Para wargi sadaya,
Seja meredih pangampura ti sadayana bae, kulantaran heunteu pareng bisa aub ngumpul jeung warga Kusnet sejenna di pajemuhan Cimalati. Hanjakalna mah kabina-bina, lamun heunteu ras inget kana wates kamampuan manusa mah, moal boa poe Saptu kamari sapoe jeput gegelendeng jeung kukulutus kana panghalang anu nepi ka sorangan bolay ka Cimalati Lain arek tuturut munding ka Neng Elly, si kuring oge sarua peta teh, geus nandaan kalender ti anggangna keneh, tgl 27 Nopember 2004 kudu ka Cimalati. Malah mah lain eta bae, ka padungdengan munggaran di darat keur bebenah eta acara oge kungsi hadir; atuh sms-an jeung "tatalipungan" reujeung kanca ti rengrengan panitia samemeh prungna acara, kaitung mindeng. Na ari dina waktuna, teu ku hanteu, aya halangan anu heunteu bisa dipumpang. Satemenna ti 3 poeun deui kana waktuna, hate geus hemar-hemir, palaur teu bisa datang ka Cimalati. Peta kitu teh harita bareng jeung torojolna 2 tugas ngadadak ti kantor, kudu buru-buru direngsekeun. Dua-duana sarua ngadadak jeung kawilang beurat anu tara anggeus ku sapoe-dua poeu da maklum manajemen di pamarentahan tea. Anu kahiji kudu ngarengsekeun "laporan akuntabilitas kinerja instansi pamarentah (LAKIP)" ti kantor kuring anu satemenna kudu anggeus minggu kamari, ngan nyakitu tea kapegat libur lebaran. Anu kadua kudu milian nyayogikeun bahan presentasi kantor di pajemuhan maneuh unggal taun inohong ahli geologi indonesia (IAGI) anu taun ayeuna pareng dilaksanakeun di Bandung poe ieu pisan (29 Nopember 2004). Tepi ka ayeuna sabenerna mah tugas-tugas teh teu acan rengse sapuratina, utamana anu kahiji. Lumayan, awak karasa pasiksak, kulantaran ampir 4 poe tuluy-tuluyan manco dina hareupeun komputer, tepi ka kamari poe ahad oge lembur, sok sanajan di imah. Lamun aya anu natanyakeun :"Naha heunteu ngokolakeun anak buah pikeun ngarengsekeun pagawean teh?" Pananya sarupa kitu geus ampir bosen nembalan, sarua ampir bosenna jeung ngusulkeun cara pangropea pikeun ngabeberes manajemen kantor pamarentahan, khususna di patempatan sorangan digawe. Cag bae lebah dieu na mah, inggis kapapanjangan. Sakali deui, hampura ka balarea, rumasa heunteu kawasa ngalaksanakeun rarancang. Khususon ka Ua Siddik, Kang Gunawan, Kang Eko, Kang Kandar, Kang Hendri, Kang Tatan, Teh Imas, Teh Tien, sareng sadaya rengrengan panitia anu kungsi patepung di bumi Kang Eko, hampura sim kuring heunteu bisa nyumponan paniatan. Oge ka MJ, Ua Sas, Kang MGT anu ngawanti-wanti pisan kudu datang ka Cimalati dina waktuna, hampura sim kuring heunteu cunduk ka pajemuhan mangkukna di Cimalati. Anapon kana hasil pajemuhan, sim kuring ngarojong pisan. Ngeunaan perkara zakat, keun engke urang guar. Anu jelas kalawan ringkes, aya lolongkrang pikeun urang ngokolakeun sabagean tina zakat. Cag heula. Baktosna, manAR NB: Ka MJ sareng Kang Iim, hampura (deui bae) sms-na heunteu kungsi diwalonan, harita basa Saptu tea. ------------------------ Yahoo! Groups Sponsor --------------------~--> Make a clean sweep of pop-up ads. Yahoo! Companion Toolbar. Now with Pop-Up Blocker. Get it for free! http://us.click.yahoo.com/L5YrjA/eSIIAA/yQLSAA/0EHolB/TM --------------------------------------------------------------------~-> Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/