Biasana "online" kana internet teh manteng sadinten jeput salami dipadamelan atuh kitu deui nampi email masing bade sakumaha ageungna ge teu janten masalah da di kantor tea teu kedah mayar nyalira, ari ayeuna kedah "dial up", keur mah karaosna lelet atuh karaos beuki ripuh da kedah mayar tea, ari lami teuing matak digambreng ku patih goah. Baheula mah sok teu pati openan ka email nu ngagebay panjang tapi eusina mung ukur sauted, ari ayeuna mah enyaan ngarahuh, hoyong mah hoyong ngiring ti enjing keneh posting mairan teh tapi nya kitu dalah dikumaha kawatesanan ku kaayaan, kukituna hapunten ka sadayana baraya mairan teh siga nu dijojoan atuh kitu deui bilih aya nu kalangkung hapunten. Enya sim kuring teh masih keneh sabage kuncen#2 ngan teu pati aktip, sakali deui hapunten, tapi ketang kuncen ayeuna mah tos genepan sok sanajan nu aktip mah mung limaan kelebet sim kuring nu teu pati aktip. Aya saena eta bewara ti Kang Kumincir sabage kuncen #5 nu tos ngiberan ka urang sadayana supados diperhatoskeun, da sigana anu ngakses email siga sim kuring teh sanes hiji dua tangtos seueur, sok sanaos nu aktip silih pairan teh seuseueurna mah nu ti padamelanana bari ngaksesna haratis....eh aya ketah anu ngaksesna ti bumina tapi haratis nyaeta Teh Mpup. Sim kuring ngiringan ieu milis teh 6 taun jalan, ti sasih Mei 2000, tos seueur elmu nu dipulungan ku sim kuring, utamina mah silaturahmi sareng papada Urang Sunda ngaraketkeun duduluran, kenal sareng itu sareng ieu nu diditu nu didieu. Munel kacida sareng seueur pulunganeunana malih mah ku sim kuring sok dijantenkeun kareueus sok diobrolekun boh sareng kulawarga kitu deui sareng rerencangan anu sanesna. Kukituna sim kuring umajak ka baraya sadayana hayu urang papada ngamumule ieu media, sasieureun sabeunyeureun mugi aya kontribusina kana kalanggengan basa Sunda. Hatur nuhun
MSasmita Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
