Jaman Baheula, di Jawa, duka Jawana di lebah mana, aya hiji kulawarga nu kacida sangsarana, katelahna Abah jeung Ambu Kromol Baplang. Ieu salaki jeung pamajikan cicing di imah nu siga saung butut anu geus doyong, papakeanana oge geus bararutut. Pangcabakanana henteu puguh, buburuh di tatanggana, sakasampeurna. Hiji waktu, Abah Kromol Baplang ngadenge beja, cenah mah lamun hayang beunghar, kudu tatapa di basisir laut kidul ngalap berkah ti Nyai Loro Kidul. Ceuli Abah Kromol Baplang mani rancung ngadenge beja ieu, sabab manehna geus ngarasa bosen hirupna ngan sangsara jeung sangsara wae. Manehna tatanya kaditu kadieu, dimana tempat tatapa teh. Sanggeus aya nu ngabejaan dimana tempatna, manehna ngajak Ambu Kromol Baplang indit tatapa ka tempat anu dituduhkeun tea.
Teu dicaritakeun dijalanna, tepi weh maranehna ka basisir laut kidul, terus tatapa jeung pamajikanana di salah sahiji guha di basisir, menta-menta supaya Nyai Loro Kidul mere berkah ka maranehna. Kulantaran Abah jeung Ambu Kromol Baplang teh jelema sangsara tapi hirupna jujur jeung bageur, Hate Nyai Loro Kidul karunyaeun, terus nembongan kanu keur tatapa. Kacida kagetna Abah jeung Ambu Kromol Baplang ningali aya istri nu geulis jeung seungit ujug-ujug mucunghul aya hareupanana bari terus nyarita : " Hey Kromol Baplang, kami nyaho maksud andika. Kami arek nedunan pamenta maneh, tapi ngan DUA pamenta. Ayeuna mah jig we heula baralik ka lembur maneh, pikirkeun we naon anu rek dipenta". Sanggeus nyarita kitu, les weh Nyai Loro Kidul teh ngaleungit deui, tinggal Abah jeung Ambu Kromol Baplang nu colohok mata simeuteun. Sanggeus sadar tatapana diijabah, gancang maranehna gura-giru balik ka lemburna. Geus tepi ka imahna Abah Kromol Baplang nanya ka Ambu Kromol Baplang:" Ambu naon atuh anu arek dipenta ka Nyai Loro Kidul teh?". Ceuk Ambu Kromol Baplang :" Deuh, kami mah hayang pakean anu alus, emas jeung inten. Saumur-umur acan ngajaran make emas jeung inten" Si Abah langsung nempas:" Ulah waka menta eta, urang menta heula sawah jeung kebon anu lega, imah anu sigrong, gampang emas jeung inten mah". Si Ambu langsung nyorongot: "Gampang-gampang kumaha, ti baheula oge, kami teh teu disenangkeun ku salaki teh, kari-kari ayeuna aya jalan boga emas inten, naha abah make ngahalangan kahayang ambu?" Tungtungna Si Abah jeung Ambu Kromol Baplang pasea pacental-cental, keukeuh ku pamenta masing-masing. Bakating ku keuheul ka pamajikanana, Abah Kromol Baplang ngomong sakecemplungna : "Cik Nyai Loro Kidul, ieu pamajikan anu teu nurut ka salaki teh, beungeutna sing sina jiga monyet. Rasakeun siah Ambu!" Saatosna nyarita kitu, jleg we beungeut si Ambu teh robah jadi siga monyet. Abah Kromol Baplang kacida kagetna waktu ningali beungeut Ambuna nu robah siga monyet. Sanajan manehna keuheul ka pamajikanana, tapi ari beungeut pamajikannya robah siga monyet mah, manehna heunteu tega. Gancangan we manehna teh menta deui ka Nyai Loro Kidul supaya beungeut pamajikanana robah deui saperti biasa. pamenta anu pangakhirna nu bakal ditedunan ku Nyai Loro Kidul. Tah kitu dongengna kunaon Abah jeung Ambu Kromol Baplang sangsara wae saumur-umur. (Ide carita tina Majalah "Window on The World" nu diterbitkeun ku CV GANACO Bandung di taun 1970'an. Ieu Majalah Bahasa Inggris keur bacaeun barudak SMP jeung SMA. Kabeneran baheula kuring langganan) -WALUYA- ------------------------ Yahoo! Groups Sponsor --------------------~--> Help save the life of a child. Support St. Jude Children's Research Hospital's 'Thanks & Giving.' http://us.click.yahoo.com/mGEjbB/5WnJAA/E2hLAA/0EHolB/TM --------------------------------------------------------------------~-> Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/