si Ua Sas sareng si kuring gaduh bundel kumpulan Makalah KBS-8 Subang. rata-rata makalah genep kaca. mudah-mudahan si Ua atanapi si kuring tiasa nyeken kanggo dicemplungkeun ka KUSnet..
dihandap ieu naskah mamakalahan si kuring samemeh digabung jeung naskah si Ua Sas. dihijikeun jeung diropea deui -diedit- ku Dadan Sutisna, urang Cupumanik.com Ngamekarkeun Basa Sunda di Internet Ku:Mang Jamal Mun seug enya soal basa Sunda bakal paeh kajadian -jejer nu sering dibahas ku para inohong nu umurna geus tunggang gunung- sigana ngan ukur di sababaraha tempat wungkul. Salian ti jadi puseur dayeuh nagara, Jakarta bisa oge dianggap episentrum lini nu jadi kasang tukang pikeun leungit atawa paehna basa Sunda. Ari wewengkon nu baris keuna ku lini eta nyaeta di sabudeureun episentrum, di wewengkon Bogor Depok Tangerang Bekasi (Bodetabek). Bandung salaku episentrum kadua, basa Sunda ngalaman kadesek, tapi nu ieu mah sigana moal sakuat Jakarta. Soal bakal paehna mah sigana teu kudu dibahas perkara kunaonna mah. Tapi bisi poho deui mah nya ditulis bae: kadesek ku beuki murudulna basa nasional minuhan wewengkon sabudeureun episentrum eta. Mun di Bandung mah, salian ti kadesek ku basa nasional nu diparake ku kolot (urang Sunda) ka barudakna, sangkan barudakna barisa mun engke geus asup sakola, ayana seler sejen kelas menengah, oge ciri kota gede di ieu nagara nu kadatangan seke seler timana-mendi. Mun enya kajadian kitu, basa Sunda dimana diparake? di Tatar Sunda nu jauh ka episentrum tadi. Nya siga baheula deui bae, mun di kabupaten (dayeuh) basa Sunda teu diparake alatan kadesek ku basa Jawa terus ku basa Walanda, di lembur singkur di desa-desa mah, basa Sunda teh angger we hirup-hirup jeung numakena, nu bogana. Salian di lembur Tatar Sunda, basa Sunda oge diparake ku urang Sunda nu aya dimana-mana, nu tempatna di internet. Di Internet, basa Sunda nu dipake mangrupa basa tulis. Jadi salian di media citak koran basa Sunda Galura jeung Giwangkara, majalah Mangle, Cupumanik, Kalawarta Kujang, buku-buku basa Sunda, oge aya deui nyaeta di internet. Di internet aya nu ngarana milis (mailing-list) pasilitas ti yahoo pikeun nyieun porum diskusi ku basa naon bae gumantung ka anu nyieuna. Sangkan teu pati matak lieur utamana kanu can wanoh kana internet, urang pancakaki heula: 1. Internet, hiji sistim jaringan make komputer nu nyambung sakuliah dunya, make satelit, kabel atawa nirkabel. Internet teh mangrupa media pikeun sagala rupa inpormasi. Siga majalah Mangle atawa Cupumanik, salian nu dicitak (jeung kudu dibeuli) aya deui edisi internet nu haratis kari muka internet (alamatna, www.mangle-online.com; www.cupumanik.com). www (tilu we) minangka kode pikeun alamat dina internet. Com pikeun kode ti communication. Kitu deui pausahaan, biasana make kode ditungtungan ku co (tina company). Conto Bank Jabar, alamat di internetna www.bankjabar.co.id. Ari sakolaan make kode ac (ti academic) atawa edu (ti education). Mun lembaga pamarentah biasana make kode go (ti government), organisasi make or (ti organisation). Pangtungtungna make kode nagara. Indonesia make kode id, malaysia make ma, inggris make uk. Conto sakolaan, www.itb.ac.id, www.itenas.ac.id. Conto organisai, www.urang-sunda.or.id. Www eta ayeuna geus bisa teu kudu diketik deui mun rek muka hiji situs. Alamat di internet disebut situs (tina web-site). 