|
Ayeuna nu majeng ka payun teh nya eta Raja Awangga
Karna , anjeunna majeng bai imut , teu aya semu semu nu ringrang , anjeunna
nyarios tatag pisan :"Raja Gung Drestarastra sinareng para pangagung sadayana ,
Kaula Raja Angga Karna nganuhunkeun ka sadayana wirehna parantos masihan waktos
kanggo Kaula di ieu gempungan agung . Ceuk pamikir Kaula , anu saadil adilna ,
Kaula geus ngitung , didieu urang kudu nganuhunkeun kana Kawasana Hyang
Widi ku ngayakeun bedana Peuting jeung beurang ; nepi keun ka urang sarerea bisa
ngitung sabaraha lilana hiji hal ."
"Bener ceuk Sakuni , urang teh nyanghareupan hiji
hal anu "nisbi" ; tapi ku sabab aya peuting jeung beurang tea , urang bisa
ngitung geus sabaraha ratus peuting atawa beurang , eta Pandawa dihukumna . Ku
itungan Kaula , nyata yen memang Pandawa teh waktu kaciri aya di Matswapati
, eta teh persis 13 taun onjoy kira kira satengah poe . Tah ku sabab eta , Kaula
satuju mun nyebutkeun yen Pandawa memang euweuh deui kawajiban pikeun dihukum
sakali deui ."
"Tapi di na masalah Indraprasta , nua ayeuna jadi
Astina sagemblengna , ceuk pamikir Kaula mah euweuh hak Pandawa pikeun menta eta
Nagara ; kapan baheula geus dileupaskeun ku maranehanana , anu hartina geus teu
boga tanggung jawab deui ka rahayatna . Da mun Kaula mah harita , Pandawa teh
kuduna kajeun paeh tutumpuran ti batan mikeun agara ; komo bari elehna teh ngan
ukur maen dadu !"
"Tah didieu Kaula nempo , yen Pandawa teh kawas
hayam lisung , kumeok memeh dipacok ! Sieun ngayakeun peperangan . Tah ku sabab
kitu asa teu pantes , eta Nagara sakitu gedena dibikeun ka Pandawa nu kurang
kawani kitu ."
"Jeungna deui , ku sadaya kauninga , kapan nu
ngamajukeun eta Indraprasta teh nya Prabu Anom Duryodhana , nepi ka subur ma'mur
, gemah ripah loh jinawi , sepi paling towong rampog . Patani bungah ati ,
padagang sarenang . Cek paribasa emas digelar oge di jalan moal leungit , ku
kerta kertana eta Nagara ."
"Ku sabab kitu , Kaula sanget nya teu satuju ,
lamun eta Nagara sabeulah kidul Astina dibikeun deui ka Pandawa . Atuh cenah
maksa , hahahahaha , Kaula Karna nu bakal nyanghareupanana . Sok saha Arjuna ?
Bhima ? Nu rek murugul ? Isuk sore oge moal teu dilayanan ku Kaula . Sok ari
enya mah Pandawa teh Satriya , Kaula miharep pisan , yen Pandawa
maksa mementa ieu Nagara , Kaula kacida bungahna , jeung geus siap rek
merangan eta Para Pandawa , sakitu nu kapihatur !"
Ger atuh mani surak ambal ambalan , ku panujuna ka
na biantarana Raja Angga nu sakitu leber ku wawanenna .
Sateuacanna nu sanesna nyuhunkeun tempo deui ,
Prabu Drestarastra ngangkat pananganana teras ngasawuh :"Tah geuning geus loba
nu ngajukeun pandangan jeung pamadeganana ; tah ayeuna Kaula sabage Raja , geus
ngarasa cukup ku katerangan nu Kaula hayang nyaho . Ayeuna Kaula menta ka
pinisepuh urang sarerea , nya eta Resi Bhisma nu wijaksana , tah kumaha
pamadegan sampeyan di na hal ieu ?"
Ku margi ieu mah parentah ti Raja , enggalna bae
Bhisma majeng kapayun , najan tos sepuh oge , eta Satriya Resi teh , masih
katingal gagah , salira jangkung ageung sembada ngandung komara , perbawana estu
matak ajrih sadayana para Pangagung Astina , lantaran memang Bhisma mah asli
tetesan andanawarih , terahing Ratu rembesing Kusumah .
