Bual-bual bas wari-wari lambong bulan biasana kurang menarik
me?. La bagi bual-bual akhir pekan. Bas lambong bulan, taduken
nandangi lume, baka lanai risi, ngalah-ngalah mulai engkolehken kula
daging. Undangen kerja-kerja bas kade-kade nari iantan-antan dingen
nungkirken taduken ngukuri pertama. De undangen meriah ukurlah min la
pe idahi labo min dalih, tapi de undangen nurun-nurun tahpe undangen
kepaten? Ncage mari erbual-bual kita ningen, ma lanai bo banci
santok bual e.
Tapi, bas wari-wari lambong bulan sendah lit kuidah sitek
perlainna. Bual-bual jelma sebelang doni menam2 kerina kerna
pelantiken Barack Obama Sembiring Mergana, eh..simbiring rupana
ningku min , jadi presiden Amerika Serikat, sada negeri si rayatna
mayoritas kalak mbentar.
Umumna kerina jelma muji2 kehebatan Obama, beloh ia nampilken
bana maka terpilih nina. Sebab sedekah enda, menam mustahil kejadin
sibage rupana. Balirasna me i Indonesia, menam-menam si la mungkin
tempa kalak Karo tah kalak sideban sekotan Jawa terpilih jadi
presiden Indonesia. Kepeken siugapa pe banci saja terjadi.
Tapi lit kubegi komentar sekalak teman si agak lain sitek
kerna terpilihna Obama.
Reh nina, labo beloh Obama maka ia terpilih jadi presiden Amerika,
tapi beloh kalak mbentar Amerika nge setuhuna.
Alasenna, keadaan ekonomi Amerika sangana mberat, kalak mbentar
Amerika terbiasa nggeloh senang, enggo kisat susah-susah. Emaka sanga
susah e kam me je nina man kalak mbiring.
Tole nari itambahkenna, kalak mbentar Amerika setuhuna erlajar man
kalak Jawa Indonesia. De susah kenca, kalak sideban angkatna jadi
pejabat, de aman kenca ingan kulo nina. Nai sangana erdemo kalak
kerina, engko me je nina pa Sigit man Pa Ilham (Habibie). Aman kenca
sitek lah gia, kulo ka si erkuasa nina, nangkih me persebak lepat
pengarang lagu jadi simada natang layar. Jelas labo min bage kel
aslina prosesna, tapi hasil akhirna bage me ia teridah.
Bicara la lambong bulan banci saja nge min sipegedang-gedang
ersoal jabab rikut analisa ala DR politik perbual kerna politik Jawa
ras politik mbentar Amerika. Apaika adi ikaitken ras posisinta kalak
Karo i tengah-tengah sang mayoritas. Erkune-kune ukur, sanga susah-
susah ekonomi Indonesia bagenda lah gia, tah sangana nge ndia talang
dalan kalak karo jadi presidenta nateku..
Ea'ah bual-bual lambong bulan tuhu, bual sipaya-paya pe la sehÂ….
Sibarem lebe, taren nimai ahir bulan, wari ngalo gaji pensiun.
