*"திருவிழாவும் மல்லாரி இசையும் ஒரு தொகுப்பு"*

மல்லாரி
மல்லாரி என்பது சாஹித்தியமில்லாத ஒரு இசை வகை. இது நாதஸ்வரத்திற்குப்
பிரத்யேகமாக அமையப்பெற்றது. கம்பீர நாட்டை ராகத்தில் தான் மல்லாரி
இசைக்கப்பெறும். 'ரி' என்கிற ரிஷபம் பிடித்துப் பாடப்பெறும் சலநாட்டையில்
மல்லாரி வாசிக்கக் கூடாது.

ஆகம விதி முறைப்படி அமையப் பெற்ற இவ்விசை மரபுகள் நாதஸ்வர தவில் இசை மூலம்
இன்றும் பழமை மாறாமல் பின்பற்றப்படும் தலம் சிதம்பரம் ஆகும்.

மல்லாரி வகைகள்,

சிதம்பரம் நடராஜர் திருக்கோவிலில் கீழ்கண்ட வகைகளில் மல்லாரி இசையை நாதஸ்வரக்
கலைஞர்கள் வாசித்து வருகிறார்கள்.

* தீர்த்த மல்லாரி:-
இறைமுழுக்கிற்குத் தண்ணீர் எடுத்துவரும்போது அல்லது, குடமுழுக்கிற்குப் புனித
நீர் எடுத்து வரும்போது வாசிக்கப் பெறுவது.

* தளிகை மல்லாரி:-
பெயரிலிருந்தே புரியும், இந்த மல்லாரி இசை இறைவனுக்கு மடப்பள்ளியில் இருந்து
நிவேதனம் எடுத்து வரும்போது வாசிக்கப் பெறுவது.

*கும்ப மல்லாரி:-
பூர்ண கும்பம் கொடுக்கும்போது வாசிக்கப்பெறுவது.

*தேர் மல்லாரி:-
நடராஜப் பெருமானும், சிவகாமசுந்தரி அம்மையும் தேருக்குப் புறப்பட்டுச்
செல்லும் போது வாசிக்கப் பெறுவது.

*புறப்பாட்டு மல்லாரி:-
உற்சவ மூர்த்திகள் புறப்பாடு செய்யும் போது வாசிக்கப் பெறுவது  .

திருவிழாவும், மல்லாரி இசையும் ;
முற்காலத்தில், சுவாமி ஊர்வலத்தின் போது கீர்த்தனைகளோ,வேறு பாடல்களோ வாசிக்கப்
பெறவில்லை என்று தெரியவருகிறது. பல்வேறு நூல்கள், மற்றும் கிடைத்த செய்திகளின்
படிக் கீர்த்தணைகள் முதலான இசை வடிவங்கள் சுமார் 200 அல்லது 300 ஆண்டுகளுக்கு
முன்புதான் வழக்கத்திற்கு வந்துள்ளதாகத் தெரிகிறது. இந்தக்
குறிப்புகளிலிருந்து மல்லாரி இசை பற்றியும் குறிப்பாகச் சிதம்பரம் கோவில் மரபு
பற்றியும் தெரியவருகின்றது.


சிதம்பரம் ஆலயத் திருவிழாக்களில் சுவாமி வீதி உலாவிற்கு மல்லாரி இசையை,
ஒவ்வொரு நாளும் குறிப்பிட்ட முறைப் படியே இசைக்க வேண்டுமென்பது மரபு.

இப்படிப்பட்ட முறையில், நாகஸ்வர இசை உலக மேதைகளாகிய சிதம்பரம்
பெருமதிப்பிற்குரிய வைத்தியநாதப் பிள்ளை, அவர்களுடைய சீடர் மரியாதைக்குரிய
இராதாகிருஷ்ணன் பிள்ளை, இவர்களுடைய சீடர் ஆச்சாள்புரம் மரியாதைக்குரிய
சின்னத்தம்பிப் பிள்ளை அவர்கள், இவர்கள் தான் இன்று வரை சிதம்பரம் நடராஜர்
கோவில் ஆஸ்தான வித்வான் இன்று வரை இறைவனுக்கு இசை தொண்டாற்றி வருகின்றார்கள்.

