Baraya sadaya,
Poe tadi nyempetkeun ngajugjug ka wewengkon desa Ciburuy, Cigombong, Bogor.
Nu harita keur dilaksanakeun acara panen pare munggaran di kelompok tani Silih
Asih, nu dihadiran ku gegeden-gegeden ti Jakarta, diantawisna Menteri
Pertanian, Ketua MPR RI oge para pajabat nu lianna.
Sihoreng eta kelompok tani teh dibiayaan ku Dompet Duafa koran republika
(DDKR)ngalangkungan Lembaga Pertanian Sehat (LPS). DDKR mangnyewakeun taneuh
sawah pikeun patani nu teu gaduheun lahan, teras ku LPS, si patani teh
ditungtun pikeun melak pare ku sistim tanpa pestisida, tapi masih keneh kenging
nganggo gemuk kimiawi --teu acan 100% tatanen organik, tapi memang maksadna mah
engkena ka dinya.
Ti 40 hektar taneuh sawah nu dikokolakeun ku LPS di kecamatan Cigombong,
tiasa nampung 149 patani nu ngagarapna, hiji jumlah nu henteu sakeudik pikeun
muka lowongan padamelan di jaman anu memang nuju sesah siga kieu.
Disagedengeun eta LPS oge masihan panyuluhan ka patani perkawis tata cara
tatanen organik oge pangaruhna hasil-hasil tatanen organik pikeun kasehatan,
sanes wungkul pikeun jalmi tapi oge pikeun lingkunganna.
Acarana diayakeun di hiji tegalan nu di sabudeureunna upluk-aplak ku pare
koneng nu bade dipanen. Di tegalan eta disayagikeun panggung jeung tenda
pikeun acara protokoler, teu tebih ti panggung utama aya saung nu dieusi ku
para nayaga kacapi suling ti lingkung seni Citra Resmi Cigombong.
Sabari ngantosan para gegeden sarumping ka ieu acara, sinden nu sorana
halimpu ngahaleangkeun kawih-kawih sunda bari dipirig ku kacapi suling.
Sajongjonan mah meni asa waas, sugan we... pajabat teh teu sarumping, pan
acarana tiasa robih jadi pentas kacapi suling di tengah sawah.....
Cag,
hendra
---------------------------------
Relax. Yahoo! Mail virus scanning helps detect nasty viruses!
[Non-text portions of this message have been removed]
Komunitas Urang Sunda --> http://www.Urang-Sunda.or.id
Yahoo! Groups Links
<*> To visit your group on the web, go to:
http://groups.yahoo.com/group/urangsunda/
<*> To unsubscribe from this group, send an email to:
[EMAIL PROTECTED]
<*> Your use of Yahoo! Groups is subject to:
http://docs.yahoo.com/info/terms/