2. Salian ti website (situs), internet oge boga mesin paranti neangan pikeun naon bae katerangan(search engine) nu hasilna mangrupa alamat situs. Nu pangpayuna mah (payu diparake/dibuka) ngarana www.google.com. Mun urang neangan kecap sunda dina eta mesin internet, dina itungan detik bakal murudul alamat situs nu patali jeung kecap Sunda. Tinggal milih nu mana nu rek dibuka. Kungsi muka google make kecap Sunda, salah sahiji nu mucunghul teh situs (alamat diinternet) www.sunda.org, eusina tulisan ngeunaan kagiatan misionaris di Tatar Sunda nu puseurna di Amerika. Mun urang ngetik kujang bakal murudul alamat web sejen nu patali jeung kujang. 3. Di internet oge aya pasilitas pikeun ngirim surat elektronik katelahna e-mail, pos-elektronik (pos-el) atawa surelek, surat elektronik. Surelek ieu bisa nepi kanu dituju ngan ku itungan detik. Ku sabab kitu, surat nu make pos + perangko ayeuna disarebut pos keong. Surelek ieu bisa dijieun di situs-situs nu aya di internet, umumna marake nu haratis. Jadi urang boga koropak surat di situs internet. 4. Aya deui pasilitas pikeun ngobrol make kalimah parondok, malah sakecap dua kecap, istilahna chating. 5. milis, ti mailing-list, grup atawa komunitas diskusi di internet, umumna make pasilitas yahoogroups.com, ari yahoo.com teh salah sahiji situs berita nu oge bisa pikeun neangan katerangan naon bae siga google. Milis teh kumpulan alamat surelek di situs mana bae nyieuna bari jeung nu bogana silih suratan ku cara daptar di eta milis. Jadi mun urang nulis surat ka eta milis, batur nu marilu kana milis eta bakal narima surat urang, kaasup urangna sorangan. Carana ku ditulis sarupaning surat nu dikirim ngaliwatan internet, surat elektronik (e-mail). Istilah di basa Indonesia mah pos-el (pos elektronik) di KUSnet aya nu nyebut surelek (surat elektronik). 6. KUSnet, Komunitas Urang Sunda di Internet. Kumpulan Urang Sunda (saterasna US) oge seler sejen nu mikaresep jeung micinta kasundaan nu alamat di internetna nyaeta di http://groups.yahoo.com/group/urangsunda. Ari alamat paranti ngirim surelek mah [EMAIL PROTECTED] KUSnet, Komunitas Urang Sunda di Internet, milis urangsunda@yahoogroups.com Didamel ku Ismail Rahman, urang Kuningan-Cirebon 8 Mei 2000. beuki dieu, anggotana beuki nambahan. Tapi teu sadaya aktif atawa terus jadi anggota. Aya nu alatan pangsiun ti kantorna, eureun jadi anggota, da teu bisa masang internet di imahna. Aya nu kusabab pakepuk ku padamelanana, jeung sajabana. Milis Urang Sunda di Internet teh minangka na mah tempat ngariung, ngawangkong, ngobrol sakumna urang Sunda atawa nu micinta kasundaan, saalam dunya. Enyaan saalam dunya, sabab nu mariluan eta milis teu wungkul US nu nganjrek di TS, tapi nu di luar TS, di luar pulo Jawa, malah di luar Indonesia. Saratna ngan hiji, make basa