Enggalna Bhisma mihatur , soantenna someh marahmay
, tapi pinuh ku perbawa , agem geueuman , sareng naon wae kecap kahartos ku
sadayana :
"Raja Drestarastra sembahan urang sadaya , para
Pangagung sareng Satriya Astina . Kaula Bhisma Dewabrata geus ngadangu sadaya
biantara sareng pamadegan para Pangagung di ieu Nagara . Kaula aya satuju , aya
henteu ka na sagala nu dikedalkeun ku sadaya ."
"Ayeuna urang kabeh geus mupakat yen Pandawa geus
teu wajib dihukum deui , lantaran waktuna geus sampurna dilaksankeun ku Pandawa
. Ieu penting pisan , lantaran didieu nangukeun naha Pandawa masih keneh
harkatna ABID atawa Satriya . Tah ku sabab kitu , ayeuna Kaula meunang cecekelan
, yen Pandawa harkatna geus sajajar deui jeung Satriya saHindustan , teu bisa
dipadu renyomkeun deui ."
"Ku sabab eta , Kaula ngarti naon sababna Pangna
Pandawa ngirim utusan ka Astina ? Eta lantaran kahiji Pandawa kawajibanana geus
tuntas , kadua pantes mun sagala hakna dibalikkeun deui ka Pandawa , di na hal
ieu Pandawa geus siap ; boh urang hayang katengtreman , atawa perang . Lantaran
nu ngarojong Pandawa oge kapan sakitu gegekna . Katilu kapan Pandawa teh cohagna
mah Raja di Raja ; atuh tangtu meureun Raja Raja nu ngadukung Pandawa teu satuju
lamun Yudhistira kudu daratang sorangan ka Astina , masing enya didieu loba
sepuh sepuh Pandawa . Lantaran didieu lain soal kakaluwargaan deui ; tapi soal
cecekelan jeung kahormatan sabage Satriya ."
"hehehehehe , Kaula kataji ku ketakna Karna , nu
memang wani jeung teu aya kagimir . Tapi naha teu ngingetkeun sampeyan he Karna
, Raja Angga ? naha sampeyan geus poho waktu diringkus ku Arjuna waktu sampeyan
dibantu ku Duryodhana jeung Dursasana ngepung Arjuna di Matswapati ? Malah kapan
Aswatama oge ngiring ngaraponan eta Arjuna ? Kumaha hasilna ? Kapan Sampeyan
Karna , gondewana parotong , terus awak taratu , nepi ka mundur ti palagan
!"
"Kapan harita Arjuna soroh amuk , nepi keun Kaula ,
Resi Krepa , kitu deui Resi Drona mundur ti palagan ! Lantaran kateter jurit ku
Arjuna nu harita ngamuk , lir ketakna saratus Dewa ti Kahyangan ."
"Ku sabab eta , keur katengtreman Nagara Astina ,
Kaula mah satuju mun Indraprasta nu memang baheula hakna Pandawa , dibalikkeun
ka maranehanan . Astina moal rugi ; da memang kapan eta mah asalna oge leuweung
ganggong sima gonggong . Jadina asri kawas ayeuna teh , kapan jasana Pandawa
."
"Sakitu wae nu kapihatur ."
Jep wae sajongjonan mah jarempling , teu aya nu
wani ngaharewos ngaharewos acan . Katingal Karna rarayna reup geuneuk , ray pias
, ku wirangna diwewelwh ku Bhisma di na ieu gempungan . Duryodhana ngan ukur
bisa kekerot ; Drestarastra mung ukur melengek teu nyaur naon naon
.
Saparantos sabara lamina hening , enggal wae Sang
Drestarastra emut ka na Purwadaksina , enggal anjeunna ngabubarkeun eta pasamoan
, kalawan implik implik yen isukan surat walonan ka Pandawa bakal dibawa ku para
Utusan .
Hanca ,
Abbas Amien
Komunitas UrangSunda --> http://www.UrangSunda.or.id Yahoo! Groups Links
|
