Nguda radu bayak, eme sada kemuliaan bas kegeluhen enda. Tuhu mbue dalan-dalan ndatkensa, tapi la piga jelma sangap banci ngenanamisa. Uga dalanna gelah maka anak muda banci bayak? Ula sungkundu aku, de kueteh, labo sempat bagenda ndoh ngembar-ngembar perdalan ndaram-ndarami pagi rebi, piah tuana ka menda sarudung.
Bas tingkat dunia, sienteremna kel ndatken kesangapen ngenanamisa emkap anak-anak muda si termor-mor bas bidang olah raga ras bagepe seniman (actor, penyanyi rsd) Sada kekecualian i negara si tergelar Rempubilik Indongmanusia, la saja nguda radu bayak sienterem, tapi pe erpangkat ka. Tuhu sienteremna si ngasup ndatkensa tetap ka nge kalak olahragawan ras seniman si termormor (jadi wagub, bupati, dpr). Tapi lit ka sada nari group anak muda sukses, erpangkat radu bayak emkapken group "juak-juak" kalak simbisa. Nguda, erpangkat radu bayak, nina sekalak penulis permilis ncakapken telu senina si sangana har-har bintangna. Sientebu nda kerina sekerajangna, sukses bas perserpin, sukses ban perpangkaten. Jadi idaman singuda-singuda, idaman nande-nande erkelaken ia pe la kurang-kurang. Dalan-dalan kesuksesan si telu senina, bagi katanta ndai, bena-benana lo ndoh-ndohsa, jadi "juak-juak" kalak simbisa. Beloh nampilken bana, beloh muat ukur, ambah-ambah pemetehna ka pe tuhu meganjang, rikut njujuri nasib nibabana. Sangap nasib nibaba, sukses simbisana, serpi ras pangkat ndeheri ia. Io'oh mesera la mesera tempa me? Masalahna, dalan-dalan jadi juak-juak nda labo asal nggit jadi juak-juak saja. De lalit pengkebetta, la ka bo lako jadi juak-juak. Simehantuna me jadi juak-juak ni juak-juak. Encage la ka bo banci rempet-rempet terpilih jadi juak-juak, kerinana erproses. Sada nari, bagi siersumekah enda, lit ka jelma memang la ngasup jadi juak-juak, mbisa ka pe lahang, natap-natap ngenca ngasup. Selamat man kam team sukses,selamat berjuang, mbera simbisandu menang bas pertandingen, serpi ras pangkat nimai kam. Salam Pemilu