உற்சவ மூர்த்தியும், மல்லாரி இசையும்;
முன்பு குறிப்பிட்டது போல் உற்சவமூர்த்திகள் புறப்பாட்டின் போது மல்லாரி இசை
வாசிக்கப்பெறும். இதையடுத்து ராக ஆலாபனை, ரக்தி,அதைத் தொடர்ந்து பல்லவி என்ற
முறையில் இந்த மரபு அமைந்துள்ளது. சுவாமி, கோவிலிலிருந்து புறப்பட்டுக் கோபுர
வாசல் வந்ததும் கோபுர தரிசன தீபாராதனை செய்யப் பெற்றுக் கெட்டி மேளம்
வாசிக்கப் பெறும்.

சுவாமி, தெற்குக் கோபுர வாயிலை நெருங்கியதும் ரக்தி வாசிக்கப் பெறும்.

ரக்தி என்றால் அழகு என்று பொருள். இது ராகம், கண்ட, நடை, தீர்மானம் என மூன்று
பிரிவுகளைக் கொண்டது. சாகித்தியம் இல்லாமல் தீம் தத்திக்தை என்ற சப்தாதரத்தைக்
கொண்டு விஸ்தரிக்கப் பெறுவது, லய வேலைப்பாடுகளுக்கு முக்கியத்துவம் அளிக்கப்
பெறுவது. இவ்விசை மிஸ்ரத்தில் ஆரம்பிக்கப் பெற்றுப் பின் திஸ்ர கதியிலும்,
ஸர்வ லகுவிலும் வாசிக்கப்பெறும், சுவாமி மேல கோபுர வாசலுக்கு வரும் போது
பல்லவி வாசிக்கப் பெறும். வடக்கு, வீதியில் ஸ்வரப் பிரஸ்தாரம் தொடர்ந்து
நடைபெற்று ஆலயத்திற்குள் சுவாமி திரும்பி வந்திருக்கும் போது ஏதேனும் ஒரு பதம்
வாசிப்பார்கள்.

சிதம்பரம் ஆலயத் திருவிழாக்களில், சுவாமி வீதி உலாவிற்கு ஒவ்வொரு நாளுக்கும்
குறிப்பிட்ட கீர்த்தனைகள் மற்றும் ராகங்களே கையாளப்பெற வேண்டும் என்றும்,
தாளங்கள் கூட முறைப்படுத்தப் பெற்றுள்ளன என்பதும் வியக்கத்தக்க செய்திகளாகும்.

ஒன்றாம் திருநாள்
மல்லாரி - ஏக தாளம்
மல்லாரி - ஆதி தாளம்
ரக்தி - ஹம்ஸத்வனி ராகம் - ஆதி தாளம்
சங்கராபரணம் ராகம் - ரூபக தாளம்

இரண்டாம் திருநாள்
மல்லாரி - கண்ட ஜாதி திரி புட தாளம்
ரக்தி - ரீதி கௌள ராகம் - ஆதிதாளம்

மூன்றாம் திருநாள்
மல்லாரி - ஆதி தாளம்
ரக்தி - சக்ரவாகம் ராகம் - ஆதி தாளம்

நான்காம் திருநாள்
மல்லாரி - மிஸ்ர ஜாதி திரிபுடை தாளம்
ரக்தி - ஹம்ஸப்ரமரி ராகம் - மிஸ்ரசாபு தாளம்
ரக்தி - பந்துவராளி ராகம் - ரூபக தாளம்