Sunda, sabisa-bisa. Pikeun US nu nganjrek di luar TS mah, ayana milis KUSnet teh estuning tamba sono jeung ubar nineung ka lembur. Ku nulis make basa Sunda, hate asa geus nepi ka lembur cenah. A. Eusi atawa Jejer diskusi Sagala rupa ngeunaan kasundaan mindeng di bahas. Nu kaitung rame jeung tampolana mah sok nepi ka parasea teh mun ngabahas Sunda jeung Islam, Nyandung. Eusi surat di KUSnet: Keom Sakedap: Syam Ridwan, Sumedang Jkt. (carita heureuy/sindiran aktual) Basa Sunda: undak-usuk basa, merenah loma, Ngaran has US Sajarah karajaan/lembur Tatar Sunda Harti Sunda/Definisi Urang Sunda Falsafah/filsafat Politik Agama: Islam-Sunda, Sunda-Islam, Sunda Wiwitan Beja haneut (utamana soal-soal nu pakait sareng kasundaan) Silaturahmi/Wawanohan (baraya nu anyar gabung) Pancakaki Banten-Cirebon Reuni Milari pibatureun hirup Ubar sono ka lembur, panineungan Tatarucingan Heureuy, Ambek, Curhat Chating (ngobrol saliwat)---yahoo messenger atawa milis gankleboy Beja basa indonesia-inggris soal kasundaan IT (Information Technology), internet Ngirim gambar Kajadian/Beja koran di Tatar Sunda nu patali jeung kasundaan, sosial budaya Korupsi, Posisi US/TS di Indonesia, Jeung sajabana B. Propil Anggota KUSnet Kalolobana mah KUSnet teh diramekeun ku baraya nu sapopoe deukeut atawa make komputer nu on-line (dilengkepan pasilitas internet) di kantorna masing-masing. Aya oge mahasiswa nu make komputerna di warnet, aya nu ti imah. Status anggota KUSnet: Padamel kantor (umum, telkom, bank, minyak, kampus, jrrd) Padamel kantor (widang IT) Mahasiswa Wartawan/redaksi koran Dosen, guru Nu ngumbara di luar negri (sakola, damel). ± 80% pameget. Jumlah Anggota: 1550-an urang nu janten anggota, nu aktif nyerat ratusan. Data surat: Jan Feb Mar Apr May Jun Jul Aug Sep Oct Nov Dec 2005 1925 1281 1543 1493 2258 2199 2004 3210 2446 2176 1873 1551 1292 1302 1826 1835 1818 1744 2236 Wewengkon anggota:  Tatar Sunda: Bandung, Majalengka, Tasik, Bekasi, Karawang, Cianjur, Banten, Cirebon, Ciamis Jakarta  Indonesia: Pulo Jawa, Kalimantan, Sumatera, Batam, Papua  Luar Negeri: New York, Belanda, Perancis, Texas, Kanada, Jerman, Austria, Australia, Seoul Korkid, Jepang, Sierra Lione-Afrika, Inggris, India, Arab, Malaysia. Asli, saalam dunya Conto propil baraya KUSnet di luar negeri: 1. Malaysia, kang M Hasan, asgar nu janten dosen di hiji universitas di Kalimantan nuju s-3 di Malaysia 2. Jepang, Budi, dosen Unsri Palembang nu nuju S-3 di Jepang 3. Korea Kidul (Seoul): Yaya Rukayadi, P.hD, ahli mikrobiologi kawit ti Sumedang, dosen di Universitas Yong Sei Seoul. Hasil panalungtikan panganyarna nyaeta paedah koneng gede. Syaripuddin Siddik, padamel stap lokal di KBRI Seoul, sareng sababara padamel KBRI oge mahasiswa Indonesia di Seoul. 4. Amerika: Abah Joe (Singgih Nata) kawit Cicalengka, 60-an taun, tos 30-an taun di New York. 5. Lies Parish, istri, urang Tasik nikah ka Mark Parish di Inggris (aya di Cupumanik no 23/2005). 