Minggu kamari, basa libur maulid Nabi, kuring kadatangan Alo ti Sumedang, manehna ngadon ulin ka Bandung, mawa babaturan saurang. Alo teh awewe masih di SMA. Ka babaturanana, kuring nanya :" Ari Eneng timana?" Manehna nyerengeh ngajawab: "Sami sareng Lia, ti Gelembung". "Na da Bapa oge asalna urang ditu, ke palih mana bumi teh?", ceuk kuring teh. "Ditonggoh, abdi putrana Pa Eman", cenah Si Lia, Alo kuring nambahan: " Incuna Aki Ape, Mang!" "Ke ......Aki Ape? Mang Ape, kutan ieu teh incuna Mang Ape?", ceuk kuring teh kaget, "Kumaha ari Aki Ape ayeuna, jagjag keneh?" "Jagjag keneh, masih sering ka sawah sareng ka kebon", jawab budak teh.
Ingetan kuring ngalayang ka Mang Ape, masih dulur keneh. Kuring keur budak sok nunutur Mang Ape lamun jeung babaturanana moro bajing. Resep ku ayeuh-ayeuhanana. Bajing teh ngarusak buah kalapa, kalapa dibolongan terus dihakan dagingna. Lamun moro bajing, biasana lobaan, kaasup anjing. Salah saurang naek kana tangkal kalapa nu aya bajingna. Biasana bajing sok lumpat kana pucuk atawa lamun aya tangkal sejen nu deukeut ngajleng kana tangkal sejen. Keur supaya ulah ngajleng, tatangkalan nu sejen oge ditaraekan, bari dikeper- keper, supaya bajing sieuneun teu ngajleng kana tangkal eta. Lamun geus kitu, bajing lumpat kana pucuk, tinggal dikeperkeun we kunu naek, bajingna ngajleng, ngalayang ka handap, murag kana taneuh. Nu di handap pahibut, bajing dikepung diteunggeul. Tapi nu aranna sato hirup, sakapeung mah eta bajing teh bisa nyincet, terekel deui naek kana tangkal nu pas teu aya nu ngajaga. Atuh kapaksa ditaraekan deui, tepi ka beunangna atawa mabur leungit duka kamana .......... Mang Ape teh lamun moro bajing, tukang naekan tangkal. Manehna jago pisan naek, naek kana tangkal kalapa sababraha hiji ge, jiga nu teu aya kacape jeung boga kaleuwihan lamun naek tatangkalan teh manehna bisa pindah tina tangkal nu ditaekan, kanu tangkal nu sejenna, gugurayangan siga .......monyet. Komo lamun di kebon awi mah, tara turun kana taneuh, gugurayangan dina dapuran tangkal awi, ngudag- ngudag bajing nu sarua ajleng-ajlengan dina tangkal. Lamun euweuh manehna, teu resep moro bajing teh, sabab nu sejen mah, garampang cape, kakara naek opat-lima tangkal kalapa oge, geus ngalungsar. Hiji waktu, waktu kuring keur ulin di kebon, ngadenge nu ayeuh- ayeuhan. Geus teg weh nu moro bajing. Gancangan muru ka tempat eta, bari dituturkeun ku Si Bopih jeung Si Neri, anjing kukutan. Nu moro teh geuning rada jauh, asup ka kebon anu rembet, loba tangkal kawungan, jeung ceuk cenah loba jurigan. Jog kuring tepi ka tempat nu moro, kasampak jelema geus ngariung, marawa paneunggeul dihandapeun tangkal kawung, Mang Ape keur nerekel naekkan tangkal kawung. Sadayana tatanggahan nungguan Mang Ape tepi ka luhur. Geus tepi, Mang Ajuk ngagorowok : "Pe, keperkeun tah nu lebah dinya, tadi lumpatna kalebah eta" "Lumpat ka pucuk, ke tungguan heula", ceuk Mang Ape bari terus norobos kaluhur. Tapi geus tepi ka pucuk, tihandap nu katingali ngan bujur Mang Ape wungkul, Mang Ape kalahka ngajenjen, nu dihandap terus tatanggahan. Teu kungsi lila Mang Ape ngagorowok: " Bulan naon ieu teh, euy?" " Mulud, tanggal tilu!", ceuk nu dihandap. "Bulan Mulud? !!!", Mang Ape siga nu kaget, terus turun tuturubun. Geus dihandap, manehna hariweueus dina deukeut pucuk teh aya sato sagede anjing, nu jelas lain bajing. Nu dihandap aya nu ngomong : "Careuh meureun Pe, lain dikeperkeun wae atuh" "Teuing careuh, teuing naon, uing kakara nempo, tapi ayeuna bulan Mulud, hayu ah .....urang baralik we", ceuk Mang Ape teh kalahka ngajak balik. Kacida kuring hanjeluna, da geus kabayang moro careuh, tangtu leuwih resep deui, Tapi ras oge dongeng Nini yen di bulan Mulud teh pantang tataekan, nuaran kai jeung moro sato. Ceuk cenah bisi pahili moro kajaden nu dina bulan Mulud teh nuju ngabring ka Cirebon nyekar ka Makam Sunan Gunung Jati ti tempatna ti leuweung Sancang di Garut. Duka sato naon, nu kapendak ku Mang Ape teh dugi ka tuturubun turun kitu, tepi ka ayeuna oge kuring lamun inget, sok panasaran. WALUYA Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