ஐந்தாம் திருநாள்
பஞ்சரத்ன மல்லாரி (ஒவ்வொன்றாக)
முதலில் மிஸ்ர ஜாதி திரிபுடை தாளம்
2ஆம் மல்லாரி - கண்ட ஜாதி திரிபுடை தாளம்
3ஆம் மல்லாரி - சங்கீர்ண ஜாதி துருவ தாளம்
4ஆம் மல்லாரி - ஆதி தாளம்
5ஆம் மல்லாரி - ரூபக தாளம்
அதன் பின் திருவாசகப் பதிகம் (அம்மையே அப்பா - மோஹன ராகம் - ஆதி தாளம்)
திருப்புகழ் - ஹம்சாநந்தி ராகம் - ஆதி தாளம்
திருப்புகழ் - ஹம்சாநந்தி ராகம் - ஆதி தாளம்

ஆறாம் திருநாள்
மல்லாரி - மிஸ்ர ஜாதி திரிபுடை தாளம்
ரக்தி - தோடி ராகம்
சண்முகப்பிரியா ராகம் - ரூபக தாளம்

ஏழாம் திருநாள்
மல்லாரி - அட தாளம்
ரக்தி - வராளி ராகம், ஆதி தாளம்
ரக்தி - காம்போதி ராகம், ரூபக தாளம்

எட்டாம் திருநாள் - தங்க ரதம்
தாருகாவனத்தில் வேதங்களும் யாகங்களுமே உயர்ந்தவை என்று எண்ணி வேத நாயகனும்
வேதத்தின் உட்பொருளுமான சிவபெருமானை மறந்த முனிவர்களின் மயக்கத்தை ஒழிக்கப்,
பிட்சாடனார் வேடம் பூண்டு வந்த கோலத்தைத் தங்கரதத்தில் நான்கு வீதிகளிலும் உலா
அழைத்து வருவார்கள்.

கோவிலிலிருந்து தங்கரதத்தில் சுவாமி எழுந்தருளும் வரை சுமார் நான்கு மணி நேரம்
உடற்கூறு ( ஒடக்கூறு ) என்று மருவியும் வழங்கப்பெறுகிறது வாசிக்கப்
பெறுகின்றது. அதாவது உடலின் கூற்றையும், அது அழியும் தன்மை படைத்தது
என்பதையும் உணர்த்தும் ஒரு இசை வகை ஆகும்.

இதை 'மாயாமாளவ கௌள' அல்லது 'நாதநாமக் கிரியா' ராகங்களில் மிஸ்ர தாளத்தில்
மட்டுமே வாசிக்கப்பெறும், உடற்கூறும் லய வித்தியாசங்களும் செய்து வந்து,
சிவபெருமான் தங்க ரதத்தில் எழுந்தருளும் வரை வாசித்திட வேண்டும்.

தங்க ரதத்தில் பிட்சாடனார் எழுந்தருளியதும், தமிழில் சிவன் மேல் உள்ள ஒரு சில
கீர்த்தனைகள் ("ஆடும் சிதம்பரம்", 'ஆடிக்கொண்டார்') போன்றவை வாசிக்கப் பெறும்.

ஒன்பதாம் திருநாள் - திருத்தேர்
தேர் மல்லாரி,
ஆனந்த நடராஜப் பெருமானையும் சிவகாமசுந்தரி அம்மையையும் சிற்சபையில் இருந்து
திருத்தேருக்கு எழுந்தருளப் பண்ணுகின்ற விடியற்காலை நேரத்தில் தேர் மல்லாரி
சதுஸ்ர ஏகம் தாளத்தில் வாசிக்கப் பெற்றுப் பிறகு முத்துத்தாண்டவர் பதம்,
நடராசர் கீர்த்தனை கேதாரம் ராகத்தில் ஆனந்த நடனப் பிரகாசம் கீர்த்தனைகள்
இசைக்கப் பெறும்.