6. Wina Austria, Mike Ontohod (Suhermanto Duliman, urang Talaga Majalengka, ahli nuklir, damel di IAEA, International Atomic Energy Agency) 7. Dr. Ganjar Kurnia, dosen Pertanian Unpad, Atase Kebudayaan RI di Perancis. C. Jinis Basa Sunda di KUSnet Salian ti basa lemes, basa loma oge diparake ku anggota KUSnet. Basa loma utamana dipake ku anggota nu geus heubeul. Kadang-kadang basa Sunda nu semu kasar oge ditarulis ku anggota nu rada ambek mun keur madungdeungkeun hiji perkara. Nu anyar gabung biasana ngarasa gimir nulis basa Sunda sabab umumna nyaho yen basa Sunda teh boga undak-unduk basa. Ku anggota heubeul atawa kuncen sok dibejaan yen di KUSnet mah bisa nyarita (nulis) ku basa Sunda mana bae nu bisa. Kasalahan tulis e jeung eu Soal nu rada matuh teh salahna nya salian ti salah ketik, oge dina ngalarapkeun e jeung eu. Biasana aya nu sok mariksa tulisan palebah mana kudu make e jeung eu. Dialek basa Sunda di Internet: Aya sababaraha dialek nu kapanggih dina milis KUSnet. Kapanggihna teh sabab ditarulis ku urang wewengkona masing-masing, diantarana: - Basa Sunda pakidulan (Cijulang Ciamis) - Karawang - Banten - Cirebon - Kuningan - Ciamis Tasik Garut Sumedang Catur Tanpa Bukur? Taun 2001, sababaraha urang anggota KUSnet, diantarana: - Ir. Djatnika Puradinata, MT, salah saurang direktur Medco Energy - Mamat B Sasmita (di KUSnet katelah si Ua Sas, kuncen #2 harita damel di Telkom Surabaya - Maman Gantra harita Redaksi Pelaksana majalah berita Porum - Waluya (Bah Willy) gaduh konsultan sorangan nempel ka LIPI Gaduh kahayang sangkan KUSnet teh teu ngan ukur catur tanpa bukur. Nya diadegkeun wadah nu legal make ngaran Yayasan Perceka dipupuhuan ku sim kuring. Yayasan eta teh estuning asal jadi we heula. Garapan mah dipikirkeun engke. Tapi alhamdulillah, YP KUSnet teh geus kaciri bukurna. Kagiatan atawa program anu tos jalan teh diantara: - Make basa Sunda di milis Kusnet oge sapopoe - Gerakan Reueus Sunda, stiker (gambar stiker USHE tea) kaos (di dieu gambar tulisan dina KAOS tea)  SDM: Ngadegkeun pabukon di sababaraha desa, dingaranan Pabukon Simpay Katresna (PSK). Carana buku-buku dititipkeun di hiji imah nu kersa dititipan pikeun dibaraca ku barudak disabudeureunana. Haratis. Saratna kudu di bumi eta kudu aya murangkalih SD atawa SMP pikeun ngajak/ngabandang babaturanana maraca buku di imahna. Aturan pabukon dina soal buku teh, minimal 25% koleksi buku kudu buku basa Sunda. Tos aya 13 pabukon. YP KUSnet oge nyumbang buku-buku basa Sunda jeung Indonesia ka sababaraha SD (Tsanawiyah (Sukapancar Ciawi Tasik) jeung pasantren (Pamanukan Subang)  SDM: Mere beasiswa pangmayarkeun SPP satauneun pikeun murid SD di desa nu sepuhna teu mampu. Tos aya 40-an murid ti 4 SD di Ciamis. Carana, anggota KUSnet ngontak ka wargina di lembur sangkan maluruh murid SD nu sepuhna teu mampu ka lurah/kuwu jeung surat katerangan ti kepala SD masing-masing.  