Maleman Lebaran kuring sakulawarga nyemprung ka lembur di Sumedang. Tadina mah rek beurang keneh ka Sumedang teh, ngan diimah jadi pakepuk, da nu babantu di imah geus mulang ka lemburna di Bantarujeg. Lanceuk jeung Adi geus sababraha kali nelepon, geura datang ka Sumedang, urang buka bareng, cenah. Kapaksa dijawab, kuring teu bisa datang pas buka, tapi jam 10'an peuting. Ampir jam 11 peuting kuring kakara datang ka lembur, Lanceuk aya di imah, ari adi mah euweuh, ka Masjid cenah, takbiran, maklum si eta mah geus jadi Haji .....
Rek Takbiran ka Masjid, tapi awak geus cape pisan, merelek heuay. Ka lanceuk nanyakeun ari sholat Ied rek dimana. Ceuk lanceuk teh di Masjid Mama Ajengan we, entong di lapangan sakola SD. Di lembur kuring tempat shalat ied teh aya dua tempat, nu hiji di lapangan sakola SD jeung nu hiji deui di Masjid bogana Mama Ajengan. Sarua deukeutna, ngan ari Masjid Mama mah, kudu meuntas jalan Raya, ari lapangan SD mah, di tonggoheun imah. Ceuk kuring teh lain di lapangan wae atuh. Lanceuk nembalan, mending di Masjid Mama, Sholat Iedna tereh jeung ari di masjid Mama mah, lamun rengse Sholat Ied teh, jamaah titah nguriling, sasalaman ka sarerea, bari dibarengan macakeun Shalawat Nabi. Kabiasaan ti baheula, nu geus leungit lamun sholat Ied di lapangan SD. Geus shalat Ied teh, langsung bubar, paling-paling sasalaman lamun pasanggrok jeung nu wawuh di jalan waktu balik ka imah. Isuk-isuk, jam satengah genep, kuring sadulur-dulur ngabring ka Masjid. Di Masjid masih corengcang, kuring diuk di baris ka tilu. Bari takbiran kuring tatap-teuteup ka sakuriling Masjid. Masjid teh angger keneh jiga baheula, ngan ditambahan ka beulah kaler, ayeuna mah aya tempat keur jamaah awewe. Mimbarna masih angger. Ingetan kuring ngalayang ka 40 taun ka tukang, waktu kuring budak keneh. Waktu baheula masjid diadegkeun. Baheula, di desa kuring, ngan aya hiji Masjid, rada jauh ti imah, aya meureun kana 500-600 meter mah. Lamun rek Jumaahan teh kudu mentas heula jalan Raya, terus nyorang jalan di pasawahan, kakara anjog ka Mesjid. Hiji waktu kuring ngareungeu ti Pun Aki, tadi cenah Mama Ajengan ngadongkapan Aki, anjeunna aya maksud bade ngawakafkeun tanah digigireun bumina, bade dijieun Masjid. Kuring atoh pisan, rek aya Masjid di deukeut imah, meureun resep pisan, bisa nakol bedug jeung ngadulag siga batur kuring si Salya nu bisa ngadulag. Pokona salembur papada antusias ngawangun Masjid. Pun Aki nuaran kai di kebon, kaina disumbangkeun keur wangunan Masjid. Teu karasa Masjid teh geus jadi, pas samemeh bulan puasa. Bulan Puasa Masjid teh geus bisa digunakeun. Sarerea nyarebut eta Masjid teh "Masjid Mama", keur ngahormat kanu ngawakafkeun jeung ngawangun eta Masjid. Kuring jeung balad-balad ulin teh ngan ulukutek di sabudureun Masjid we, ti isuk tepi ka sore. Balik ka imah ukur buka puasa, geus kitu giridig deui ka Masjid. Naon nu narik kuring ulin di Masjid? pangpangna mah hayang bisa nakol bedug. Unggal pas lohor, kuring geus deukeut bedug, nempokeun Mang Ahim nakol bedug ..... torolok...tolorok.....dug..dug...dug. Peutingna tas tarawehan, nempokeun nu ngadulag. Sorana mani ngeunaheun ....dag .. dulugdugdag ... dug-dag. Ngan hiji nu kurang di Masjid teh, euweuh sepekeran! Teu cara masjid