விடியற்காலையில், சிற்சபையிலிருந்து அம்மையப்பர் திருத்தேருக்குப்
புறப்படும்போது தேர் மல்லாரி ஐந்து அட்சரங்களைக் கொண்டதாகிய (பஞ்சாட்சரம்)
கண்ட நடையில் வாசிக்கப்பெறும். தேரில் சுவாமி எழுந்தருளும் வரை இதையே தான்
வாசிக்க வேண்டும். மாறுதல் செய்யக்கூடாது.

தேரிலிருந்து இரவில் ஆயிரங்கால் மண்டபத்திற்குச் சுவாமிகளை கொண்டு வரும் போது,
முதலில் சதுஸ்ர ஏகம் தாளம், பிறகு திஸ்ர ஏகம் தாளத்தில் மல்லாரி
வாசிக்கப்பெறும். இறைவனும், இறைவியும் ஆயிரங்கால் மண்டபத்தை அடைந்ததும் சில
சிவஸ்துதி கீர்த்தனைகளான 'காலைத் தூக்கி நின்றாடும்', யதுகுல காம்போதி
ராகத்தில், மிஸ்ரசாபு தாளத்திலும், கனக சபாபதி கீர்த்தனையை அடாணா ராகம், ரூபக
தாளத்திலும், இசைக்க வேண்டும்.

பத்தாம் திருநாள்  (தரிசனம்)
முதலில் தேர் மல்லாரி சதுஸ்ர ஏக தாளத்தில் வாசித்துவிட்டுப், பின்னர்
முத்துத்தாண்டவர் பதம் ஏக தாளத்தில் வாசிக்கப்பெறும், சுவாமி அலங்காரம்
முடிந்து தரினத்திற்குப் புறப்படும் வரை சிவனைப் பற்றிய பல கீர்த்தனைகள்
வாசிக்கப் பெறும்  .

பதினோராம் திருநாள்   -   விடையாற்றி உற்சவம் (முத்துப்பல்லக்கு)
சங்கீர்ண ஜாதி ஜம்பை தாளத்தில் மல்லாரி வாசிக்கப்பெறும்.
ரக்தி ஆலாபனைக்கு உசேனி ராகம் தான் முக்கியமாக எடுத்துக் கொண்டு பிறகு பல்லவி
வாசிக்க வேண்டும்.

சுவாமி திருக்கோவிலுக்குத் திரும்பியதும் லாலி, ஊஞ்சல், மங்களம் வாசித்து
நிறைவு செய்வது மரபு.

வைணவ சந்நிதியான ஶ்ரீ கோவிந்தராஜப் பெருமாளுக்கு நவராத்திரி உற்சவம் சிறப்பாக
நடைபெறும்போது, நடராஜர் திருக்கோவிலின் உட்பிரகாரத்தில் ஶ்ரீ தாயார் புறப்பாடு
துவங்கி, மல்லாரி, ராக ஆலாபனை, பல்லவி முதலியவை மரபின்படி வாசிக்கப்பெற்று
மாலை மாற்று வைபவம் நடைபெறும். இவ்விழா நவராத்திரி ஒன்பது நாளும் நடைபெறும்.

மேலும், கோவிந்தராஜர் திருக் கோவில் திருவிழாவின் போது, ஒவ்வொரு நாளும்
குறிப்பிட்ட ராகம் வாசிக்கும் மரபு உண்டு.

மாலைமாற்றுக்கு எனப், பிரத்யேகக் கீர்த்தனைகள் மற்றும்
சங்கராபரணம்,
சுருட்டி,
ரீதி கௌளை,
ஆனந்த பைரவி,
உசேனி,
மத்தியமாவதி,
ஆகிய ராகங்களில் அமைந்த தியாகராஜ ஸ்வாமிகளின் உற்சவ சம்பிரதாயப் பாடல்கள்
வாசிக்கப்பெறும். ஒவ்வொரு நாளும் ஐந்து பாடல்கள் வீதம் ஒன்பது நாட்களில் 45
பாடல்கள் வாசிக்கப் பெறும்.

