Kamari teh kungsi ngaluuhan acara "Gelar Seni Tari & Musik Khas Sunda" nu diayakeun di Bogor Trade Mall (BTM), salah sahiji Mal anyar di Bogor. Acara ieu dikokolakeun ku Yayasan Tatar Pakuan (YTP) nu gawe bareng jeung HiSS (Himpunan Seniman Sunda). YTP teh hiji organisasi enggal di Bogor mah, ari HiSS mah tos ngadeg babaraha taun.
Acara ieu kenging pangrojong ti kantor Dirjen Kesatuan Bangsa dan Politik Dep. Dalam Negeri, oge Pemkot jeung Pemkab Bogor. Nu nyugemakeun acara ieu oge disponsoran ku babaraha pausahaan, diantarana pausahaan operator telepon seluler, BUMN, pausahaan multinasional, teu ka kantun oge pausahaan nasional ngiring ilubiung, sagedengen eta, tangtos wae BTM jeung pujasera BTM lantey 3 tempat acara ieu dilangsungkeun. Pangeusi acarana mah seuseueurna ti sanggar seni nu aya di sabudeureun Bogor jeung ti sakola-sakola. Acara digelar ti tabuh hiji siang dugi ka tabuh lima sonten. Mangrupa-rupa seni sunda nu dipintonkeun, saperti tari merak, rampak sekar, tembang cianjuran, kawih sunda populer, rampak gendang, calawak (calung, lagu & lawak) tapi pangseueurna mah mintonkeun tari jaipong kreasi. Di tengah pagelaran diseling ku "orasi budaya" ku Bah Eman Sulaeman, pupuhu Yayasan Hanjuang Bodas. Hanjakal harewosan kuring ka Bah Eman sangkan acara ieu dikaitkeun jeung mieling Dewi Sartika teu dipalire, hilapeun meureun Bah Eman-na. Panongtonna ge kawilang seueur, ti kawit barudak SD --nu dipiwarang ku guru-guruna, paminat seni sunda, oge masarakat umum nu memang ngahaja shoping ka ieu Mal. Salah sahiji nu jadi panarik ati panongton, meureun ku ayana doorprize di sela-sela acara. Saur panata calagarana, acara ieu teh pikeun test case, nu hoyong ditingali teh aya keneh henteu respon boh ti pamarentah, sponsor, oge masarakat umumna kana seni sunda. Upami acara ieu ka wilang sukses, kapayun baris diayakeun deui acara samodel di mal atawa karamean nu sanes. Pan di Bogor tos seueur mal ayeuna mah, malih mah nu nuju diwangun ge leuwih ti dua. Upami seueur manggung mah, pan seniman teh moal koreh-koreh cok deui.... Baktos, pun hendra --------------------------------- Have a burning question? Go to Yahoo! Answers and get answers from real people who know.