nu heubeul nu aya sepekeran merek TOA. Harita di lembur kuring acan asup listrik, speker TOA di Masjid heubeul make aki keur tanaga listrikna. Kungsi sayong ngurihit ka Pun Aki, sina Pun Aki nyumbang speker keur Masjid. Pun Aki teh kalahka nyentak, mahal speker teh, saurna, jeung deuih apan di urang mah can aya listrik, kudu make batre nu kudu disetrum, nyetrumna kudu ka kota. Masjid teu aya Speakeran, tapi sora bedugna, jadi tanda waktu keur urang lembur. Lamun sora bedug lohor, ngadurugdug, nu digarawe di sawah jeung di kebon, areureun, tandana digawe di poe eta, geus lekasan. Istilahna keur nu buburuh macul di sawah mah, digawe tepi ka bedug. Mang Ahim, tukang nakol bedug, satia pisan, pas jam 12 beurang, manehna pasti geus dihareupeun bedug, mamawa panakol terus nakol bedug, ...... torolok...torolok ...dug...dug....dug Hiji waktu kuring jeung babaturan ti isuk-isuk pisan, geus ulin ulukutek di sabadureun Masjid. Lulumpatan, ucing-ucingan, cape, der ngariung di emperan masjid ngobrol jeung babaturan soal jin nu sok ngasupkeun budak bangor kana jero bedug. Teu karasa waktu nerelek beurang. Rarasaan teh geus ngadeukeutan jam 12 beurang. Tapi anehna Mang Ahim can jebul wae. Kuring lengo deui-lengo deui nempoan ka arah imah Mang Ahim. Tapi manehna teu mucunghul wae. Deregdeg lumpat ka jero Masjid, ningali jam. Jam ditelek-telek naha jarum pondokna nunjuk angka 2 ...eh geuning jam teh paeh. Lumpat deui ka deukeut bedug, terus hariweuweus ka babaturan, "Jamna paeh euy, naha Mang Ahim teu jebul wae?" "Enya nya!, kumaha ieu teh mangkaning geus beurang kieu?", ceuk si Enjut, nembalan bari hariwang. "Kumaha lamun ditakol ku urang wae yu!", ceuk kuring teh, asa boga kasempetan rek nakol bedug nu munggaran. "Bisa kitu?", Ceuk si Enen, bari melong ka kuring. "Bisa", ceuk kuring teh ngajago, "Unggal poe oge uing nempokeun Mang Ahim nakol bedug!" "Sok Atuh...", ceuk babaturan teh reang. Kop kana panakol, ngahuleng heula, nginget-nginget kumaha Mang Ahim nakol bedug. Geus kitu.....habek ...panakol digebugkeun kana bedug......Dug, poho kudu nakol heula kohkol awi, keur sora torolok- torolokna. Habek deui digebugkeun Dug ...Dug ..... Beres....nakol bedug teh lungsur-langsar. Kuring ngarenghap bakating ku bungah ngajaran nakol bedug. Eh tapi ....... naha ujug-ujug torojol Mang Ahim bari panonna buncelik :" Saha eta teh nu nakol bedug, ieu teh kakara jam satengah sawelas nyaho! Hah geuning barudak? .....Dasar bangkawarah !!! Sajongjongan kuring hareugeueun, tapi jadi sadar...kuring kudu lumpat, bisi diamuk ku Mang Ahim. Serebet ngabecir lumpat, dituturkeun ku babaturan .... Meunang sabulan, kuring tara ulin deui di Masjid, bakating ku era!. Di lembur ear nu nyaritakeun, Incuna Pa Lurah Hormat*), nakol bedug lohor lain waktuna, tepi ka nu macul di sawah geus hararanjat ti jam satengah sawelas keneh ..... *) Lurah Hormat = Mantan Lurah Baktos, WALUYA Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> Your email settings: Individual Email | Traditional <*> To change settings online go to: http://groups.yahoo.com/group/urangsunda/join (Yahoo! ID required) <*> To change settings via email: mailto:[EMAIL PROTECTED] mailto:[EMAIL PROTECTED] <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/