, "Kuala" yang dalam bahasa Karo artinya pertemuan antara dua buah sungai dan "Namo" yang artinya adalah pulau kecil di tengah-tengah sungai.." Lit ka tempa perpayona kai sinibelasken permen kami. tapi, sentabi, tah lit ka nge tik ah je sikurang tintang. Arah kutanta ah "namo" ertina lau neng-neng ibas ingan-ingan tertentu i lau mbelin simaler. Adi kata "kuala", senembas payo ertina bagi sinibelas permen kami, tapi ibas pengertin cakap melayu. Adi bas cakap karo tah banci jadi lit lainna sitek. Buktina, ibas cakap melayu melala kel penggelaren kuta "Kuala ". Umpamana Kula Tungkal, Kuala Lumpur, Kuala Terengganu rsd rsd. Bas kita kalak karo, sipernah kubegi gelar kuta, sada ngenca, emkap "Kuala" deher Tiga Binanga Singalor Lau. Lalit tambahen embel- embel kata sideban, "Kuala" saja. Mungkin pengertinna bali ras "Ku Ala" si ertina menghadap kedepan. Alu bage maka pengertin "Kuala Namo" bali ras "menghadap ke namo, menghadap ke air yang tenang. Jadi tuhu jelas-jelas empu kata "kuala namo" lalit sideban, sekotanken kalak karo. Emaka payo kel nge min adi ninta oratna nge gelar bandara e pepagi teridah me-karo. Ninta, nina kalak ah? "Benar tanah itu dulunya tanahnya Orang Karo, tapi sudah kami beli dari pemiliknya, jadi soal gelarnya suka-suka kamilah". Nina Uga ninta?? Ersimulih man KEKUASAAN adah ndai. Uga maka kita banci erkuasa?? Io'oh ., rumput yang bergoyang ka me sirulah jadi ingan penungkunen arih? Adi dukut simole-ole beloh ngerana tentu jababna: KEKUASAAN labo banci reh bage-bage saja, arus lit perjuangen. Gelarna pe perjuangen, melala romantikana, talu menangna tergantung man kekuatennta. Uga maka kita kuat ibas lorong-lorong hukum negara? Tentu melala carana, mari sicakapken ras-ras, ula bual-bual saja. Ertina, serius, pake otak, sistimatis, terorgainisir dengan baik. MARIKENA . .nina lagu Ramona. Ngerana kerna perjuangan yang "bersifat kesukuan", mon-mon terjebak ka kita bas belas2 /jargon "Nasionalisme", tapi kenyataanna kerina suku erjuang sendiri2. Lenga lit beritana kalak A i Sumatera berjuang demi kalak B i pulau Sulawesi. Ea'ah, lompat-lompat ka pe cakapta ku soal kekuasaan, soal gelar nge ningen ndai indong bual. "Kasihan kalilah Soekarno dan Hatta itu ya, tiap hari diinjak-injak orang, tempat segala kotoran manusia dibuang, tempat korupsi dan lain- lain", nina sekalak teman, maksudna Gelar Bandara i Cengkareng. Bagem tuhu ari, nasib gelar ras penggelaren ndai. Mejuah-juah kita kerina.