Basa: Medalkeun buku basa Sunda: kungsi oge medalkeun buku Sajak, Banyol jeung Sajabana, dicitak 500 jilid, seep. Nu kadua, Sura-seuri Siga Sero, dicitak sarebu, aya keneh. Nu kadua ieu dicitak di Surabaya, teu diedit deui, janten aya sababaraha kasalahan citak. (gambar jilid buku SJBS jeung 4S)  Ngumpulkeun dana bantuan (fund raising) pikeun mantuan dulur nu kapapatenan (P3, Paduli Pangungsi Papandayan, Korban Longsor Cililin, Longsor TPA Leuwigajah, jsb)  Dana Yayasan ti kencleng anggota KUSnet. Garapan anggota KUSnet sejena: Kagiatan di luar garapan Yayasan Perceka digarap ku masing-masing nu bisa make dasar hayang nyumbangkeun pangabisa pikeun kamekaran basa Sunda utamana nu patali jeung komputer atawa internet. Diantarana: 1. Mindahkeun tulisan dina buku basa Sunda kana wanda digital, disimpen di ramatloka (website), http://www.urang-sunda.or.id) diantarana: - Buku Rusdi jeung Misnem, yasana Iskandar jeung Pupi. - Nerjemahkeun Quran kana basa Sunda (yasana kang Mhasan Asgar nu janten dosen di salah sahiji universitas di Kalimantan, ayeuna nu nuju kuliah S-3 di Malaysia) 2. Ngadamel ensiklopedia di Internet make basa Sunda (di Internet aya pasilitas pikeun nyieun ensiklopedia ku mangrupa-rupa basa, ngarana Wikipedia). Nu basa Sunda dikeureuyeuh utamana ku Iskandar Alisyahbana Adnan (Wikipedia teh sarupaning ensiklopedia ngan dina Internet, salajengna aos seratan Siskandar di Cupumanik No. 23 Juni 2005). Alamat di internet, www.su.wikipedia.org geus nepi ka 700 entri bari kacampuran keneh basa Inggris. Iskandar sapopoe padamel di Lembaga Eiykman Jakarta. 3. Nyieun game komputer make basa Sunda, yasana Soni Rosa. Sapopoe Soni Rosa padamel Risti Telkom. Game nu sederhana pikeun barudak SD. Game nu tos beres jeung tos diuji coba ku Soni dingaranan Wanara Kumincir. 4. Digitalisasi aksara Sunda Kawali (Ngalagena) sangkan bisa dipake dina komputer. Yasana Dian Nugraha, alumnus Teknik Elektro ITB nu nuju kuliah deui di Jerman. Panambah Basa & Aksara Sunda di Paguron Luhur Itenas (Institut Teknologi Nasional) di Jl. PHH Mustapa 23 Bandung sigana hiji-hijina paguron luhur nu salian ti make ngaran basa Sunda pikeun ngaran gedong-gedongna, oge dilengkepan ku aksara Sunda. Ngaran jeung aksara Sunda nu ditapelkeun dina unggal plang gedong, yasana HR. Hidayat Suryalaga. Itenas teh dikokolakeun ku Yayasan Pendidikan Dayang Sumbi (YPDS), nu diadegkeun ku Ir. R. Mansoer Wiratmadja taun 1973. taun eta mah masih kenah Akademi Teknik Nasional (Atenas). Tahun 1983 robah jadi Institut Teknologi Nasional (Itenas). Tujuan make ngaran jeung aksara Sunda, ceuk pupuhu YPDS ayeuna, Dr. Ir. Iwan Inrawan Wiratmadja (dosen Teknik Industri ITB) nyaeta pikeun negeskeun jati diri yayasan nu ngokolakeun Itenas. Sakitu nu kapihatur. Hapunten basa Sunda sim kuring aliran sangeunahna. nu ieu mah teu aya dina makalah KUSnet beunang ngedit Dadan Biodata Ngaran : Mamat B. Sasmita Nenehna: Ua Sasmita Tempat/tgl. Lahir: Tasikmalaya Padamelan: MPP PT Telkom Padumukan: Jl. Margawangi 7 no 5 Margacinta Bandung ---------------- Ngaran: Jamaludin Nenehna: Mang Jamal (MJ) Tempat/tgl lahir: Ciamis 7 Agustus 1967 Atikan: Magister Desain ITB Padamelan matuh: Dosen Desain Itenas Di Internet: Kuncen/moderator #3 KUSnet, milis urangsunda@yahoogroups.com http://geocities.com/mangjamal mj http://geocities.com/mangjamal [EMAIL PROTECTED] Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/