Sakumaha dina serelek samemehna, waktu keur ngaluuhan seminar litbang esdm di hotel borobodur, di sagigireun rohangan seminar teh aya oge hajatan seminar jejer sejen. Anu boga hajatna (ralat anu kamari) nyaeta Universitas Jakarta. Anapaon jejer poko ieu seminar nyaeta (punten heunteu disundakeun): "Multicultural Education: Revitalising Nationalism and the Role of Higher Education amid the Age of Globalisation".
Panasaran hoyong terang naon bae jejer-jejer anu dipadungdengkeun dina seminar budaya di rohangan sabeulah teh. Nya pangangguran ngalongok ka hareupeun rohangan seminar (da asup ka rohanganna mah teu aya waktuna) dina sela-sela istirahat seminar anu wajib dihadiran ku si kuring. Di hareupeun rohangan seminarna, sakumaha umumna seminar ageung, aya "stand" pameran anu dilebetan ku rupa-rupa buku-buku anu luyu jeung jejer seminar, di sagigireun panitia seminar. Buku-buku anu dijengjrengkeun dina
pameran teh umumna ngawengku jejer-jejer: seni jeung budaya, atikan luhur, etnografi atawa ajen-inajen lokal/daerah, oge religiusitas anu nyoko kana budaya, pendidikan dan "perdamaian" dunia.
Buku-buku anu dijengjrengkeun dina pameran teh umumna ngawengku jejer-jejer: seni jeung budaya, atikan luhur, etnografi atawa ajen-inajen lokal/daerah, oge religiusitas anu nyoko kana budaya, pendidikan dan "perdamaian" dunia. Bati uruy bae nitenan judul-judul buku anu dijagragkeun di hareupeun rohangan seminar teh, hayang macaan, ngan orokaya, salian ti waktuna anu teu aya teh cicisna oge teu kaagehan.
Ulak-ilik kana daftar rengrengan narasumber jeung moderator ieu acara seminar internasional, lakadalah, geuningan aya Kang Chaedar Alwasilah salaku salah saurang moderator dina eta acara seminar internasional, di sagigireun narasumber ti jero nagara urang jeung luar negri. Enya, Kang Chaedar teh geus "menginternasional" pisal dina jejer budaya-pendidikan-lokalitas-agama mah. Ampir dina satiap seminar penting ngeunaan jejer bieu anjeunna diulem, boh salaku narasumber,. moderator atawa peserta
aktif.
Sakumaha tos pada uninga, Kang Chaedar teh doktor ahli atikan multikultural (pamianganna mah pangajaran bahasa Inggris), anjeunna ngawulang di UPI (IKIP) Bandung. Icikibung Kang Chaedar dina masalah-masalah kabudayaan dugi ka pucukna sawaktu anjeunna kapeto jadi pupuhu panitia Konferensi Internasional Budaya Sunda I (KIBS I) dina Taun 2000. Emut bae, guaran anjeunna dina panganteur "proceeding" KIBS 2000 ngeunaan revitalisasi budaya. Saurna, revitalisasi teh diwangun ku tilu hal, nyaeta: 1)
ngahartikeun kalawan jero dugi ka nimbulkeun kasadaran, 2) ngarencanakeun kalawan sasarengan (perencanaan kolektif), jeung 3) kreativitas budaya. Jargon-jargon budaya Sunda seueur anu kedah direvitalisasi, ditafsir ulang, saur anjeunna, sangkan tiasa ngigelan jeung ngigelkeun jaman. Upamana bae, ayat "herang caina beunang laukna" teh kudu ditafsirulang, diantara tafsir anyarna : komunikasi anu hade.
Susuganan meunang makalah gratisan tina eta seminar, si kuring wawanianan ngawanohkeun maneh ka panitia. Nyebutkeun pagawean mah sanes ti geologi da bisi teu nyambung, tapi ti komunitas sunda di internet bae ngarah rada pantes. Hanjakal, teu aya makalah anu nyesa, tapi panitia teh nawaran CD. "Sadaya eusi makalah jeung TOR ieu seminar aya dina lebet CD ieu", kitu ceuk salah saurang panitia satengah promosi. Da kabita tea, nya ngagentosan CD sahiji, lumayan cekeng teh, keur baca-bacaeun ari
salse.
Karek kamari ieu aya waktu mukaan eusi CD seminar multikultural teh, geuning hade nakeranan. Enyaan urang jakarta mah palinteran ngararancang hiji seminar, nya pinter mintonkeunna, nya pinter neangan sumber biayana (diantara donatur seminar di luhur teh aya UNESCO). Aya kurang leuwih makalah anu dipresentasikeun dina eta seminar, kalawan makalah kuncina (keynot speaker) ti Siswono Yudohusodo (makalahna: "To Build the National Self-Reliance is a Need for Indonesia"). Kang Chaedar ku anjeun nyandak makalah anu dijejeran ku :"First Language-Based Multicultural Education".
Sarantos parawargi, sugan pareng, keur diimeutan eusi CD ngeunaan makalah-makalah anu dipintonkeun dina seminar di luhur teh. Saeutikna, runtuyan judul-judulna bae mah, manawi aya anu peryogi, engke tiasa dikomunikasikeun deui. Kanggo saheulaanan, para
inohong sanesna anu biantara kamari dina seminar multikultural di luhur teh, diantarana (sadayana diserat nami aslina bae, teu nganggo gelar): Conny R. Semiawan, Azyumardi Azra, Arief Rachman, Susan R. Stengel, Agus Guntoro, Cut Kamaril, Bustanuddin Agus, H.A.R Tilaar, John Parrish, Lexy J. Moleong, M. Yusuf, Martani, Martini Jamaris, Peter Englert, Rohaty Moh. Majzub, Suminto A. Sayuti, Supanggah, Tonny Micthener, sareng Tukiman Sayoga.
Cag.
Baktosna,
manAR
__________________________________________________
Do You Yahoo!?
Tired of spam? Yahoo! Mail has the best spam protection around
http://mail.yahoo.com
Komunitas Urang Sunda --> http://www.Urang-Sunda.or.id
| Yahoo! Groups Sponsor | |
|
|
Yahoo! Groups Links
- To visit your group on the web, go to:
http://groups.yahoo.com/group/urangsunda/
- To unsubscribe from this group, send an email to:
[EMAIL PROTECTED]
- Your use of Yahoo! Groups is subject to the Yahoo! Terms of Service.