மாலைமாற்று முடிந்தவுடன், தாயார் தன் சந்நிதிக்குத் திரும்பியதும்
திருவந்திக்காப்பு நடைபெறும்.
ஆலய சேவையில் தம்மை அர்ப்பணித்துக் கொண்ட பெண்கள், மூன்று முறை கையில் குட
விளக்கு ஏந்தி, மூன்று முறை உற்சவ விக்ரகத்தை வலம் வரும் நிகழ்ச்சியைக்
கண்ணேறு கழித்தல் அல்லது திருஷ்டி சுற்று என்பார்கள், அப்போது அவர்களுக்கு
மரியாதை செலுத்தும் வகையில் நாதஸ்வர, தவில் கலைஞர்களும் உடன் சுற்றுவார்கள்
அப்போது தவில் மட்டும் தட்டி அழிக்கப் பெறுவதால் தட்டுச் சுற்று என்பார்கள்.
பின்னர், தாயார் சன்னதிக்கு மீண்டும் நுழையும் போது எச்சரிக்கை வாசிக்கப்
பெறும்  . பின்னர் லாலி, ஊஞ்சல், மங்களப் பாடல்கள் வாசிக்கப் பெறும்.

திருவாதிரைத் திருநாள் வழிபாடு
ஆக, சாதரண மக்கள் வீட்டுச் சுப நிகழ்ச்சிகள் உட்பட, அனைத்துத் திருக்கோவில்
விழாக்களிலும் நீங்கா இடம் பெற்றது நாதஸ்வர இசை, குறிப்பாகச் சிதம்பரம் திருக்
கோவிலின் மல்லாரி எனும் தெய்வீக நாதஸ்வர இசை மிகவும் சிறப்பு மிக்கது.

தில்லைத் திருக் கூத்தன் அருள் பெறவும், 'மல்லாரி' எனும் தெய்வீக நாதஸ்வர
இசையைக் கேட்டுப் புனிதம் பெறவும், சிதம்பரம் மார்கழித் திருவிழாவிலே
குடும்பத்துடன் பங்கு பெறுவோம்! திரு ஆதிரைத் திருநாளன்று
நடராஜப்பெருமானையும், சிவகாம சுந்தரி அம்மையையும் தரிசித்து எல்லை இல்லா
ஆனந்தம் அடைவோம்!
* * * * * * * * * *
ஆதாரப் புத்தகம்,
கோமுகி கல்வி
மலர் 4 * இதழ் 11
டிசம்பர் 2015




<http://groups.yahoo.com/subscribe/worldmalayaliclub/>
  https://www.youtube.com/watch?v=GucCDmbWPTM
<https://www.youtube.com/watch?v=GucCDmbWPTM&fbclid=IwAR1Rl4fK-g0h_P5XKw6eg1UhiTzhIjmzXE7kYQZBXCJRZ1tVS8UOgMxoD3U>


*வாழிய செந்தமிழ்! வாழ்க நற்றமிழர்!*

*வாழிய பாரதமணித் திருநாடு!*

*வணக்கம்* *சுப்பு*

 *Vanakkam Subbu*

 [image:
zGgbcCHwTas05D3TEGRzfeJitXMuFdleP8uz97cCm3eLcDguXidhEufGaerGn9hH.gif]

-- 
You received this message because you are subscribed to the Google Groups 
"Thatha_Patty" group.
To unsubscribe from this group and stop receiving emails from it, send an email 
to [email protected].
To view this discussion on the web visit 
https://groups.google.com/d/msgid/thatha_patty/CAPC%3Dj%2BqRerwPz%3DH2YVNWhQSnb%3DmAFgkicC%2BA%3DeJcW7QNBEO_OA%40mail.gmail.com.

Reply via email to