Sentabi permilis, enda ka aku reh nehken kata saling-saling, anding-anding pe la seh, kata la tuhu ningen lang, kata payo ningen uga ninta. Engkai maka la bage ningku, lit kin lenggor cikais? Ma labo lit? Uga maka lenggor cikais ningen? Bagi katangku ndai, kata saling-saling kin. Bage ka kin jamanna, si la erpengkebet labo pang kel erbelas terus terang. Naling-naling tik ah, ula ka megangsa, banci ka merawa upas.
Enggo kenca kin simbisa bana cikais, sora cigergona pe i pebelin-belin, gelah maka bagi lenggor terbegi. Ndarami juak-juak ia igejek-gejekenna, sora pergejekna bagi lenggor suari banna, tahsa gelah maka megi kel kerina jelma sebelang doni atena labo siangka kel. Saja em ia, sora lenggor cikaisna enggo terbegi, nimai udanna nari nge, mbera udan ia. Lang biasana de lenggor suari labo lit udanna, apaika lenggor cikais ngenca. Sidah me bagelah. Ula min imbisaken si la erbisa ningen mbarenda, la ka piga simegi, simbisa-bana ah nda nge kupilih nina sinterem arah kepar ah, piah sahun me ia simbisabana. Lang de kutanta ah, adha me ah de per-cikais-cikais kin e orong lebe nina. Emaka bicara gia la pagi reh-reh udanna, lanai bo kita kemamangen me? Egia mbera rehlah udanna arih?