|
Banglus lampahna Prabu Anom Suyudhana , nu nuju
purat perot bade ka Dwaraka nepangan Kresna . Urang kocapkeun aya Hiji Satriya
Pinandita nu kaceluk Rama Bargawa ; anjeunna dipiwarang ku Kresna megatan sing
saha wae nu bade ka Dwarawati , teu kenging dipasihan jalan , ku margi Kresna
bade Tapa Turu duka sabaraha lamina ; janten anjeunna teu kersaeun aya nu
ngaganggu .
Rama Bargawa teh kaceluk kaawun awun , kawentar ka
janapriya Hiji Satriya Pinandita anu jago panah ; hese neangan lawanna . Ku
margi sakitu upama wae aya satriya jore jore wani maksa , pasti lastarina ku ieu
Rama Bargawa .
Tah nya atuh Rama Bargawa diamanatan kitu ku Kresna
teh langsung nampi wae . Nya ti sabarang poe eta loba jelema nu nuju ka
Dwarawati muter jalanna ; mun maksa tangtu cilaka ; geus aya puluhan jalma jeung
sababaraha Satriya nu wani maksa ; teu tata pasini terus wae ditandasa ku Rama
Bargawa ; nya atuh jalan nu deukeut ka Dwarawati teh ti semet harita mah
bangblas teu aya nu daek ngaliwat deui kadinya .
Lila lila Rama Bargawa asa karesel , lantaran geus
tilu poe teu aya wae nu ngulampreng ka eta jalan ; nya atuh dug wae ieu rama
Bargawa teh sasarean di na handapeun tangkal caringin ; tapi kakara oge
leleyepan aya sora kareta ti kajauhan , atuh korejat wae ieu Rama Bargawa teh
hudang , saterusna taki taki lantaran ti kajauhan awas aya hiji kareta nu bakal
ngaliwat .
Barang eta kareta keur mangprung mani kenceng pisan
; teu tatapasini deui belesat wae Rama Bagawa mentangkeun panah , sorana mani
ngahiung ku gedena tanaga nu manah . Cep wae persis hareupeun kuda nu keur
mangprung ; atuh kuda teh mani ngajul ka luhur da reuwasan ; terus wae eureun
pisan ; terus Satriya nu aya disatukangeun kusir sumbar sumbar kamanigan :" Eee
ladalah , kurang ajar temen ieu nu manh di jalaneun Kaula rek ngaliwat ! Saha
jelemana nu wani wani gana gana megatan diri Kaula !"
"Hahahahahaha ! Ieu aula Rama Bargawa ; ti bulan
kamari keneh geus aya didieu keur ngahalangan nu rek ngaraliwat ; geuwat andika
balik deui ; neangan jalan sejen we rek ka Dwarawati mah ; tapi teu meunang
jalan ka dieu ."
Eta satriya nu na kareta enggal wae sosoak :"Eh
Rama Bargawa , naha andika bosen hirup ? Hayoh minggir sampeyan , Kaula rek
ngaliwat !"
Rama Bargawa oge nyeuneu , bari rada heran nempo
eta Sinatriya kacida wanianana :"Eh Kurang ajar , Rama Bargawa moal tega ka na
pati ; tara mundur ti medar tempur ! Ngan wae samemeh andika lastari , sebutkeun
ngaran andika , bisi paeh teu mawa ngaran ."
Jaya bang winga winga , eta Sinatriya nu na kareta
kacida amarahna , beungeut beureum bari kekerot , teras nyentak mani tarik
pisan:" Heh dengekeun ku ceuli rebing andika ! yeuh Kaula Jakapitana , atawa
Duryodhana , atawa Suyudhana , atawana Kurupati , Drestarastra Putra ! Andika nu
bakal tiwas , lain Kaula ."
"Hahahahahaha , pantes atuh ari kitu mah . Enya
andika teh leber ku wawanen , tapi sampeyan moal kuat ngalawan Kaula , sok we
mundur ti ayeuna ." Rada leuleuy ayeuna Rama Bargawa teh , lantaran nu
disanghareupeun teh nyata Prabu Anom Suyudhana nu kakoncara ; Naga Astina
Nagarana , nu dipikasieun ku balarea ; lantaran pangkuatna sa Hindustan
.
Teu tata pasini deui , belesat wae Suyudhana manah
ka Rama Bargawa , tapi gampang pisan ditakis ku Rama bargawa , malah terus
dibales ; tapi Suyudhana oge rikat nakis , bari males manah deui .
Ragot ieu dua jalmi silih panah , tapi lami lami
katingal Suyudhana katetran , lantaran memang Rama Bargawa mah jagoan pisan di
na soal manah teh ; tos tilu gondewa Suyudhana nu potong . panangannana taratu
kasabet ku panah ; teras makutana mani remuk . Rada geumpeur Duryodhana , barang
keur kitu teh deuih belesat wae hiji panah mani ngahiung , ampir wae keuna ka na
tenggekna pisan . Tapi dasar memang teu acan pinasti ka na pati ; belesat teh
tarik alah manan kilat hiji panah ngabentur panahna Rama Bargawa ; atuh
Suyudhana teh ngan ukur kaserempet panah , tatuna teu parna ; tapi anjeunna ku
reuwas reuwasna ngalumpruk na karetana ; kabur pangacian ; sajongjongan mah teu
usik malik .
Rama Bargawa kalintang kagetna , enggal ngandika :"
Eeeeh kurang ajar ; Satriya mana nu wani wani ngaganggu ka diri Kaula Rama
Bargawa . Sok maju kadieu ."
Ti beulah kenca jol aya kareta hiji deui , nya
didinya aya Satriya nu kakara mentangkeun panah , bari kalem teras wae ngandika
:Nya Kaula nu ngaran arjuna , ayeuna kaula menta idin rek ngaliwat ka Dwarawati
, poma ulah gana gana wani ngahalangan Pangeran Arjuna !"
"Hahahahahaha , yeuh Pangeran Arjuna , sampeyan teh
kaceluk ka awun awun , kawentar ka janapriya , hiji Satriya pinilih , ahli
mentangkeun panah ! Tapi ieu Kaula Rama Bargawa teu maris sama sakali , moal
mundur sacongo rambut ceuk paribasana , sok hayang nyaho nepi ka mana
jagona ki Dananjaya !"
Hanca
Komunitas UrangSunda --> http://www.UrangSunda.or.id Yahoo! Groups Links
|
